Netume 15 - NTSHOB NSI

Kwi Mosé boa ba Israél

¹ Ndùlala Mosé boa bon Israél yob sen kwi li Tshùaben ntshob ndù: Me nsi yob kwi fà Tshùaben, nummb'a ghù nkuni mi tswite wul i. A tèn nyàmdiaṅ boa ghako' nyàm naṅ ntùm dibantse.

² Tshùaben bèn mbe yàm neta, me ke njob kwi fà à yi. A yi bèn ntshu' àm. A b'a Nsi àm, me nsi nyàmt'é. Me nsi ghamte ze Nsi tàa.

³ Tshùaben b'a sa'nde' num ntsho. Lén se b'a Tshùaben.

⁴ A lo tèn nkalig Faraon bo ntshu ntsho naṅ dibantse. Tse ghama' ntsho tse neta vù ntùm dibantse meba.

⁵ Ghem lo kabte yube, bo swe' nèn tun ntse mba loṅ nà.

⁶ Tshùaben àm, bu o ze zwim lo la'te ze neta, bu o ze zwim lo be'te ngakeban

⁷ O be ntshùa njam nkuni fen so, ntèn ghamaṅt'o ma' nsi, yantù o lo nsi num bo, yantù o kù yub mba mbwôg be nkù mbèn nà.

⁸ Ywèt ntshu tsho lo ghù ntse bù' ntete, fetntse tsin tù mba nkumba' là, koṅntse jumte netèt dibantse.

⁹ Ngakeban lo ke ntshob ndù: M'a' yab njam bo, m'a' kote yube, m'a' ghabte ntsha' ntsho. M'a' ghù tshu yàme, m'a' tsho' ṅwi, bu àm nsi sate njoṅ i fa.

¹⁰ Là ywèt ntshu tsho tshwèt ma' yub ntùm dibantse, bo nèn tun ntse mba tu' tùn nà, netèt mà dibantse ndùb.

¹¹ Tshùaben, we z'a be mba wù, netèt ba nsi à? We z'a be mba wù, mbe mèn nelàn à? O be nkuni nenyàmt'o, O bèn nke ngù nsà.

¹² O lo nyit bu o ze zwim, tsha' kabte yube.

¹³ O lo lo' à kondèn ntshagte yen nzwit mèn o li z'o na' ntshu' i là. O lo tshùa njam neta o ntshagt'é tà nkum dù'ntswe ze nelàne.

¹⁴ Ngôngô lo be ju' yen tshô là mvètte. Bwôg lo ghom ben tse bo be Palèstina là;

¹⁵ fenfen Edom lo vètte, nge' mem sa'nde' tse bo be Moab là; ntàma' lo ghom njoṅ ba Kanaan fa.

¹⁶ Bwôg bo nge' lo kab mbu num bo. Neta bu o lo ghom yub bwôg, tà nkum ndùse yu nzwit mèn tshùa là me Tshùaben, tà nkum ndùse nzwit z'o na' ntshu' yub tshùa là.

¹⁷ O lo ghù bo tsho, o te yub num mbat z'a be ntsi' mu là. Tshùaben, o lo nabte yen dù' là num netswe bwe. Tshùaben, a b'a dù'ntswe nelàn ze mbu mu na' nabte là.

¹⁸ Tshùaben b'a mfen njoṅ ndù fa!

¹⁹ Nyàmdiaṅ Faraon lo tsho ntùm dibantse boa nkalig mi mba tse ghako' nyàm, Tshùaben ghù ntse tamte num bo. Là bon Israél dut dibantse a nku, num tsha' njum.

²⁰ Ndùlala, ngatshob ntshob Nsi Miriam, ngon mà Aron lo' lammbé ntshùb bu i, njoṅ bènnzwi fa tam njam i, nke nyiaṅe, nke mbu' lammbé.

²¹ Miriam yob kwi boa bo. Be yob kwi mfà Tshùaben, nummb'a la'te nkuni mi, tèn nyàmdiaṅ boa ghako' nyàm naṅ dibantse.

ZIN BON ISRAEL NUM KÔNKWA Ntse mi a be Mara là

²² Mosé ghù ba Israél lo kaṅ dibantse meba nèn nze kônkwa Shur. Bo zin num kônkwa lé'njù tat ke fon ntse.

²³ Bo zin nkum Mara, là ke ku'ni ne nu ntse Mara, nummb'a lo ke nzwe. Yen nà b'a ndù Mara b'a nezwe.

²⁴ Ngô tshobte ntun ntô num Mosé ntshob ndù: Bag nsi nu à ke?

²⁵ Mosé bu' mbu Tshùaben, Tshùaben la'te mo' tù yi. A keb ma' ntùm ntse, ntse dùmte nenu. A bwe là ze Tshùaben fà ntshù' bo mba nkàn nà. A bwe là z'a na' ndaṅte yub là.

²⁶ Tshùaben tshob yi ndù: A be z'o ju' nze Tshùaben Nsi o, nzin num miag mi ndaṅndaṅ nà, a be z'o kù' ntoṅ num ntag mi, a be z'o ze njoṅ ntshù' mi fa là, mba me ke nsi tam o sàm ngokèt netèt tse me na' ntam Egipto yi là, nummb'a b'a me Tshùaben bèn nke njat'o.

²⁷ Bo zin nkum Elim: Ntôntse be bwe ntshob bàa gham boa nten ṅam sammbàa. Bo te mbàn yub bwe, mbaṅ ntse.