Netume 12 - NTSHOB NSI

Njùa Pasa

¹ Tshùaben tshob Mosé bo Aron ntùm ngô Egipto ndù:

² Yen maṅwù li nsi b'a mbwe maṅwù netèt tsemo' maṅwù fa. Bin nsi ke lo' à yi ghù mbwe maṅwù yi ntùm ngu'njù.

³ Bin tshob njoṅ nzwit Israél fa ndù: A mbe lé'njù gham ntùm yen maṅwù li, bo lo' ta' mén mbwe ntùm mba zit tunndà lo, ndo' ta' mén mbwe mba ntùm zit ndà lo.

⁴ A be ze tunndà kag num ta' mén mbwe là, mb'a bwô netamte bin mèn mbaṅ ndà, num njoṅ benntùn tse bo nsi là. Bin nsi lo' mén mbwe njoṅ ze be mba we lo fèt là.

⁵ Bin lo' mén mbwe z'a ke' ghù lo' là, fot mbwe z'a ghù tamngu' là. Bin nsi lo' yen mén mbwe l'a netèt njùmbwe ke netèt mbwe ntùn no.

⁶ Bin nsi lé' yen mén mbwe là tà kum lé'njù ntshob kuà gham ntùm yen maṅwù li. Njoṅ mbumte bon Israél wat yen mén mbwe là ndùse njù à ke ntamte là.

⁷ Bo nsi lo' lem tse, lo' se' mbatndà yi bo tu nzendà mba' mi bo nsi fèt mén mbwe bwe là yi.

⁸ Bo nsi fèt mbàb yen tèttswe' là. Bo nsi ton à netone, bo bàn ke te ywibte se, boa nenà ts'a zwe là.

⁹ Kà bin jù sàm ju mbag, ke ze bo lo' ntse na yi là lo, là nda' ze bo ton a netone, nton bo tu i, boa tshu bam tse là.

¹⁰ Kà bin faṅ sàm ju kum nkebnjù; a be ze ju kum nkebnjù là, bin ton.

¹¹ Bin fèt ntaṅ kob tun bin, nso nsilibat nku bin, ntshùb kôg bu bin. Bin be fèt nke nànte. A b'a Pasa Tshùaben.

Njùa bàn keko'

¹² Me nsi ya' ntùm ngô Egipto yen tèttswe' là. Me nsi lab njoṅ tuswe bon fa ntùm ngô Egipto, neto' num mènntùn nèn nkum num nyàm. Me nsi tsho'te tse nsi ngô Egipto. A b'a me Tshùaben.

¹³ Lem nsi be keki num bin, num mba' mi bin be bwe là. Me nsi yen lem, ya' zin tôge. Bu àm ze me nsi sate Egipto yi là ke nsi kwag zine.

¹⁴ Bin nsi ke kwimte sen lé'njù là. Bin nsi ke jù jùa là ghamte Tshùaben yi. Bin ke ngù ndùlala ngu'ngu'. A be kàn s'a ghô matmat là. Bin ke ngù sen jùa là.

¹⁵ Bin nsi jù bàn ke te ywibte se num lé'njù sammbàa. Bin sô ntsha' bàn ntùm ndà tsin fe num mbwe lé'njù. Mba we lo z'a nsi jù bàn bo te ywibte se netèt tshen lé'njù sammbàa là là, mba bo nsi sô ng'é netèt ba Israél.

¹⁶ Bin nsi ghù mbumte nelàn num mbwe lé'njù bo miagt'é. Bin ke nsi fa' sàm ju num tshen lé'njù sammbàa là, kà ntag nda' nenabte ju ze mba we lo jù là.

¹⁷ Bin nsi ke ze jùa bàn ke te ywibte se, nummb'a kua' sen lé'njù là se me na' nsô tsin ntshu ntsho ntùm ngô Egipto là. Bin ke nze sen lé'njù li ngu'ngu'. A kàn s'a ghô matmat là.

¹⁸ A nsi be num mbwe maṅwù, neto' lé'njù ntshob kuà gham nèn nkum mfetnjù lé'njù ntshob ntshù' ṅam mbàa, bin ke njù bàn ze bo ke' te ywibte se là.

¹⁹ Bo ke nsi tèt ntsha' bàn ntùm ndà tsin num lé'njù sammbàa. Mba we lo z'a nsi jù bàn bo te ywibte se là là, mba bo nsi sô i netèt mbumte ba Israél, ke bo bwe i à njù ke ntùm ngô lo.

²⁰ Kà bin jù sàm ju ze bo ma' ntsha' bwe là, ke bin nke ntswe be yà lo, mb'a ke' bwô ndù bin jù bàn ze bo te ywibte se là.

Nena jujù Pasa

²¹ Mosé tsiaṅ njoṅ ghakwé mbwe ba Israél fa ntshob bo ndù: Bin nèn ndo' mén mbwe num tunndà zine, nzwi i, njù Pasa.

²² Bin nsi lo' tswe' nzenyi tshù' ntùm kab lem se' num tu nzendà boa mbatndà. Kà sàm mèn netèt bin dut ze nkù'ndà tà nkum nkebnjù.

²³ Tshùaben nsi ya' ntùm ngô Egipto num nelab i. A nsi yen lem num tu nzendà boa mbatndà tsine. A nsi tshùa ndùlala Tshùaben tôg nzendà tsin ntshùa, ke faṅ ngasate tsho ntùm ndà tsin ndab zine.

²⁴ Bin nsi ke ze yen nà. A b'a ta' ntshù' wù mba bon tsho num ngu'ngu'.

²⁵ Ndùse bin nsi tsho ntùm ngô ze Tshùaben nsi fà bin mb'a na' ntshob là, bin nke nze yen nu là.

²⁶ Ndùse bon tsin nsi bètte tun yen nu là là,

²⁷ Bin nsi tshob bo ndù: A b'a jule'te num Pasa Tshùaben nummb'a lo tôg mba' bon Israél ntshùa, ndùs'a ke ndab ngô Egipto là, nkabte mag mba'. Ndùlala ngô vù nsi mbu' mbu mbwe Tshùaben.

²⁸ Bon Israél lo mbèn njam ngù ndaṅndaṅ mba Tshùaben na' ntshob Mosé bo Aron nà. Bo ghù ndùlala.

Nge' mbatte gham: Vù mbwe bon Egipto

²⁹ A be tshaṅ tèttswe' Tshùaben zwite njoṅ tuswe bon fa Egipto, neto' num tuswe Faraon z'a nsi tswe diaṅkwa se là, nèn nkum num tuswe ngandàtsha, boa njoṅ mbwe bon nyàm fa.

³⁰ Faraon lo nsi tèttswe' mba ghafa' tse boa njoṅ ba Egipto fa. Mo' tshu'te ndùb be Egipto, nummbe sàm ndà mba ntshù' lo ke be ze fe mén ke' be bwe là.

³¹ Be kua' tèttswe' mbit Faraon tsiaṅ Mosé bo Aron ntshob bo ndù: Bin nène, bin tum ntùm ngô àm bin à ba Israél. Bin nèn ngamte Tshùaben mba bin na' ntshob là.

³² Bin lo' mbwe tsin boa nyàmna' tsin mba bin na' mbètte là nène. Bin lé't'àm nène.

³³ Ba Egipto nànte ba Israél, mfaṅ yub bo tum ntùm ngô nène, nummbe bo lo ke ntshob ndù: Be nsi kwùte njoṅ be fa.

³⁴ Ngô lo nsi nène, nket ze tag ndù a tébte, a ke yoṅ nko'o, ntume; bo kut tshu netébte tag yi ntùm nkummbaṅ, njab nkembe' bo.

³⁵ Bon Israél ghù mba Mosé tshob bo là, ndon tshu nkàb, tshu gol boa nkummbaṅ ba Egipto.

³⁶ Tshùaben ghù bon Israél ghù fen mbwe ba Egipto, ba Egipto fà tshu tse bo lon nà bo. Ndùlala bo sô tshu bu ba Egipto fa.

³⁷ Ba Israél lo Ramsès nèn Sukkot; bo na' mb'a benntùn nguan 600 000, ke siaṅ bènnzwi boa bônke'.

³⁸ Mo' mà bwoṅ benntùn nèn tshag yube boa bo, mba bwoṅ nyàm yàme, njùmbwe boa nyàmna'.

³⁹ Bo na tag ze bo tum yi Egipto là; a fà makela' ze ntsha' be bwe là bo, nummb'a lo ke ko', nummbe bo lo ta' yub Egipto kà ngelaṅ nenabte jujù manze ke be bo.

⁴⁰ Ba Israél lo tswe Egipto ngu'njù 430.

⁴¹ Tshen ngu'njù 430 là lo be tôg njoṅ ntshu ntsho Tshùaben fa tum Egipto.

⁴² Yen nà na' mb'a tèttswe' Tshùaben zi tshùalo, nsô yub Egipto là. Yen tèttswe' là b'a ze tshùalo z'a bwô ndù ba Israél ke nkwimte ngu'ngu', ndo' nke ngamte Tshùaben yi ngu'ngu' là.

⁴³ Tshùaben tshob Mosé bo Aron ndù: Tshù mb'a bwô Pasa ke ntôg li: Kà sàm ngùn jù Pasa.

⁴⁴ Njoṅ kuan fa tse bin jun yub mbùm, nsi ket sub là ghù nejù Pasa.

⁴⁵ L'a ke' bwô ndù ngùn ke ngafa' lo jù Pasa.

⁴⁶ Bo nsi fèt njùmbwe à ntùm ndà ntshù'; o ke nsi lo' kam i tum yi yen ndà là, ke bèn mbe' lèn vôg se mba ntshù'.

⁴⁷ A bwô ndù njoṅ mbumte ba Israél fa nèn njù Pasa.

⁴⁸ A be ze ngùn z'a ndà o kô nejù Pasa neghamte Tshùaben yi là, mb'a bwô ndù a si ket mba zit nshum i lo, kà nku'ni neghù ndùlala, bo lo' i mba ménla' là. Kà sàm kesiket mba ntshù' jù Pasa.

⁴⁹ Mat neghù nsi b'a ntshù' num ménla' bo ngùn z'a be netèt bin nà.

⁵⁰ Njoṅ bon Israél fa bam ju ze Tshùaben na' ntshob Mosé bo Aron nà. Bo ju' ntshu yube.

⁵¹ Tshùaben sô bon Israél Egipto be kua' sen lé'njù là, njab yub nka mba ntshu ntsho là.