Netume 1 - NTSHOB NSI

Nsi ghù bon Israél tum ntùm ngô Egipto

¹ Tshù ndèn nzwit Israél, ze bo ke mbèn ntsiaṅ i Yakob, tse bo à bo tsho mà Egipto li. Bo lo zin nkum bwe, mba we lo bo ze tunndà.

² Rubèn, Siméon, Lévi bo Yuda.

³ Isakar, Zabulon bo Benjamin.

⁴ Dan bo Néftali, Gad bo Aser.

⁵ Njoṅ benntùn fa bo tum zwe' Yakob là tamte mb'a ntu ṅam sammbàa. A lo be be ndù Yosèf tù' be ts'a mà Egipto.

⁶ Yosèf kwù, mba njoṅ fèt tse fafa, mba njoṅ yen zwiaṅ benntùn nà fa.

⁷ Nzwit Israél zi, njàme, mbwe mbèn njàm neshu, bo ta, njàm kà ndun ntùm ngô.

⁸ Ndùlala mo' mfen nswe jù fen ntùm ngô, ke lèn Yosèf.

⁹ A tshob ze ngô ndù: Bin yen ndù bon Israél tshwèt njàme, mbèn nke nta tshùa be.

¹⁰ A bwô ndù be diag manze num bo, ntshètte yub ndù kà bo bèn neyàme. Nummb'a be ze ghakeban be kam be ntsho là, mba bo nsi tamte le' be ntsho, bo tum ntùm ngô.

¹¹ Ndùlala bo yab ghatô netèt bo ndù bo lo' nànte mfa' ma'ni yub yi, yôg ta num bo. A tshùa ndùlala bo kut ba ndàlem Faraon: Pithom bo Ramsès.

¹² Là, ndùse bo ke ma'ni bon Israél là, bo bèn nke njàm nèn tshob a be mbwe, kà mbe miagte nu bon Israél bag mba we lo.

¹³ Ba Egipto ghù fa' bèn ndèt num bon Israél ntshùate.

¹⁴ Bo ghù yôg ta num bon Israél ntùm tô tsha'a, nebom tsha'a, bo nzenze mfa' yàm tshwèt, kà njôg ngù memo' mfa' nzenze mi bo ke ma'ni yub ntùm bwe là.

Mba Faraon tsho' nku ba Israél kebàn nà

¹⁵ Mfen Egipto tshob ghakwé bon netèt ba Héber tse lén mbwe i be Shifra se mo' Pua là ndù:

¹⁶ Ndùse bin nsi kwé bon zwi Héber, lôte yen ndù a b'a mén mandum nà, mb'a bwô ndù bin zwi i; l'a be z'a b'a mén mènnzwi là, bin faṅ a yôg.

¹⁷ Nda' ndù ghakwé bon ke ghù kua' ju ze mfen Egipto tshob bo là; bo faṅ bon ntùn; nummbe bo lo ke mbwôg Nsi.

¹⁸ Mfen Egipto tsiaṅ ghakwé bon ntshob bo ndù: Numke bin ngù ndùlala, mfaṅ bon ntùn à?

¹⁹ Ghakwé bon tshob Faraon ndù: A b'a nummbe zwi Héber ke' b'a mba zwi Egipto là. Bo ghù neta neshu; ngakwé mén be mbe se' ndù bo yà bwe tshobe.

²⁰ Nsi ghù mebwô ghakwé bon, yen ngô là nke njàme, nke nta neshu.

²¹ A tshùa mba ghakwé bon na' mbwôg Nsi là, Nsi ghù bo ghù tunndà.

²² Faraon tshob ze ngô ndù: Bin ma' mba zit mén mandum no bo nsi bwe netèt ba Héber là ntùm ta'ntse Nil, là, mfaṅ bon bènnzwi ntùn.