Neto'te 6 - NTSHOB NSI

Dibambaṅ

¹ Ndùse benntùn na' nto' neyàm num nsitsha'a, mbèn nke mbwe bon bènnzwi là,

² bon ba mfetù yen ndù ngonngon benntùn bwô yube, ndùlala bo lo' ts'a bwô yub là.

³ Tshùaben tshob ndù: Me ke bèn mbam ndù mènntùn yôg matmat, nummb'a b'a mènntùn. A nsi ke yôg nda' num ngu'njù bon bàa nkù.

⁴ Nsansa benntùn lo be num nsitsha' num yen ngelaṅ nà, mba num ngelaṅ z'a be njam yen nà là. Ngelaṅ bon ba mfetù ke ndo' ngonngon benntùn, bo bwe bon bo là, tshen bon nà na' mb'a ben neta bo be mbwembwe là, benntùn tse lén sob ju'ni là.

Nsi kô neyôg Noa

⁵ Tshùaben yen ndù nukebwô mènntùn tshwèt njàm num nsitsha'a, nkwatenu ntù i nke mbe be mi kebwô njoṅ ndù fa.

⁶ Tshùaben fém mb'a na' nabte mènntùn njab num nsitsha' là, ndùlala ngù yantù ntùm ntù i.

⁷ Tshùaben tshob ndù: Me nsi biagte njoṅ benntùn fa tse me na' nabte là num nsitsha'a; me nsi tamte njoṅ benntùn fa, tamte njoṅ nyàm nke'nke' fa, tamte njoṅ nyàm fa tse bo be nsoṅ bam sob nsi là boa nsaṅ mi a mfe kamànyam nà fa; nummbe me fém mba me na' nabte yub là.

⁸ Là Noa be mènfen num miag Tshùaben.

⁹ Tshù tshô Noa li: Noa na' mb'a mèn netsine, mèn mebwô netèt benntùn tse bo be num ze ngelaṅ nà. Noa lo ke nzin à bo Nsi.

¹⁰ Noa lo bwe bon bandum tat, Sém, Kam bo Yafét.

¹¹ Nukebwô bagte tsha' num miag Nsi, nefètte lem lo' dù' num nsitsha'a.

¹² Nsi lôte tsha'a, njen ndù nukebwô dun bwe; nummbe njoṅ benntùn fa lo ghù à be nzin kebwô num nsitsha'a.

¹³ Nsi tshob Noa ndù: Yôg benntùn mi num nsitsha'a, me bèn njù' ndùlala. Nefètte lem dun num nsitsha' num nu benntùn. Ndùlala me nsi biagte yub boa tsha'a.

¹⁴ Lo' ntshwèn tù s'a ta là nkom sitima yi. O nsi kebt'é nto'nto' lo' zin diaṅ i yi njam ntùm bwe mba njam njù.

¹⁵ Tshù mb'o nsi kom i li: A nsi ghù ma' bon tàn nkù num taṅ i ze nesà, ngù ma' ntshob tàn ṅam mbàa num taṅ i ze nevôge, ghù ma' ntshob tàn gham num nenèn tù.

¹⁶ A bwô ndù o ghù tu sitima nèn tù num ta' kam ma' ntshù'. A bwô ndù o te nz'é mbaṅ bwe, ngù mbwe laṅ se, mbatte bàa bo mbatte laṅ se tat.

¹⁷ Mbe se' mba me là, me nsi lo' dibambaṅ bo ntse se' yi num nsitsha' num nebiagte njoṅ benntùn fa yi boa tshu tse bo ghù zwiag bam kamànyam nà. Njoṅ tshu fa ts'a num nsitsha' là nsi kwùte.

¹⁸ Là, me nsi wat kàn bag wù. O nsi tsho ntùm sitima, wù, bon tsho tse bandum, nzwi o boa zwi bon tsho.

¹⁹ Tsho ntùm sitima bin à njoṅ tshu fa ts'a be njôg là, o ke ndo' yub bàa bàa, mandum bo mènnzwi, mba zit lo num ze tshaṅ i.

²⁰ Ndo' nsaṅ num lèn tshaṅ yube, ndo' nyàm num lèn tshaṅ i, ndo' njoṅ nyàm fa tse bo be nsoṅ bam sob num tsha' là num lèn tshaṅ yube, ndo' yub bàa bàa num lèn tshaṅ yube, bin à bo tsho mum sitima, ndù o lo' yub ndé' nzwit yi.

²¹ Mbe se' mba wù là, lo' njoṅ tshu nejù fa, ndé' jujù z'a nsi ywimt'o mba bo là.

²² A ju ze Noa na' ngù là. A lo ghù njoṅ tshu fa tse Nsi na' ntshob yi là.