Neto'te 49 - NTSHOB NSI

Yakob naṅ mbotni num bon tse tse bandum ntu ntshob bàa gham

¹ Yakob tsiaṅ bon tse tse bandum ntshob bo ndù: Bin kùmte me soṅ zin ju z'a nsi tum num bin ntùm ntswe'njù mi a tshwèt nse' là!

² Bon Yakob tse bandum, bin bumte nju'u, bin ju' ju ze tà zin Israél tshob là.

³ Wù Rubèn tuswe àm, yàm neta mba yàm mbwe ngù'. O b'a mèn ndùb ntùm nku'ni, mbe mèn ndùb ntùm mba'.

⁴ O be nswe mba ntse là, là, o ke nsi tum ndà! Nummb'o lo ko' num kunndà tàan; tshù, o lo sagte kunndà sàm, nko' num bwe.

⁵ Siméon bo Lévi b'a fètfèle, mbi mub b'a tshuntshùag nefètte lem.

⁶ Me ke nsi tsin nsi tsham bag à bo. Me ke nsi te ku ntùm mbumte yub. Nummbe bo be nzwite benntùn ndùse bo ya ntù là. Bo be nkù ntù nekag mfaṅ njam nku mfotmfô.

⁷ Ndon tu yantù yub num njabnge' mi; ndon tu tshùagntù yub num ntanta i. Me nsi yabte yub mum ngô Yakob, me nsi sate yub mum ngô Israél.

⁸ Yuda, fèt tsho nsi ke nyàmt'o! O nsi ghom ghakeban tsho à njam kekot bo; bentàan tse bandum nsi vùte nsi mbwe o.

⁹ Yuda b'a metshab mén ngwayit; nshum àm, o fe ghom à nyàm. A kab nsi, a nô nsi mba ngwayit là: We z'a nànt'é k'a lo nsi à?

¹⁰ Yuda nsi tshùb kôg fen, tshùb kôg nesa' yi mfé' nku mi, tà nkum ndùse mèn z'a be se nsi se' là. Ngôngô nsi ju' ntshu yen mén nà.

¹¹ A taṅ metsit kekwèn i tun tù ndu', ntaṅ mén kekwèn i ze mènnzwi num kaṅtù. A be nsôg nzwe i ntùm ndu', nsôg kummbaṅ se ntùm ndu' mi bo tshab a tswe mba lem nà.

¹² Ndu' tshwèt nshùmte miag mi, mbùn fôg nsô mi fa.

¹³ Zabulon nsi tswe num nkaṅ dibantse, a nsi ke zinte ntùm ba sitima, ze ndù nèn tà nkum nze Sidon.

¹⁴ Isakar b'a kekwèn ndù a dunte, z'a nô netèt nka' nyàm bàa là;

¹⁵ a yen ndù nefite be mebwô, mba ndù ngô bwô; a shù mvèn i nekwé lèt bwe, ntù' nkuan, nke mfa' njôgmasi.

¹⁶ Dan nsi tô ze nzwit mèn. Nzwit Dan b'a be mo' nzwit bon Israél.

¹⁷ Dan nsi be nyu num manze, mbe swenyu num ntshagnze; a nsi ke tshôg tunku nyàmdiaṅ ze ngako' i nsi tum tam nsi njam njam nà!

¹⁸ Tshùaben me ke nywint'a num yôg s'a fe wù là.

¹⁹ Gad, ba fimntshu nsi lam i bume. Là, tu wul i nsi tam njam bo yoṅ yube.

²⁰ Aser, a nsi ke dù' jujù mebwô. A yi bèn ke fà jujù fenfen.

²¹ Néftali, b'a kwinyàm se be mèn ke ta' i ngom nà. A be mbwe shutnyàm. A be ntshob ntshob ntùn.

²² Yosèf b'a metob tù num ta' tù, metob tù num ta' tù s'a kaṅ ntse là. Nkaṅ mi be nku'u, nsag nèn tù tà ntôg kum kàbngô.

²³ Bo kamt'é, bo tam i nkô, ghama' nkét bàn i tà miagte;

²⁴ là ngoṅkél i ke' yab nsi, neta ke mi num mbu mi; yen nà fe à Nsi neta Yakob yen nà b'a num lén Ngabéb mbwe z'a be ghuloṅ Israél là.

²⁵ Yen nà fe à Nsi tàan. A bwô ndù a ywimt'o! Yen nà fe a Nganeta Tshùate z'a yab kàn wù, lèn kàn z'a fe mfe tù, lèn kàn s'a ko' mà ntùm ntse, lèn kàn s'a tum ntùm mbùn mi a tum mum mbùn màm nà!

²⁶ Kàn se tàan yab ntù o là tshùa mbat ts'a tswe matmat là boa nkônga mi a be mbwembwe là. A bwô ndù njoṅ men mfu' là fa be Yosèf, yi ze mbom na' ntsho' i netèt fèt tse là.

²⁷ Benjamin b'a nzwimàntô z'a be nsé'te là; a be mbe nkebnjù mfèt nyàm z'a ghom nà; nke ngabte ntsha' ntsho tà nkum mfetnjù.

Mba Yakob kwù là

²⁸ Tshù tunndà Israél tse ntshob bàa gham nà. A b'a ju ze tà yub na' ntshob bo ndùs'a ke njab kàn bo là. A yab kàn bo, njab mba se kàn wù lo tù' i.

²⁹ A tshob nu bo, ntshob ndù: Bin nsi lo' àm nèn tshoṅ mbaṅ nzwit yag: Bin tshoṅ àm ntùm fi, mbaṅ tà tshàm, ntùm ngabloṅ z'a be ntùm fèn Efron ze Hétia là.

³⁰ Ngabloṅ nà b'a mà fèn z'a Makpéla, mbwe Mamré ntùm ngô Kanaan, fèn ze Abraham na' njun Efron, ze Hétia, num neghù dù' tufi sob yi là.

³¹ Bo tshoṅ Abraham mba nzwi i Sara à bwe; bo tshoṅ Isak mba nzwi i Rébéka à bwe; me lo bèn ntshoṅ Léa à bwe.

³² Bo na' njun fèn mba ngabloṅ z'a be bwe l'a ba Hétia.

³³ Ndùse Yakob miagte netshob nu nshumnshum tse là, a lo' nku mi mbèn yi num kunndà, zwiag se keb, bo lo' i nèn ntshoṅ mbaṅ tà tse.