Neto'te 45 - NTSHOB NSI

Yosèf ghù bo lèn i

¹ Ndùlala Yosèf ke bèn nku'ni netshùb ntù i mbwe njoṅ tse ben fa tse boa bo be là, a kua' ntshob ndù: Bin ghù njoṅ benntùn fa lo mbaṅ àm; sàm mèn ke bèn ntù' mbaṅ Yosèf ndùs'a ke nda'te wul i fèt tse là;

² a tshag nz'é tù, nkua'a, njoṅ ba Egipto fa ju', kà tshô i nèn nkum ntshwèt Faraon.

³ Yosèf tshob fèt tse ndù: Me b'a Yosèf, tàa ke' à ntùn ké? Fèt tse ke ku'ni nebùnte yi, nummbe tu yub lo tshu'u, mba bo bèn njen i là.

⁴ Ndùlala Yosèf tshob fèt tse ndù: Bin kù'te nse' mbaṅ àm, bo kù'te nèn mbaṅ i. A tshob ndù: Me b'a Yosèf, mfèt zin ze bin na' nswèn mà Egipto là.

⁵ Là ndonni kà bin nywin ke bèn nja ntù mba bin na' nswèn àm ndù bo se' me nsen ni là, nummbe Nsi na' ntum àm mbwe bin à ndù me yôg zine.

⁶ Tshù, a ndonni ngu'njù bàa mba nziku' se ka mum ngô là, a nke ntù' ngu'njù tàn ze fa' nedù' tsha' bo netsho' tshu ke nsi be là.

⁷ Nsi lo tum àm mbwe bin ndù me ghù bin tswe ntùm ngô, mba ndù me tshùa njam netshu' ze ndùb njôg zine.

⁸ Ndùlala, a ke b'a bin na' ntum àm nsen ni, là Nsi. A lo yab àm mba tà Faraon nà, mba tshùaben tunndà i là, mba ngomna là ntùm njoṅ ngô Egipto fa.

⁹ Bin nànte nko' nèn mbaṅ tàa. Bin nsi tshob yi ndù: Tshù mba nshum o Yosèf tshob li: Nsi yab àm mba tshùaben njoṅ ngô Egipto fa là; swe' nse' mbaṅ àm, kà tsin!

¹⁰ O nsi tswe mum ngô Gosen, dù' z'o nsi ghebte mbaṅ àm nà, tu wul o, bon tsho tse bandum, nyàm tsho tse nke'nke' boa tse ndùbndùb, boa njoṅ tshu fa ts'a b'a tsho là.

¹¹ O nsi be bwe, me ke ntomt'o, nummbe ngu'njù nziku' ke' à tàn, ndùlala ndù k'o bwoṅ, tu wul o, tunndà mba njoṅ tshu fa ts'a b'a tsho là.

¹² Tu wut tsin lo' kua' miag min njen yi, mba mfèl àm Benjamin yen ndù a kua' tu wul àm ke ntshob bin.

¹³ Bin soṅ tàa njoṅ ghamte fa ze me be ntùm bwe mà Egipto là, mba njoṅ tshu fa tse tu wut tsin yen nà; bin nànte ndo' tàa nse' yi nsen ni.

Bo tsiaṅ Yakob mà Egipto

¹⁴ Yosèf tsho' ngwù num tô mfèl i Benjamin ntu tshob bàa fa tate nke nkua'a.

¹⁵ Yen ni be tôge, a tate njoṅ fèt tse fa, tsiag yub nke nkua'a. Yen ni be tshùa boa fèt tse tshobte.

¹⁶ Tshô zin nkum ntshwèt Faraon ndù fèt Yosèf se'e! Yen nu là bwô Faraon be ndaṅndaṅ mb'a bwô ghafa' tse là.

¹⁷ Faraon tshob Yosèf ndù: Tshob fèt tsho ndù bo kut tshu num ba nyàm, mbèn njam ngô Kanaan.

¹⁸ Tshob bo ndù bo mbe se' bo lo' tà yub, tunndà tshobe nse' mbaṅ àm, me nsi fà dù' tsha' ntùn z'a Egipto là bo, bo tete bwe, nke njù nzit ngô.

¹⁹ Tshob bo yu tu wut ndù bo lo' nkalig Egipto num bon tshob mba zwi tshobe, mbèn nket tà yub mbèn njam nsen ni.

²⁰ Kà miag min ghe'te ju ze bin faṅ njam nà, nummbe njoṅ ju mebwô fa ntùm ngô Egipto nsi be zine.

²¹ Bon Israél ghù ndùlala. Yosèf fà nkalig bo mba Faraon tshob là, mfà mba jujù nze bo.

²² A fà nzwe nebate mo' yi mba we lo, là mfà nkàb nkù tat bo nzwe nebate mo' yi Benjamin tàn.

²³ Yosèf tum kekwèn tàab gham ndù bo ket mbwômbwô tshu ts'a Egipto là, mba zwi kekwèn gham ndù bo ket nsa, ngefele bo jujù nze tàab.

²⁴ A lé'te fèt tse bo nèn, a tshob bo ndù: Kà bin kam ntanta num manze.

²⁵ Bo lo mà Egipto nko' nèn nkum ngô Kanaan mbaṅ tà yub Yakob.

²⁶ Bo soṅ i ntshob ndù: Yosèf b'a ntùn, a bèn mbe ngomna ntùm njoṅ ngô Egipto fa! Ndùlala ntù Yakob tum, nummb'a lo ke ke mbam ju bo tshwèt ntshob là.

²⁷ Là, bo soṅ i njoṅ ntshob fa mi Yosèf tshob bo là, tu wul i bèn njen nkalig mi Yosèf tum a se' nkel i là; yen ngelaṅ nà ntù tà yub Yakob bèn nto' netame.

²⁸ Israél tshob ndù: A ku'u! Mén àm Yosèf ke' ntùn, m'a' nèn nte lag num i kà nkwù.