Neto'te 43 - NTSHOB NSI

Benjamin boa fèt tse nèn Egipto

¹ Nziku' lo ke nta ntùm ngô nke nèn à be mbwe.

² Ndùlala, ndùse bo miagte nejù nsa mi bo fe yi Egipto là, tà yub tshob bo ndù: Bin bèn nèn njun mo' jujù be.

³ Là Yuda tshob yi ndù: Yen mandum nà lo tshob bag nsaṅlaṅ bwe ndù: A be ze bin ke' lo' mfèt zin nse' yi là, mba bin ke nsi te lag num se àm.

⁴ A be z'o tum yag bag à mfèt yag là, mba bag nsi swe'e, nummbe mandum nà lo tshob bag ndù: A be ze bin ke' lo' mfèt zin nse' yi là, mba bin ke nsi te lag num se àm.

⁵ A be z'o ke' tum yag à bag à bo là, mba bag ke nsi swe'e, nummbe mandum nà lo tshob bag ndù: A be ze bin ke' lo' mfèt zin nse' yi là, mba bin ke nsi te lag num àm.

⁶ Israél tshob ndù: Bin lo ngù nu num àm ntshob mandum nà ndù mo' mfèt zin ke' bwe numke?

⁷ Bo bùnte ndù: Mandum nà lo bètte yag nu yàme mfà num tu wut tshag mba mum ngô yage, ntshob ndù: Tà zin bèn nke' ntùn ké? Bin ghù mo' mfèt zin ké? Ndùlala bag soṅ i nu à ndaṅndaṅ mb'a ke ndo' mbètte yag nu yi là. Bag lo ghù nelèn ndù a nsi tshob bag ndù bag lo' mfèt yag nse' yi ké?

⁸ Yuda tshob tàab Israél ndù: Tum ménnshum bag lo nsi bag à bo nène, ndù be yôge, ke kwù, wù mba bon bon tshage!

⁹ Me bèn ndo' wul àm nte tshwèt yi num tu i, o nsi bètt'é kua' me. A be ze me ke' lo' i nse' nte mbwe o là, mba me nsi be ngafànnu mbwe o matmat.

¹⁰ Nummbe be lo mbe ke ke me'te nu ts'a neme'te mba bag à nèn ndonni mba yoṅ bàa kà mfe.

¹¹ Tà yub Israél tshob bo ndù: Mb'a be ndùlala là, tshù ju ze bin ghù li: Bin ma' bon tshu ngô tse ntùn mbàm mine, ntsho mfà nda' yi yen mandum nà: Zin, ṅwa'a, mfèt nelamte, mire, nze' mba mba.

¹² Bin lo' njoṅ nkàb z'a bwô nelo' là nze bàa. Mo' ndù bin tsho mfà nkàb ze bo yab ntshu mbàm min nà. A nsi be ndù bo nefànte.

¹³ Bin lo' mfèt zin, ndo nsi mbèn mbaṅ yen mandum nà.

¹⁴ A bwô ndù Nsi Nganeta ghù ndù yen mandum nà ko ndèn mine, mfaṅ bin à mo' mfèt zin fe mba Benjamin! Mbe se' mba tu wul àm nà, a be ze m'a ke mbi bon tshàm nà, mba m'a' ke mbi yub be!

Yosèf jù jujù boa fèt tse

¹⁵ Bo lo' nda', ndo' nkàb njoṅ z'a ku' là yoṅ bàa, ndo' Benjamin, ndo nswe' nèn mà Egipto, nèn mbwe Yosèf.

¹⁶ Ndùse Yosèf yoṅ njen yub boa Benjamin nà, a tshob ze ngalôte ndà ndù: Ghù tshen ben ni tsho ndà. Ghù bo zwi ta' nyàm, nabt'é na, nummbe bag à tshen ben ni bèn jù jujù mbwôgtshù.

¹⁷ Yen mandum nà ghù mba Yosèf tshob là, ndo' tshen ben nà nèn yi ndà Yosèf.

¹⁸ Ngelaṅ bo lo' yub nèn yi ndà Yosèf là, bo bwôg neshu, ntshob ndù: A b'a num nu nkàb ze bo na' mba' be mo' yoṅ i, njab mum mbàm be là, bo lo' be nèn yi à num bwe; bo a' vù num be.

¹⁹ Bo kù'te nèn mbaṅ ngalôte ndà Yosèf, ntshobte bo à bo nzendà.

²⁰ Bo tshob ndù: Tshùaben àm, ju' mba me tshob wù là, bag lo à se' jun jujù mo' yoṅ i nsen ni.

²¹ Ndùse bag zin nkum dù' bag zi là, bag gha' mbàm mage; mba we lo tèt ze nkàb ntshu bàm i, a b'a kua' njoṅ i. Bag lo' yen nkàb là nse' yi.

²² Bag bèn ndo' mba mo' nkàb nse' yi nejun jujù yi. Bag ke' lèn mèn z'a na' njab nkàb ntùm mbàm mag là.

²³ Ngalôte ndà bùnte ndù: A bwô ndù fite be bin! Kà bin bwôg sàm ju. A Nsi, Nsi tà zin bèn mfà junkàb ntùm mbàm mine. Nkàb zin lo se' tà nkum bu àm. A lo' Siméon nse' mfà bo.

²⁴ Yen mandum nà ghù bo tsho ndà Yosèf, a fà ntse bo, bo sôg nku mub yi, a bèn mfà mba nenà kekwèn tshobe.

²⁵ Bo be béb mba Yosèf se' njagnyam nà, nabte nda' ze bo se' yi là, nummbe bo lo soṅ yub ndù boa Yosèf bèn jù jujù la' i.

²⁶ Ndùse Yosèf bèn ndà là, bo fà nda' ze bo se' yi là yi, ngwù nsi mbwe i num tsha' kabkab.

²⁷ A bètte yub mbe bo tswe ntùn nà, ntshob ndù: Njwèn tà zin bin na' ntshob là num mebwô à? A ke' ntùn ké?

²⁸ Bo bùnte ndù: Ngafa' o tà yag tswe mebwô; a ke' à ntùn. Bo bèn wut tshob nsi, nkwim ntunkekwi' mub nsi.

²⁹ Yosèf bù' miag mi nte num Benjamin, mfèl i, nshummàab, ntshob ndù: A b'a kebatnjab, mfèt zin mbit bin na' ntshob me li ké? Yosèf bèn ntshob ndù: Nshum àm, a bwô ndù Nsi yab kàn wù.

³⁰ Yosèf nànte netume, nummbe ntù i lo tume, ntsenyà ghebte miag i: A tsho ntùm to'ndà i, ntswe bwe nkua'a.

³¹ Ndùs'a sôg se i là, a bèn ntum nse'e, ngom wul i, ntshob ndù bo te jujù.

³² Bo te ze jujù tù' i, nte ze fèt tse tù' bo, mbèn nte ze ba Egipto bo ke njù jujù ndà là tù' bo, nummbe ba Egipto ke' ku'ni netamte njù jujù boa ba Héber. Yen nà ke' be bwô yube.

³³ Fèt Yosèf lo tswete mbwe i, mba we lo num ze dù', nto' num ntshùambwe nèn nkum num kebatnjab; bo nke ndôte wut tshob bo bo num netshàme.

³⁴ A ghù bo lo' jujù num ze mfà bo, mfà ze Benjamin a tshùa ze njoṅ yub fa yoṅ tse tàn. Bo à bo nu tshob yàme, ṅwate tshob ntùm bwe.