Neto'te 40 - NTSHOB NSI

¹ Tshen nu là lo be tôge, ngama' ndu' mfen Egipto bo ngana bàn i fàn nu mbwe tàfa' yub mfen Egipto.

² Faraon ya ntù tshen ghafa' bàa li, mfen ghama' ndu' bo mfen ghana bàn.

³ A ghù bo ghom yub ma' ndà, la' mfen ghabéb ntshwèt, ntùm ndàtsha dù' ze bo fùn Yosèf bwe là.

⁴ Mfen ghabéb ntshwèt, fà yub Yosèf ndù a ke mfa' bo; bo tswe ntùm ndàtsha mo' mén ngelaṅ.

Yosèf bagte njem ghandàtsha bàa

⁵ A be mo' tèttswe', ntu tshob bàa fa, ngama' ndu' bo ngana bàn mfen Egipto, zi njem ntùm ndàtsha dù' ze bo fùn yub là; mba we lo ghù ze lèn njem, mbagte ntun mi ke be ju ntshù'.

⁶ Yosèf nèn mbaṅ bo nkebnjù lôte yube, mbe tèt yub bo nke ntshù kebwô.

⁷ Ndùlala, a bètte tshen ghafa' Faraon nà tse bo à bo be ntùm ndàtsha tàfa' i là, ntshob ndù: Numke bin nke ntshù kebwô sènni à?

⁸ Bo bùnte yi ndù: Mba we lo netèt bag zi njem, mèn z'a tote ntun mi bag là ke be. Yosèf tshob bo ndù: A ke b'a nda' Nsi bèn nke ntote njem ké? Bin soṅ àm njem zin di!

⁹ Mfen ghama' ndu' soṅ Yosèf ze njem ntshob ndù: Tshù, me lo njen mo' tù ndu' mbwe àm ntùm njem; sen tù ndu' là ghù nkaṅ mi ntat.

¹⁰ Ngelaṅ z'a te' là, a sàm, nsàm mi gha'te, mfà tsha tse, a tswe.

¹¹ Ndô Faraon lo mbe ntùm mbu màm, me lo' ntàm tù ndu' nyi naṅ ntùm ndô Faraon, mfà ndô ntùm mbu mi.

¹² Yosèf tshob yi ndù: Tshù mbagte ntun mi li. Nkaṅ tù ntat b'a lé'njù tat.

¹³ A tù' lé'njù tat Faraon bèn mbù' o tù, njab o num fa' so; o nsi bèn fà ndô ntùm mbu mi mb'a na' mbe matnu wù, ndùs'o na' mbe ngama' ndu' i là.

¹⁴ Là, kwimt'àm ngelaṅ z'o nsi tswe mebwô là; me le't'o la'te bwôntù num àm; tshob nu ntùn num àm mbwe Faraon, ngù me tum ntùm yen ndà li.

¹⁵ Tshù, bo na' ndo' àm à ntùm ngô ba Héber, mba nsen ni bo ma' àm ndàtsha ke be ndù me ghù sàm ju.

¹⁶ Mfen ghana bàn be yen mba Yosèf bagte ntun njem mebwô là, ntshob ndù: Tshù, me lo yen yàm nkesoṅ bàn ntat tu àm, ndù bàn nefôg be ntùm bwe.

¹⁷ Bon nzenze jujù Faraon tse bo kate là lo be ntùm kesoṅ s'a be num tù là. Bon nsaṅ se' njù njoṅ i fa be num tu àm.

¹⁸ Yosèf bùnte ntshob ndù: Tshù mbagte ntun mi li: Nkesoṅ bàn ntat b'a lé'njù tat.

¹⁹ A tù' lé'njù tat, Faraon ghù bo tsho' tu o, a ghù bo taṅ wul o num mo' tù, bon nsaṅ se' mfèt mbàb o.

²⁰ A lo be mbatte lé'njù tat, lé'njù se bo bwe Faraon nà be, a jù jùa boa njoṅ ghafa' tse fa; a bù' mfen ghama' ndu' tù mba mfen ghana bàn netèt ghafa' tse:

²¹ A yab mfen ghama' ndu' num fa' nema' ndu' ndù a ke mfà ndô mum mbu Faraon.

²² Là ngù bo taṅ mfen ghana bàn tù, ndaṅndaṅ mba Yosèf tote ntun njem bo là.

²³ Mfen ghama' ndu' tsho ndag Yosèf, ke bèn nekwimt'é tse.