Neto'te 4 - NTSHOB NSI

Kaïn bo Abél

¹ Mandum lo' nzwi i Eva, a lét, mbwe Kaïn. Ndùlala mènnzwi tshob ndù: Tshùaben ywimt'àm, me ghù ta' mén mandum.

² A bèn mbwe mba Abél, mfèt Kaïn. Abél be ngabéb bon nyàm nke'nke'e, Kaïn nke ndù' tsha'a.

³ Ngelaṅ nke ntôge. A be mo' lé'njù Kaïn lo' ntàm fa' mi a tum mum tsha' là nèn yi mbwe Tshùaben, ndo' ngù ze ju bwôntù yi.

⁴ Abél num ze bag i, fà mbwe bon nyàm tse, mfà mba kua' nzit mube. Ndùlala Tshùaben bam Abél mba ze ju bwôntù.

⁵ Là Tshùaben ke bam Kaïn, mba ze ju bwôntù. Ntù Kaïn ya neshu, se i tshùaṅ.

⁶ Tshùaben tshob Kaïn ndù: Numk'o nja ntù se o bèn ntshùaṅ à?

⁷ O lo ngù mebwô mb'o ke' bù' tu o tù ké? L'a be z'o ke' ghù mebwô là, mba nukebwô ke là nzendà ndù a nô bwe ké? A tshwèt nkwabt'o, a bwô ndù o tô i.

⁸ Mba ndùlala Kaïn tshob mfèl i Abél ndù: Be nène; ndùlala ndùse bo yi be mà tshwèt là, Kaïn tsho' ngwù num mfèl i Abél, nzwi i.

⁹ Tshùaben bètte Kaïn ndù: Mfèl o Abél b'a yà? A bùnte ndù: Me ke' lèn tshàm. Me b'a ngalôte mfèl àm ké?

¹⁰ Tshùaben bèn mbètte ndù: Ke z'o lo ghù à? Ju'u, lem mfèl o kua' num nsitsha'a nse' nkum mbwe àm ndù me yagte mba'a.

¹¹ Ndonni ndon num tu o num dù' tsha' z'a nu lem mfèl o tse bu o fètte là.

¹² O nsi ke dù' tsha'a, a ke bèn mfà fu' se wù. O nsi ke zine, be tshakendà num nsitsha'a.

¹³ Kaïn tshob Tshùaben ndù: Yàm vù ntsha zi neshu, me ke ku'ni nefènte.

¹⁴ O ta' àm num yen nsitsha' li sènni; me nsi lem tà ngùanesà num miag mu, me nsi zine, be tshakendà num nsitsha'a, mèn z'a yen àm nà zwi àm.

¹⁵ Tshùaben tshob yi ndù: Nga, a be ze mèn zwi Kaïn là, mba me nsi yagte mba' Kaïn yoṅ sammbàa. Tshùaben yab keki num Kaïn ndù mèn z'a yen i là k'a zwi i.

¹⁶ Ndùlala Kaïn lo mbwe Tshùaben nèn nke ntswe ngô Nod nze bag nka' Edèn z'a ke ntshù bag ntumnyam nà.

Nkùndà Kaïn

¹⁷ Kaïn lo' nzwi i, a lét, mbwe Hénok. Kaïn kut ngô, njab lén ngô num se mén i ndù Hénok.

¹⁸ Hénok bwe Irad, Irad bwe Mehujael, Mehujael bwe Metushael, Metushael bwe Lemek.

¹⁹ Lemek so bènnzwi bàa: Lén mbwe i be Ada, lén mbatt'é be Tsila.

²⁰ Ada bwe Yabal: A b'a tànjam njoṅ benntùn fa bo be ntswe ntùm ntàb, mbaṅ bwoṅ nyàm nà.

²¹ Lén mfèl i b'a Yubal: A b'a tànjam njoṅ benntùn fa bo be mbu' loṅe, nke ntô medub là.

²² Tsila bwe ze Tubal-Kaïn: A b'a tànjam njoṅ tàlàm fa tse bo be ntswe tùn kwaba mba tùn nà; Naama b'a mfèt Tubal-Kaïn ze mènnzwi.

²³ Lemek tshob zwi tse, Ada bo Tsila ndù: Bin ju' nz'àm me zwi Lemek, bin kù' ntoṅ num ntshob màm: Mèn lab àm mba m'a' zwi ta' mèn, nzwi ta' mônke' num ta' mfaṅe.

²⁴ Yen nà b'a ndù bo nsi yagte mba' Kaïn yoṅ sammbàa, là yagte mba' Lemek yoṅ ntshob sammbàa ṅam sammbàa.

²⁵ Adam lo' nzwi i Eva, a bwe mén mandum. Eva tshob ndù: Nsi bèn mfà mo' mén mandum me num dù' Abél ze Kaïn zwi i là. Ndùlala, a tswi lén se ndù Set.

²⁶ Set bwe ze mén mandum, ntswi lén se ndù Enosh. Bo to' netsiaṅ lén Tshùaben à num yen ngelaṅ nà.