Neto'te 38 - NTSHOB NSI

Yuda bo Tamar

¹ A lo be yen ngelaṅ nà Yuda fagte boa fèt tse, nswe' nèn la' mo' ze Adullam, lén se Hira.

² Yuda tsho bwe, njen ngon mo' ze Kanaan lén se Shua; Yuda so ngon nà, ndo' i.

³ A be jùm, mbwe mén mandum, bo tswi lén se ndù Er.

⁴ A bèn njùme, mbwe mén mandum, ntswi lén se ndù Onan.

⁵ A bèn jùm mo' yoṅ i, mbwe mén mandum, ntswi lén se ndù Shéla. Yuda na' mb'a Kezib ndùse nzwi i bwe Shéla là.

⁶ Yuda diag nzwi tuswe i Er, lén se Tamar.

⁷ Er tuswe Yuda lo b'a mèn kebwô num miag Tshùaben; Tshùaben ghù a kwù.

⁸ Ndùlala Yuda tshob Onan ndù: So nzwi mfèl o, ndo' i mb'o b'a mfèt ndu i là, mbwe ta' mén bin yi, ndo' ngù tunndà mfèl o yi.

⁹ Là, Onan na' lèn ndù a bwe mén bo nzwi mfèl i mba bo ke yen i mba ze là. Ndùlala njoṅ ngelaṅ fa z'a lo' nzwi mfèl i là, a ghù ntse wut mi fètt'a nsi ndù k'a bwe mén ngù tunndà mfèl i yi.

¹⁰ Ju z'a ke ngù là bag num miag Tshùaben, a ghù mba yi kwù.

¹¹ Ndùlala Yuda tshob nzwi mén i Tamar ndù: Bèn ndà tàan ntswe mbe mfôg bwe, tà nkum ndùse nshum àm Shéla be ndùb là. A tshob ndùlili à nummb'a lo ke mbwôg ndù kà Shéla kwù mba fèt tse là. Tamar nèn nke ntswe ndà tàab.

¹² A lo be tshùa tsemo' lé'njù, ngon Shua, nzwi Yuda kwù. Ngelaṅ ze bo fite ntù Yuda là, a ko' nèn Timna, mbaṅ ghakebte nyiaṅ njùmbwe tse bo nshum i Hira ze Adullam.

¹³ Bo soṅ Tamar, ntshob yi ndù: Tshù tà ndu o là z'a nèn kebte nyiaṅ njùmbwe tse Timna là.

¹⁴ Ndùlala, a sô nzwe mfôg num i, ndam wul i kam nzwe, mbomte se i, ntswe ntshu ngô Enaim, num manze z'a nèn Timna là. A ghù ndùlal'a nummb'a lo yen ndù Shéla ku'u, bo ke fà i yi ndù a be nzwi i.

¹⁵ Yuda yen i, nke ntsiaṅ kattù mènnzwi, nummb'a lo bomte se i.

¹⁶ A kù'te nèn mbaṅ i num manze, ntshob ndù: Bam ndù be be. Nummb'a lo ke lèn ndù a b'a nzwi mén i. A tshob ndù: Ke z'o nsi fà me kà be be à?

¹⁷ A bùnte ndù: Me nsi lo' mén mbwe num mbwe tshàm tum wù. A tshob Yuda ndù: O nsi yab tshwèt, tà kum ndùs'o tum i me là.

¹⁸ Yuda bùnte ndù: Ke ze me fà wù mba ju tshwèt l'à? A bùnte ndù: Fà mbwô mu me, mfà ntàmtu' mba kôg s'a bu o là me. Yuda fà tshen tshu li yi, ndo' i, a be jùm.

¹⁹ A lo nsi mbù' kam nzwe se i, mbèn ma' nzwe mfôg tse num i nène.

²⁰ Yuda tum mén mbwe nshum i ze Adullam, ndù a nèn mfà mènnzwi là, nkwé tshu tshwèt nse' mfà yi. Là, a nèn ke yen i.

²¹ A bètte ba la' ntshob ndù: Kattù mènnzwi z'a ke ntsin num manze Enaim nà yà? Bo bùnte, ntshob yi ndù: Sàm kattù mènnzwi ke' to' be nsen ni.

²² A bèn njam mbaṅ Yuda, ntshob yi ndù: Me ke' yen mènnzwi là, ba la' bèn ntshob me ndù kattù mènnzwi ke' to' be la' bo.

²³ Yuda tshob ndù: A lo' ju z'a ghù là! A ke' bwô ndù be ghù bo wag be. Tshù là, me tum mén mbwe yi, o tsho ke yen i.

²⁴ A lo be tshùa nguan ṅwù tat, bo se' ntshob Yuda ndù Tamar, nzwi mén i kat, ntshùa njam kal i tà njùm mba nejùme. Yuda tshob ndù: Bin lo' i ntum yi nèn nton i.

²⁵ Ndùse bo ke ndo' i ntum yi là, a ghù bo tshob tà ndu i ndù: Mènntùn ze tshen tshu li be tse là bèn ngù kà me jùm; me le't'o ndù o lôte, ndèn mènntùn ze men mbwô li, men ntàmtu' li bo sen kôg li be tshu tse là.

²⁶ Yuda lèn tshen tshu là, ntshob ndù: Ze nefàn ke' ta mba yàm nà, nummbe me lo ke fà i nshum àm Shéla. Yuda ke bèn nelo' i.

²⁷ Ndùs'a ke mbwe là, bo yen ndù a ghù bonfag bam i.

²⁸ A be bwe mo' ta' mén tshag bu i njù, ngakwé mén tshùb, ntaṅ nkù meba bwe, ntshob ndù: Yen mén ni bèn mbwôg tum.

²⁹ Là, a fiag bu i mbèn yi njam, mfèl i tum. Ndùlala ngakwé mén tshob ndù: O to yu nz'à yà? A yab lén mén ndù Péréts.

³⁰ Mfèl i z'a ghù nkù meba num bu i là yôg ntum ze, bo yab lén se ndù Zérak.