Neto'te 37 - NTSHOB NSI

Njem tse Yosèf na' njen na'

¹ Yakob tswe ntùm ngô Kanaan, dù' ze tàab na' ntswe là.

² Tshù tunndà Yakob li: Yosèf lo ghù ngu'njù ntshob sammbàa gham, nke mbéb nyàm tàab boa fèt tse, tse bo b'a bon Bila bo Zilpa zwi tàab là. Yosèf nke nsoṅ tàab bon tshu kebwô tse fèt tse ke ngù là.

³ Israél nke nkô Yosèf ntshùa tsemo' nshumnshum tse, nummb'a lo be bwe Yosèf ndù a ywène. A tam mo' kum yi ndù bo ṅwa' i neshu.

⁴ Fèt tse be yen mba tà yub ke nkô i ntshùa njoṅ yub fa là, nto' nebàn i. Bo ke bèn ndo' ntù nkôni ntshob nu yi yi.

⁵ Yosèf zi njem, nsoṅ fèt tse, bo bèn mbàn i neshu.

⁶ A tshob bo ndù: Bin ju' me soṅ zin njem ze me yen nà.

⁷ Bag bin lo ke nkut mbèn mà tshwèt, sàm bèn lo tsin tù, min diaṅ àm mbume, ngwùte nsi mbwe i.

⁸ Fèt tse tshob yi ndù: O nsi ghù sa' yag ké? Ndù o nsi ghù tô yag ké? Bo bèn mbàn i mo' yoṅ i num njem tse, mba num ntshob mi.

⁹ A bèn nzi mo' njem, nsoṅ fèt tse. A tshob ndù: Me bèn nzi mo' njem! Njen ndù lagnyam, maṅwù boa nsa ntshob ntshù' gham vùte nsi mbwe àm.

¹⁰ A soṅ tàab boa fèt tse. Tàab tshobt'é, ntshob yi ndù: Yen njem z'o yen nà bagt'a ndùke? Ndù a bwô ndù me, màan mba fèt tsho, bag se' ngwù nsi mbwe o ké?

¹¹ Fèt tse te miag ghe'te num i, mbàn i ntshùate; là tàab yab njoṅ tshen nu là fa ntù i nke nkwimte.

Mba fèt Yosèf swèn i là

¹² Ndùse fèt Yosèf nèn Sikém béb nyàm tà yub bwe là.

¹³ Israél tshob Yosèf ndù: Fèt tsho b'a Sikém mbéb nyàm bwe. Se' me tum o mbaṅ bo.

¹⁴ A bùnte ndù: Tshù me li! Israél tshob yi ndù: Nèn njen mbe ze fèt tsho tswe mebwô, nyàm bèn mbe ntùn nà, o se' nsoṅ àm tshô. Israél tum Yosèf, a lo mà tômbo' Hébron nèn nkum Sikém.

¹⁵ Bo mo' mènntùn bumte ndùs'a ke ntsha mà tshwèt là. A bètt'é ndù: O ke ndiag à ke?

¹⁶ Yosèf bùnte ndù: Me ke ndiag à fèt tshàm, netsho'o, soṅ àm dù' bo tshwèt mbéb nyàm bwe là.

¹⁷ Mènntùn nà tshob yi ndù: Bo lo nsen ni, nummbe me lo ju' bo nke ntshob ndù: Be nèn Dotan. Yosèf bwe fèt tse, ntèt yub mà Dotan.

¹⁸ Bo tsin njen i ngùanesà; a be zin kum mbaṅ bo ndù bo à nabte netèt bo nezwi i.

¹⁹ Bo tshob bo bo ndù: Tshù ngazi njem nà z'a se' là.

²⁰ Ndonni, a bwô ndù be zwi i, ma' fe i ntùm tôntse; be nsi tshob ndù mo' tshùagkèt nyàm ghom i, ntshùa ndùlala njen mba kua' tse njem bagte là.

²¹ Rubèn ju' ndùlala nsô i mum mbu mube. A tshob ndù: Kà be zwi i nezwi.

²² Rubèn tshob bo ndù: Kà be fètte lem, bin ma' i ntùm tôntse s'a kônkwa là, kà bin kab mbu num i. A lo ghù nkwate ntù i nesô i mum mbu mube, ngù a bèn njam mbaṅ tàab.

²³ Ndùse Yosèf kum mbaṅ fèt tse là, bo sô kum se num i, kum se s'a ṅwa' neshu là; a yi na' mbe num i.

²⁴ Bo ghom i ma' ntùm tôntse. Tôntse là lo ke ghù ntse ntùm bwe.

²⁵ Bo tswe nsi nejù jujù, bù' miag mube, njen mo' bwoṅ ba Ismaél bo ke mfe Galad là. Kamél tshob lo ket labinda, mfèt nelamte bo mire tse bo ke nèn yi Egipto là.

²⁶ Ndùlala Yuda tshob fèt tse ndù: Bin i nsi b'a ke be, nezwi mfèt be, mba nelem lem ts'à?

²⁷ Be swèn i ba Ismaél, kà be kab mbu num i, nummb'a mfèt be, mbe lem be. Fèt tse ju' ntshu i.

²⁸ Ndùse ba Madian ghatantàn ke ntôg là, bo sô Yosèf, ngù a ko' ntùm *gi*tôntse; bo swèn i ba Ismaél nkàb ṅam mbàa; bo lo' i nèn yi Egipto.

²⁹ Rubèn bèn njam ntshu tôntse, ke bèn ntèt Yosèf bwe. A fagte nzwe tse.

³⁰ Mbèn njam mbaṅ fèt tse ntshob ndù: Mén ke' bèn mbe mà tôntse. Me nsi ghù tshàm à ndùke?

³¹ Ndùlala bo lo' kum Yosèf, nzwi mén mbwe, nyu' kum ntùm lem tse.

³² Bo tum kum Yosèf s'a ṅwa neshu là tà yub ntshob yi ndù: Tshù ju ze bag yen nà, lôte mbe z'a be kum nshum o là, ke nga lo.

³³ Yakob lèn kum, ntshob ndù: A b'a kum nshum àm, mo' tshùagkèt nyàm ghom i! A kebte Yosèf mfémfé.

³⁴ Yakob fag nzwe tse, nse' bwembwôge; a loṅ vù nshum i ngelaṅ yàme.

³⁵ Bon tse tse bandum boa tse bènnzwi se' mfite ntù i; l'a ke kô fitentù. A nke ntshob ndù: M'a' loṅ nshum àm tà nèn nkum mbaṅ i ntùm ngô fe ben. A nke ndàn nshum i.

³⁶ Ba Madian swèn yub Yosèf mà Egipto, nswèn i Potifar, tàndà ntsho Faraon, mfen ghabéb ntshwèt.