Neto'te 35 - NTSHOB NSI

Yakob tum Sikém nèn Bétél

¹ Nsi tshob Yakob ndù: Lo tù nko' nèn Bétél ntswe bwe; tsho bwe mbom tômbwôg le'te Nsi z'a na' ṅwag wù ndùs'o ke nkù mfèl o Esau là.

² Yakob tshob tunndà i boa njoṅ benntùn fa tse bo à bo be là ndù: Bin sô nsi ghùn ts'a be netèt bin nà, bin lànte wut tsine, mbate nzwe tsine.

³ Bag bin nsi lo ko' nèn Bétél; me nsi tsho bwe bom tômbwôg le'te Nsi z'a na' nju' nz'àm ngelaṅ nge' là; bag yi lo ke mbe num njoṅ ngelaṅ fa me be tshwèt nkatte là.

⁴ Bo fà njoṅ nsi ghùn ts'a be bu bo là Yakob, boa nkwa mi a be ntoṅ bo là. Yakob tshoṅ njoṅ i fa bam térébintô z'a be mbaṅ Sikém nà.

⁵ Ndo bwe nène. Fétwut Nsi sa mum ngô ts'a diaṅ yub mbum nà, kà bo ke ma'ni bon Yakob tse bandum.

⁶ Yakob boa ben tse tse bo à bo be là zin nkum Luz z'a be Bétél, ntùm ngô Kanaan nà.

⁷ A bom tômbwôg le'te bwe, njab lén se ndù El-Bétél, nummb'a b'a bwe là ze Nsi ṅwag yi, ndùs'a ke nkù mfèl i là.

⁸ Débora, nze Rébéka kwù, bo tshoṅ i tun Bétél, bam tshalone, ntsiaṅ sen tshalon nà ndù tshalon ntsenyà.

⁹ Ndùse Yakob fe Padan-Aram nà, Nsi bèn ṅwag yi mo' yoṅ i, njab kàn yi.

¹⁰ Nsi tshob yi ndù: Lén so b'a Yakob; bo ke nsi bèn tsiaṅ o Yakob. Lén so nsi tù' b'a Israél. Nsi tswi lén se ndù Israél.

¹¹ Nsi tshob yi ndù: Me b'a Nsi Nganeta. Bwe bon nzwil o yàme, ta' tumngô boa ngôngô nsi tum num o, fenfen nsi tum zwe' o.

¹² Me nsi fà ngô ze me na' mfà Abraham mba Isak là wù. Me nsi fà yen ngô li nzwil o ngelaṅ z'o nsi kwù là.

¹³ Nsi lo mbaṅ i nèn ngùanesà, ndo num dù' z'a tshob nu yi là.

¹⁴ Yakob te loṅla' bwe, dù' ze Nsi tshob nu yi là, ntete ndoṅ bwe, naṅ ndu' num bwe bo mfèt.

¹⁵ Yakob yab lén dù' ze nsi tshob nu yi bwe là ndù Bétél.

Mba bo bwe Benjamin, Rashél kwù là

¹⁶ Bo lo Bétél. Mekam manze lo be nezin kà nkum Efrata, Rashél bwe. A yen ngùtni ndùs'a ke mbwe là.

¹⁷ Ndùs'a ke nju' ya nebwe là, ngakwé mén tshob yi ndù: Kà bwôg, nummb'o bèn ngù mo' mén mandum!

¹⁸ Mb'a na' nke ntù' nekwù, ntù' à mfe là, a tswi lén mén nà ndù Ben-Oni, là Yakob tswi lén mén i Benjamin. Ben-Oni, mén nge' àm; Benjamin, mén fen sàm.

¹⁹ Rashél kwù, bo tshoṅ i num manze Efrata z'a be Bétléhém sènni là.

²⁰ Yakob te loṅ tufi Rashél. A b'a loṅ tufi Rashél mbit là bèn nke' tà nkum mba sènni.

²¹ Israél lo nèn nte ntàb i yoṅ Migdal-Eder.

²² Ngelaṅ ze Israél ke ntswe ntùm yen dù' là là, Rubèn lo' Bila màndà tàab. Israél lèn yen nu là. Bon Yakob tse bandum lo be ntu ntshob bàa gham.

²³ Tse Léa: Rubèn, tuswe Yakob, Siméon, Lévi, Yuda, Isakar bo Zabulon.

²⁴ Tse Rashél: Yosèf bo Benjamin.

²⁵ Tse Bila, ngafa' Rashél ze mènnzwi: Dan bo Néftali.

²⁶ Tse Zilpa, ngafa' Léa ze mènnzwi Gad bo Aser. Tshù bon Yakob tse bandum ts'a bwe Padan-Aram nà.

²⁷ Yakob zin nkum mbaṅ tàab Isak Mamré ze bo be mbèn ntsiaṅ ndù Kiriat-Arba ke ndù Hébron no là. A b'a dù' ze Abraham mba Isak na' ntswe là.

²⁸ Lé'njù yôg Isak na' mb'a bon bwe'e nkù.

²⁹ A kwù, bo tshoṅ i mbaṅ ze nzwit mèn ndù a ywène, ngu'njù tse yàm neshu; bon tse, Esau bo Yakob tshoṅ i.