Neto'te 34 - NTSHOB NSI

Siméon bo Lévi yagte mba' num mfèt yub ze mènnzwi

¹ Dina ngon ze Léa bwe Yakob là tum neyen bonngon tse bo mum ngô là.

² Sikém nshum Hamor, mfen ntùm ngô yen i. A ghom Dina, nèn ndo' i, mbagt'é.

³ A yab ntù num Dina, ngon Yakob; a kô ménngon nà neshu kà ntam tsham toṅ i.

⁴ Sikém tshob tàab Hamor ndù: Fà ménngon din me, me ghù nzwi àm yi.

⁵ Yakob ju' ndù Sikém lo bagte ngon i Dina; mb'a na' mbe be ndù nshumnshum tse b'a mà tshwèt boa nyàm nà, Yakob mi ntswe tà nkum ndùse bo bèn njam nà.

⁶ Hamor tà Sikém nèn mbaṅ Yakob bo yi tshobte.

⁷ Bon Yakob tse bandum tse bo ke mfe tshwèt là ju' yen nu là; tshen ben ni ya ntù, ngwù ntùm mo' yantù ndùb, nummbe Sikém ghù mo' kebwô num nzwit Israél, mb'a lo' ngon Yakob là; a lo ke bwô ndù yen nu là tum ndùlala.

⁸ Hamor tshob bo ndù: Ntù nshum àm Sikém yab num ngon zin; me le'te zine, bin fà i yi a lo' ngù nzwi i yi.

⁹ Bag bin wat kàn; bin nsi fà tsin ngonngon bag, bèn ke lo' tshage.

¹⁰ Bag bin nsi ke tswe, ngô nsi b'a zine. Bin tswe mum bwe, nzinte nèn mba yà lo, ntete bwe.

¹¹ Sikém tshob tà Dina boa fèt tse ndù: Be bin ko ndèn màm à! Me nsi fà ju ze bin kô là.

¹² Bin tam njoṅ ghu me boa nda' yàme, me nsi fà bin njoṅ ze bin tshob là, ndù bin fà ménngon me, me ghù nzwi àm yi.

¹³ Ndùlala bon Yakob lo' mfù mbùnte nu yi Hamor bo nshum i Sikém, nummb'a lo bagte mfèt yub ze mènnzwi Dina.

¹⁴ Bo tshob ndù: Yen nà b'a ju ze be bag ke ghù là, be bag ke fà mfèt yag ze mènnzwi kesi ket. Mba yen nu là nsi b'a tshabte bag.

¹⁵ Bag nsi bam yen nu là ngelaṅ ze bin tù' zin mba bag là, ndùse bin bam neke nsi ket njoṅ bon fa netèt bin nà.

¹⁶ Mba yen ngelaṅ nà bag nsi ke fà tshag ngonngon bin, bèn lo' tsine, bag bin ke ntswe, ntamte ntù' ta' nzwit ntshù'.

¹⁷ Là, bin be ke kô neju' mba bag tshob là, ngù bo si ket sin mba bag nsi lo' ngon yag tum nèn tshage.

¹⁸ Ntshob mub bwô Hamor bo nshum i Sikém.

¹⁹ Sikém ke ghubte kà ngù mba bo tshob là, nummb'a lo ke nge'te ngon Yakob neshu, mbe ndù bo lo ke nku'ni Sikém ntùm ndà tàab neshu.

²⁰ Hamor bo nshum i Sikém nèn nsém, ntshob njoṅ ba ntùm ngô fa ndù:

²¹ Tshen ben ni b'a fite benntùn num be. A bwô ndù bag bin bo tswe ntùm ngô, bo ke nzinte bwe mba bo kô là, ngô zi kua' mebwô. Be nsi ke so tshob ngonngon, bo bèn nke nso tse be.

²² Là tshen ben nà nsi bam netswe bag bin bo tamte ntù' nzwit mèn ntshù' à ndùse be bam neke nsi ket bon netèt be, ndaṅndaṅ mba yub tu wut be nsi ket là.

²³ Bwoṅ nyàm tshobe, tshu tshobe, boa nyàm tshob fa ke nsi tù' tse be ké? Be bam mba bo tshob là bag bin bo tswe.

²⁴ Njoṅ benntùn fa tse bo se' nsém nà ju' ju ze Hamor bo nshum i Sikém tshob là, njoṅ bon bandum fa tse bo se' nsém nà nsi ket.

²⁵ A lo be kum lé'njù tat mba bo si ket, mfaṅ nke nja yub là, tsemo' bon Yakob bàa, Siméon bo Lévi, fèt Dina, lo' ṅwi ntsho mum ngô, ke bwôg sàm ngùtni, ngwù num bon bandum nzwite yube.

²⁶ Bo zwite yube, nzwi Hamor bo nshum i Sikém, nsô Dina ntùm ndà Sikém, ntum nène.

²⁷ Bon Yakob tsho' mfe mum ngô, nke nja'te num fe ben ndag ngô, nummbe bo lo bagte mfèt yub ze mènnzwi.

²⁸ Bo lo' bwoṅ nyàm tshobe, nyàmna', nkekwène, ndo' ju z'a mum ngô là mba z'a mà tshwèt là.

²⁹ Bo lo' tshu tshobe, bon tshob boa zwi tshobe, ndo' njoṅ tshu fa ts'a be ndà ndà là mba ntsha' ntsho là.

³⁰ Yakob tshob Siméon bo Lévi ndù: Bin lo' nge' ntèl àm yi, ngù me tù' ju kebwô mbwe ba ntùm ngô, ba Kanaan boa ba Férésia. Tshen ben nà nsi tamte ma' àm ntsho biagt'àm, me mba tunndà àm, nummbe me ghù à nda' metsit bwoṅ benntùn.

³¹ Bo bùnte ndù: Ndù bo lo' à mfèt yag ze mènnzwi mba ta' kattù là ké?