Neto'te 33 - NTSHOB NSI

Yakob bumte bo Esau

¹ Yakob bù' miag mi ndôte, mbe yen Esau nke nse' boa benntùn nkù kuà. A ghabte bon netèt Léa, Rashél boa ghafa' tse tse bènnzwi bàa.

² Ndùlala nte ghafa' tse tse bènnzwi bàa mbwe boa bon tshobe, nte Léa boa bon tse njam bo, nte Rashél bo Yosèf njam bo.

³ Mbe se' mba Yakob là, a tshùa mbwe bo, nkwim ntunkekwi' mi nsi yoṅ sammbàa, tà nkum ndùs'a ghebte mbaṅ mfèl i là.

⁴ Là Esau kù nde, mbumte bo Yakob, ntsiag i, ngwù num tô i, ntat'é, ṅwate bo yi.

⁵ Esau bù' miag mi njen bènnzwi boa bon, ntshob ndù: Tshen ben ni b'a ba we wù à? Yakob bùnte ndù: A b'a bon tse Nsi tshàm ndèn nkuan o me yi là.

⁶ Ndùlala ghafa' tse bènnzwi boa bon tshob kù'te, nse' ngwù nsi.

⁷ Léa boa bon tse kù'te nse' ngwù nsi. Mbe miagte, Yosèf bo Rashél kù'te nse' ngwù nsi.

⁸ Esau tshob ndù: Tshen njoṅ bwoṅ tshu bag a bo bumte là b'a numke? Yakob bùnte ndù: A b'a nelo' mbètte kondèn yi tshùaben àm.

⁹ Esau tshob ndù: Mfèl àm, me ghù njoṅ z'a ku' num àm nà. A bwô ndù o lo' kua' yu z'o ghù là.

¹⁰ Là Yakob bùnte ndù: Ke b'a ndùlala. A be z'o ko ndèn màm nà, o bam nda' z'a tum kua' bu àm nà. A ndùlala, mba me yen se o là tswe m'a mba me yen à se Nsi là. Nummb'o lo' àm kua' mebwô.

¹¹ Bam kua' nda' ze me fà wù là. Nsi fà fu' me yàme, me ke' bwoṅ sàm ju. A saṅlaṅ bwe mbwe i, Esau be miagte mbame.

¹² Esau tshob ndù: Be nène! M'a' tshùa mbwe o.

¹³ Yakob tshob yi ndù: Tshùaben àm lèn ndù bônke' fùage, mbèn njen ndù me ghù mbwe boa mfô tse bo tshwèt nyô bon nà. A be me lo' yub nzin yi ta' lé'njù là, mba njoṅ bon nyàm fa nsi kwù.

¹⁴ A bwô ndù tshùaben àm tam mbwe nkuan i, tu wul àm, me nsi ke se' mba me ku'ni là. A bwô ndù me zin à num ze ku ben tse bo be mbwe àm nà, mba num ze ku bônke' boa nyàm tà nkum ndùse me kum la' tshùaben àm, Seir là.

¹⁵ Esau tshob ndù: M'a' faṅ mo' bag benntùn netèt ben tshàm wù! Yakob bùnte ndù: Mb'a kua' numke? A bwô, nda' ndù be tshùaben àm ke faṅ ndùlala ké?

¹⁶ Esau lo be num sen lé'njù là mbèn njam Seir.

¹⁷ Yakob bèn Sukkot. A kut ba' i bwe, nkut ba ntàb num nyàm tse. Tshù ju z'a ghù bo yab lén yen dù' là Sukkot là.

Yakob te la' mbaṅ Sikém

¹⁸ Ndùse Yakob fe Padan-Aram nà, a ṅwag mum ngô Sikém, ntùm ngô Kanaan, nte ntshu ngô.

¹⁹ A jun dù' tsha' z'a te bwe là bon Hamor, tà Sikém, môni nkù.

²⁰ A bom tômbwôg le'te Nsi bwe, njab lén se ndù El-Elohé-Israél, Nsi b'a Nsi Israél.