Neto'te 32 - NTSHOB NSI

Yakob nabte wul i nenèn mbumte bo Esau

¹ Yakob bèn ntam nze, boa ba Angél Nsi bumte.

² Yakob be yen yub ntshob ndù: Yen ni b'a ntshu ntsho Nsi. A yab lén dù' là ndù Mahanaim.

³ Yakob tum benntùn mbwe i, mbaṅ mfèl i Esau, mà Seir, ntùm ngô Edom.

⁴ A tshob bo ndù: Tshù mba bin nsi tshob tshùaben àm Esau li: Nkuan o Yakob tshob ndù a tswe la' Laban, ngô bwe tà nkum ndonni.

⁵ A ghù nyàmna', nkekwène, mbwe, ghafa' tse bandum boa tse bènnzwi; a bèn ntum bo se' nsoṅ o ndù o ko ndèn mi.

⁶ Ben tse Yakob tum nà bèn njam ntshob yi ndù: Bag nèn mbaṅ mfèl o Esau; tshù i là z'a tshwèt nse' bin yi bumte boa benntùn nkù kuà là.

⁷ Yakob ju', mbwôg neshu, wul i fét. A ghabte tse ben nkam mbàa, mbwe, nyàmna' boa kamél, ntshob ntù i ndù.

⁸ A be ze Esau se' ma' mo' kam benntùn ndab yub là, mba kam i z'a tù' là nsi yôg àm.

⁹ Yakob le'te Nsi ntshob ndù: Nsi tàa Abraham, Nsi tàa Isak, wù Tshùaben lo tshob me ndù: Bèn njam ntùm ngô dù' ze bo bwe o là, me nsi ghù mebwô wù!

¹⁰ Me kag neshu num njoṅ mfu' fa mi o fà me, me ze me be nkuan o là. Nummbe me lo dut Yordan bag kôg sàm, ndonni me tshwèt ngabte ben tshàm nkam mbàa.

¹¹ Netsho'o, kwé àm bu mfèl àm, bu Esau! Nummbe me tshwèt mbwôg ndù k'a se' mbiagte yage, ke faṅ mà ke bon no.

¹² Tu wul o lo tshob ndù: Me nsi ghù mebwô wù; me nsi ghù nzwil o be mba nkwango' mi a dibantse là, njàm kà mèn ke ku'ni nesiaṅ yube.

¹³ Yakob na' nzi à yen dù' là. A lo' ju num z'a ghù bu i là, mfà nda' yi mfèl i Esau.

¹⁴ Mbwe nkù bàa ngù mfotmbwe ṅam mbàa.

¹⁵ Zwi kamél ṅam ntat ngù bon tshob tse bo ke' num bùn nà, mfô ṅam nkuà ngù mfot mfô gham; zwi kekwèn ṅam mbàa boa kekwèn gham.

¹⁶ A fà tshen nyàm nà ghafa' tse tse bandum, mba zit tshaṅ nyàm no num ze kam i. A tshob ghafa' tse tse bandum ndù: Bin kwé mbwe me, ke ghù ndù nyàm tamte, mo' kam i ke ntsin ngùanesà num mo'o.

¹⁷ A tshob mbwe i ndù: Ngelaṅ bin mfèl àm Esau bumte, a bètt'o ndù o b'a ze mèn we, o nèn à yà, yen bwoṅ nyàm ni b'a ze we là,

¹⁸ o bùnte ndù: A b'a ze nkuan o Yakob; a b'a nda' z'a tum tshùaben Esau là. Mba kua' tu wul i num njam nke nse'e.

¹⁹ A tshob be ntshob ntshù' mbatte ngafa' bàa, mba ze mbatte tat, boa njoṅ benntùn fa tse bo be njam nyàm nà.

²⁰ Bin nsi tshob ndù: Tshù mba kua' nkuan o Yakob là njam nke nse'e. Nummb'a lo ke ntshob ndù: Me nsi fà tshen tshu a mbwe àm nà yi mba nda' là, lo' fite ntù i yi, kà yôg yen i se se. Be mo' ndù a lo' àm mebwô.

²¹ A tshag nda' mbwe, ntù' ngô mà tshwèt yen tèttswe' là.

Yakob bo Nsi zwe zwe'

²² A lo nsi yen tèttswe' là, ndo' zwi tse bàa boa ghafa' tse tse bènnzwi bàa boa bon tse ntshob ntshù' gham, ngù bo dut Jabbok.

²³ A lo' yube, ngù bo dut fube, boa njoṅ tse tshu fa.

²⁴ Ndùlala Yakob tù' tù' i. Tshù, mo' mèn zwe zwe' bo yi tà nèn nkum mfôgnjù.

²⁵ Yen mèn nà be yen mb'a ke' ghù netshùa Yakob là, ndab fat se, a sete, fat Yakob sete ndùse bo yi ke nzwe zwe' là.

²⁶ Mèn nà tshob ndù: Faṅ me nène, nummbe njù a ke mfoṅe. Là Yakob tshob yi ndù: Me ke nsi faṅ o nène, ke be ndù o yab kàn me.

²⁷ Mèn nà tshob yi ndù: Lén so b'a we? A bùnte ndù: Yakob.

²⁸ Mèn nà bèn ntshob ndù: Lén so ke nsi bèn b'a Yakob, bo nsi tù' ke tsiaṅ o à ndù Israél; nummb'o zwe zwe' bin Nsi mba benntùn, ntshùa yube.

²⁹ Yakob bètt'é ndù: Soṅ àm lén so. A bùnte ndù: O bètte lén sàm numke? A yab kàn Yakob be dù' i.

³⁰ Yakob yab lén dù' là ndù Peniel. Nummb'a lo tshob ndù: Tshù, me yen Nsi se se, mbèn nke nke' njôge.

³¹ Lagnyam be tum a nke ntôg Peniel, nke nke' à neke'e, num fat se s'a sete là.

³² A num ndùlala ze bon Israél ke' be fèt nga z'a be njoṅte fat mèn bo ku i là. Nummbe Nsi na' ndab Yakob a num fat se, num nga yoṅte fat se.