Neto'te 31 - NTSHOB NSI

¹ Yakob ju' nshumnshum Laban nke ntshob ndù a lo' njoṅ tshu tà yub fa. Bo lo ke ntshob ndù: A lo' à tshu tà be kà nzi yi.

² Yakob yen yen nà, mba num se Laban, njen ndù a ke' bèn mbe num i à mb'a be mbwe là.

³ Ndùlala Tshùaben tshob Yakob ndù: Bèn njam mum ngô tà tsho dù' ze bo bwe o là, me nsi be bag wù.

⁴ Yakob ghù bo tsiaṅ Rashél bo Léa ndù bo se' ntèl i mbaṅ mbwe mà tshwèt.

⁵ A tshob bo ndù: Me yen num se tà zin ndù a ke' bèn nebe num àm à mb'a be mbwe là; nda' ndù bag Nsi tàa bèn mbe.

⁶ Tu wut zin lèn mba me na' mfa' yi mum yàm ngù' fa là.

⁷ Mba tà zin lo fùt'àm, mbate yàm nkàbfa' yoṅ tse gham, là Nsi ke bam yi ndù a ghù kebwô num àm.

⁸ A lo ke ntshob ndù: Nyàm nto'nto' nsi be yu nkàbfa', njoṅ njùmbwe fa bwe, bon tshob tum nto'nto'o. Ndùs'a tshob ndù: Nyàm ntshobntshob nsi be yu nkàbfa' là, njoṅ njùmbwe fa bwe, bon tshob tum ntshobntshob.

⁹ Nsi lo' nyàm tà zin mfà me.

¹⁰ Ngelaṅ ze njùmbwe ke mbèt sôg là, me bù' miag màm njen mum njem ndù nkomnjù mi a ke nko' yub là lo b'a ntshobntshob, nto'nto'o, mbàbmbàbe.

¹¹ Angél Nsi tshob me mum njem ndù: Yakob, me bùnte ndù: Tshù me li.

¹² A tshob ndù: Bù' miag mu ndôte njene, njoṅ nkomnjù fa mi bo tshwèt nko' njùmbwe là b'a ntshobntshob, nto'nto'o, mbàbmbàbe; nummbe me yen ju ze Laban ghù wù là.

¹³ Me b'a Nsi z'a ṅwag wù Bétél, dù' z'o na' njo' loṅla' bwe, dù' z'o na' ngù nka'ni me là. Ndonni lo tù, tum ntùm yen ngô li, mbèn njam ntùm ngô ze bo bwe o bwe là.

¹⁴ Rashél bo Léa bùnte Yakob ndù: Bag bèn ngù mo' ju ke ntsi' lo ndà tà yag ké?

¹⁵ Mb'a na' nswèn yage, mfèt nkàb yag là, bag ke' ke mbe num miag mi à mba ghùn nà ké?

¹⁶ Njoṅ junkàb fa ze Nsi sô bu tà yag là b'a ze be mba bon be. Ndonni ghù njoṅ ju fa ze Nsi tshob wù là.

¹⁷ Yakob lo tù, ngù bon tse boa zwi tse ko' num ba kamél.

¹⁸ A lo' njoṅ nyàm tse fa nèn yi, ndo' njoṅ tshu fa ts'a ghù là. Nyàm ts'a be ko' tse, ts'a na' ngù Padan Aram nà, nèn mbaṅ tàab Isak mà Kanaan.

¹⁹ Ndùse Laban nèn kebte nyiaṅ mbwe là, Rashél yi ba neto tàab.

²⁰ Yakob fùte Laban ze Aram, ke tshob yi ndù a' nèn.

²¹ A kù boa njoṅ tshu tse fa; ntam manze nèn ndut ta'ntse Efrat, nèn nze mbaṅ mbat Galad.

²² A be be mbatte lé'njù tat, bo soṅ Laban ndù Yakob kù.

²³ A lo' fèt tse, boa bo yoṅ i lé'njù sammbàa, nkot'é num mbat Galad.

Laban ta' Yakob ngom i

²⁴ Là Nsi ṅwag Laban ze Aram mum njem tèttswe' ntshob yi ndù: Zete netshob mebwô ke kebwô lo num Yakob.

²⁵ Laban kote Yakob. Yakob lo te ze ntàb num mbale; mba Laban te ze ntàb boa fèt tse num mbat Galad.

²⁶ Laban tshob Yakob ndù: Ke z'o ghù ndù à? Numk'o ntatt'àm, ndo' ngonngon tshàm nèn yi mba bo b'a kuan ntsho l'à?

²⁷ Numk'o mbe nèn nke ndemt'àm à? O tatt'àm, nèn ke lé't'àm numke? Mba me lo ghù o lo' à tsiaṅte boa njobkwi nèn yi, mbe nèn nke mbu' ndam, nke mbu' loṅe.

²⁸ O ke' bam ndù me tate bonnkat màm tse bandum boa tse bènnzwi. O ghù à mba nkagni là.

²⁹ Bu àm ku'ni neghù kebwô wù; là Nsi tàan lo ntshob me nkôg ndù: Zete netshob mebwô ke kebwô lo num Yakob.

³⁰ Ndonni, o lo nke nkù ntù num ndà tàan, numk'o ndo mbe nèn nj'é nsi tshàm à?

³¹ Yakob bùnte ntshob Laban ndù: A b'a mbe me lo bwôge, nke ntshob ntù àm ndù b'o kwé ngonngon tsho!

³² Mèn z'o nsi yen nsi tsho yi là ke nsi yôge. Me tshob ndonni ndù o lôte tshu tshàm fa mbwe fèt be, ndo' ju z'a be yu là, a be z'o yen nà. Yakob lo ke lèn ndù Rashél bèn nj'é nsi Laban.

³³ Laban tsho ntùm ntàb Yakob, ntum bwe nèn ntùm ntàb Léa mba ntùm ze ghafa' tse bènnzwi bàa, ke yen sàm ju. Ndùlala, a tum ntsho ntùm ntàb Rashél.

³⁴ Rashél lo lo' ba neto njab bam diaṅ kamél, ntswe num bo. Laban mom njoṅ dù' fa mum ntàb, ke fon sàm ju.

³⁵ Rashél tshob tàab ndù: A ke' bwô ndù tshùaben àm ya ntù me, nummbe ngokèt bènnzwi num num àm. Laban diag, ke yen neto tse.

³⁶ Yakob ya ntù, nkam Laban ntanta, ntshob yi ndù: Yàm kebwô ke mfànnu màm no yà k'o ntsho' ngwù njam àm à?

³⁷ Mb'o mom njoṅ tshu tshàm fa là, ke z'o yen bwe ndù a tum à netèt tshundà tsho à? Tshob njoṅ i fa mbwe fèt tshàm boa fèt tsho, mba bo tshob yub nu num bwe, netèt be ntu bàa.

³⁸ A b'a ngu'njù ṅam mbàa mba me tshwèt mfa' la' o là; njùmbwe tsho, mbwe tsho ke' to' sô bam, me ke to' fèt nkomnjù mi a tum netèt mbwe tsho là.

³⁹ Me lo ke be lo' fe nyàm ze ju ghom i là nse' yi mbwe o. Me lo ke mbat'é be yàm tu, njoṅ i fa o bètte là tum be bu àm, k'a be ndù bo yi à mbwôgtshù ke tèttswe' lo.

⁴⁰ Nyam lo ke mbib àm mbwôgtshù, mfùag ṅùn àm tèttswe'; miaglo lo mi miag àm.

⁴¹ Tshù, a ndonni ngu'njù ṅam mbàa mba me be ntùm ndà o là; me fa' wù ngu'njù ntshob kuà gham num ngonngon tsho bàa, mfa' num bon nyàm tsho ngu'njù ntôge, o bate yàm nkàbfa' yoṅ tse gham.

⁴² Nsi tàa, Nsi Abraham, Ngafétwut ze Isak be mbwôg i là, lo mbe ke be njam àm mb'o ta' àm ndonni mbu ndaṅe. Nsi yen yàm ngùtni bo nge' ze mbu màm yen nà. A lo mbe tèttswe' nkôg nkeb ntsha.

Yakob bo Laban kom kàn

⁴³ Laban bùnte ntshob Yakob ndù: Ngonngon b'a tshàm, nshumnshum be tshàm, bon nyàm boa njoṅ tshu fa ts'o yen nà b'a tshàm. Me nsi ghù ndùke ngonngon tshàm boa bon bandum tse bo bwe l'à?

⁴⁴ Ndonni, se' be wat kàn netèt be, yen nà nsi be kwénta netèt be.

⁴⁵ Yakob lo' loṅ, nte i nsi mba loṅla' là.

⁴⁶ Ntshob fèt tse ndù: Bin tse'te ndoṅ. Bo lo' ndoṅ, nkùmte fèt se, ntswete bwe, njù jujù bwe.

⁴⁷ Laban yab lén se ndù Jegar-Shahaduta, Yakob yab lén se ndù Galed.

⁴⁸ Laban tshob ndù: Sen fèt ndoṅ ni b'a nkwénta netèt be! A ndùlala ze bo yab lén se ndù Galed là.

⁴⁹ Laban bèn njab lén se mba ndù Mitspa, nummbe Laban lo tshob ndù: A bwô Tshùaben ke ndôte be, ngelaṅ be fagte, mèn be ke bèn neyen mfèl i se se là.

⁵⁰ A be z'o ma'ni ngonngon tshàm, a be z'o so tsemo' bènnzwi nkwi'te num ngonngon tshàm nà, o zete, ndèn ndù mènntùn ke bèn mbe netèt be. Yen ndù Nsi bèn mbe nkwénta netèt be.

⁵¹ Laban tshob Yakob ndù: Tshù fèt ndoṅ mba loṅla' se me te netèt be là.

⁵² A bwô ndù sen fèt ndoṅ ni, sen loṅla' li be nkwénta ndù me ke nsi tôg sen fèt ndoṅ ni, o ke se' ntôg sen fèt ndoṅ nà bo loṅla', neghù kebwô.

⁵³ A bwô ndù Nsi Abraham bo Nakor be ngakeb ntsha netèt be. Yakob lo' Ngafétwut ze Isak be mbwôg i là nkàn mfe yi.

⁵⁴ Yakob fà ju le'te Nsi num mbale, ntsiaṅ fèt tse bo à bo jù jujù. Bo jù jujù, nzi num mbale.

⁵⁵ Laban lo nsi mà nkebnjù, ntate bonnkat mi boa ngonngon tse, njab kàn bo nène. Laban lo mbèn njam la' i.