Neto'te 27 - NTSHOB NSI

Yakob lo' neta nkwé mbotni ze bo na' mbù Esau là

¹ Isak lo ywène, miag mi to' nesènte, k'a ke bèn neyen nze. Ndùlala, a tsiaṅ nshum i Esau z'a ke nkô i là ntshob yi ndù: Nshum àm, a bùnte yi ndù: Tshù me li.

² Isak tshob ndù: Tshù me li m'a ywèn nà; me ke' lèn lé'njù vù sàm.

³ Me le't'o ndù o lo' tshuntshùag tsho, mfe' nkél o bo ngoṅkél o ndonni, nèn mà tshwèt ntam nyàm me bwe.

⁴ Nabte jujù yi me mba me be nkô là, mfà me ndù me fèle, njab kàn wù kà njôg nkwù.

⁵ Rébéka lo ke nju' ju ze Isak ke ntshob nshum i Esau là. Esau nèn mà tshwèt ntam nyàm bwe ndo' nse' yi.

⁶ Tshù, Rébéka tshob nshum i Yakob ndù: Me ju' tàan nke ntshob men ntshob li mfèl o ndù:

⁷ Nèn ndo' nyàm z'o tam nà nabte jujù yi me jù, njab kàn wù mbwe Tshùaben kà nkwù.

⁸ Nshum àm, ju' ntshu àm mba num ke lo ze m'a' tshob wù là.

⁹ Nèn netèt mbwe ndo' bon mbwe mebwô bwe bàa nse' yi. M'a' nabte jujù yi tàan mb'a be nkô là,

¹⁰ o lo' nèn mfà yi a jù njab kàn wù kà nkwù.

¹¹ Yakob tshob Rébéka ndù: Tshù, mfèl àm Esau b'a nganyiaṅ, mba yàm tu wut là, wul àm tiage.

¹² Mo' ndù tàa tsho nkwag àm, me tù' ngatatte num miag mi, kàn se me lo nke ndiag ndù a yab me là tù' ndon tu àm.

¹³ Màab tshob yi ndù: Nshum àm, mb'a bwô ndù yen ndon nà tsho à tu àm. Ju' nda' ju ze me tshob wù là nèn ndo' tshen bon mbwe là nse' yi.

¹⁴ Yakob nèn ndo' yub nse' mfà màab, a nabte jujù yi mba tàab ke nkô là.

¹⁵ Yen nà be tôge, Rébéka lo' nzwe tse mebwô netèt nzwe tuswe i Esau ts'a be ntùm ndà là, ngù bo ma' num nshum i Yakob ntù'njam Esau.

¹⁶ A lo' ngub mbwe mfin mbu Yakob yi boa tô i ze nyiaṅ be ke be bwe là.

¹⁷ A fà mbàb bo bàn z'a nabte là ntùm mbu nshum i Yakob.

¹⁸ Yakob nèn mbaṅ tàab, ntshob ndù: Tàa! A bùnte ndù: Tshù me li! O b'a we nshum àm?

¹⁹ Yakob tshob tàab ndù: Me b'a nshum o Esau, tuswe o, m'a ghù mb'o lo ntshob me là, lo nsi ntswe netswe mfèt mbàb ze me na là, njab kàn me.

²⁰ Isak tshob nshum i ndù: Nshum àm, o fon ndende be! Yakob bùnte ndù: A b'a nummbe Tshùaben Nsi o ghù a tum mbwe àm.

²¹ Isak tshob Yakob ndù: Nshum àm, kù'te nse' me kwag o, ndèn mbe z'o b'a nshum àm Esau ke nga lo là.

²² Yakob kù'te nse' mbaṅ tàab, a kwag i ntshob ndù: Nze b'a nze Yakob, là mbu be mbu Esau.

²³ A ke lèn Yakob nummbe mbu mi lo ghù nyiaṅ mba mbu mfèl i Esau là. A yab kàn yi, ntshob ndù:

²⁴ A b'a wù bèn mbe nshum àm Esau à? A bam.

²⁵ Isak tshob ndù: Te jujù me me jù nshum àm, njab kàn wù. A te jujù yi a jù, a bèn mfà ndu' yi a nu.

²⁶ Ndùlala tàab Isak tshob yi ndù: Kù'te ndonni nse' ntat'àm me nshum àm!

²⁷ A kù'te nse' ntat'é. Isak ju' njwèt nzwe tse, njab kàn yi ntshob ndù: Tshù, njwèt nshum àm b'a mba njwèt nà ze Tshùaben naṅ mbotni bwe là.

²⁸ A bwô ndù Nsi fà meme' kamànyam wù, mba tshu mebwô ts'a tum mum tsha' là, ngefet bo ndu' kua' yàm yàme.

²⁹ A bwô ndù ngôngô ke nju'ni wù, ba tum vù nsi mbwe o. Be ngasa' fèt tsho. A bwô ndù bon màan tse bandum vùte nsi mbwe o. Ngandon b'a mèn z'a nsi so ndon tu o là, ngafen be mèn z'a nsi yab kàn wù là.

³⁰ Isak lo yoṅ mbe miagte neyab kàn Yakob, Yakob yoṅ mbe lo mbwe tàab Isak, mfèl i Esau yoṅ nke mfe ze tshwèt yoṅ.

³¹ Mba yi nabte ze jujù nse' mfà tàab ntshob ndù: Lo nsi mfèt mbàb ze me na là, njab kàn me.

³² Tàab Isak tshob yi ndù: O b'a we? A bùnte ndù: Me b'a nshum o, tuswe o Esau.

³³ Ndùlala Isak to' nevètte kua' yàme, ntshob ndù: K'a b'a kua' we z'a se' mfà mbàb z'a tam nà m'à? M'a fèt njoṅ i fa njab kàn yi, k'o njôg nse'e. Tshù, sen kàn nà ghô num i.

³⁴ Ndùse Esau ju' men ntshob là tum ntshu tàab là, a kua' neta, zwe ko' ntù i, a tshob tàab ndù: Tàa, yab kàn mba me yàm!

³⁵ Tàab bùnte ndù: Mfèl o lo' mfù nse' yi tà ndo' kàn so.

³⁶ A tshob ndù: A fa't'àm ndonni yoṅ bàa. A ndùlala ze bo be ntsiaṅ i Yakob là ké? A lo lo' yàm nu ntshùambwe, ndonni a bèn ndo' kàn sàm. Esau tshob tàab ndù: Ndù o ke' lé' lèn kàn me njam ké?

³⁷ Isak bùnte ntshob yi ndù: Tshù, me yab i mba ngasa' o là, mbèn mfà fèt tse yi mba ghafa' tse là, mfà ngefet bo ndu' yi. Nshum àm, ke ze be me bèn ngù wù yu à?

³⁸ Esau tshob tàab ndù: Tàa, ndù a b'a nda' ta' kàn ntshù' s'o ghù là ké tàa? Tàa, yab kàn mba me yàm. Isak tswe ntshu mi'i, ndùlala Esau kua', ntam keshù'.

³⁹ Ndùlala tàab Isak bùnte ntshob yi ndù: Tshù, yu dù'ntswe nsi b'a ngùanesà num dù' tsha' mebwô, be ngùanesà num meme' mi a swe' tà mfe kamànyam nà;

⁴⁰ o nsi tshùa njam yu ṅwi ntsho kà yôge, bèn fa' mfèl o, a be ndùs'o kô là, o tam mvèt, num kele' se s'a tô o là!

Yakob kù nèn ntèt mfèt màab Laban

⁴¹ Esau tam njam Yakob mum yantù i, num nu kàn se tàab yab yi là, ntshob ntùm ntù i ndù: Tse lé'njù tàa ghebte, ndùlala me nsi zwi mfèl àm Yakob ndùse tàa nsi kwù là.

⁴² Bo nèn nsoṅ Rébéka nkwate Esau, z'a be tuswe i là. Rébéka tum bo nèn ntsiaṅ nshum i Yakob, ntù'njam, a tshob yi ndù: Tshù mfèl o Esau là z'a tshwèt ndiag neyagte mba' wù, nzwi o là.

⁴³ Ndonni, ju' ntshu àm ndo nsi nkù nèn la' mfèl àm Laban mà Karan me nshum àm.

⁴⁴ O nsi tswe la' i tsemo' bon lé'njù, tà nkum ngelaṅ ze yantù mfèl o fite là,

⁴⁵ tà nkum ngelaṅ ze yantù mfèl o num o fite, a lagte nu z'o ghù num i là. Yen ngelaṅ nà me nsi tum benntùn bo se' ndo' o. Kà m'a' bi zin ntu bàa num ta' lé'njù ntshù' à numke?

⁴⁶ Rébéka tshob Isak ndù: Nu yôg ke' bèn nebwô àm num ngonngon Hétia. A be ze Yakob so mo' ngon Hétia mba tshen nà, mo' ngon netèt ngonngon yen ngô li là, mb'a ywimt'àm ke neke njôg à?