Neto'te 25 - NTSHOB NSI

Mba Abraham na' nkwù là. Mo' ze nzwit Abraham

¹ Abraham bèn nso mo' mènnzwi lén se Ketura.

² A bwe Zimram yi, Jokshan, Median, Madian, Jishbak bo Shuash.

³ Jokshan bwe Sédan bo Dedan. Nzwit bon Dedan b'a ba Ashurim, ba Letushim bo ba Leumim.

⁴ Bon Madian tse bandum be Efer, Hénok, Abida bo Eldaa. Tshù njoṅ bon Ketura tse bandum nà.

⁵ Abraham fà njoṅ tshu tse fa Isak.

⁶ A fà ze bag tshu bon màndà tse tse bandum; ntshag yub ngùanesà mbaṅ nshum i Isak ngelaṅ z'a ke' ntùn nà. A ghù bo nèn nke ntswe nze bag ntumnyam, ntùm ngô ntumnyam.

⁷ Tshù njoṅ ngu'njù tse Abraham yôg yi li: A lo tswe ntùm njù ngu'njù ntshob tàn bon sammbàa nkù.

⁸ Abraham kwù, ndù a ywèn tse ntùm mebwô, lé'njù yôg tse yàm neshu. Bo tshoṅ i mbaṅ tà tse.

⁹ Isak bo Ismaél boa nshumnshum tse tshoṅ i ntùm ngabloṅ Makpéla, ntùm fèn Efron, nshum Tsokar ze Hétia, z'a be mbwe Mamré là.

¹⁰ A b'a fèn ze Abraham na' njun ba Hétia là. Bo lo tshoṅ Abraham bwe mba nzwi i Sara.

¹¹ Ndùse Abraham kwù là, Nsi yab kàn nshum i Isak. A ke ntswe à mbaṅ tôntse Lakaï-Roi.

¹² Tshù tunndà Ismaél nshum Abraham ze Agar ngon Egipto, ngafa' Sara ze mènnzwi na' mbwe li.

¹³ Tshù ndèn nshumnshum Ismaél boa nzwit yub li: Nebajot, tuswe Ismaél, Kedar, Adbeél, Mibsam,

¹⁴ Mishma, Duma, Masa,

¹⁵ Hadad, Téma, Yétur, Nafish bo Kedma.

¹⁶ Tshù bon Ismaél tse bandum nà. A b'a ndèn mub là, ntùm yub tunndà mba ntùm yub bag ngô.

¹⁷ Tshù njoṅ ngu'njù yôg Ismaél li: Ngu'njù ntshob sammbàa bon tat nkù. Yen nà be tôge, a kwù, bo tshoṅ i mbaṅ tà tse.

¹⁸ Nshumnshum tse tete neto' Havila nèn nkum Shur z'a be mbwe Egipto nze bag mbinyam, nze nenèn Asiria là. Ze dù'ntswe ke nsi tamte boa ze fèt tse.

¹⁹ Tshù tshô tunndà Isak, nshum Abraham ni: Abraham lo bwe Isak.

²⁰ Isak lo ghù ngu'njù ṅam nkuà kà nso nzwi i Rébéka ngon Bétuél ze Aram mà Padan-Aram bo Laban ze Aram, mfèt Rébéka.

²¹ Isak bu' mbu Tshùaben num tu nzwi i, nummb'a na' mb'a kebwe. Tshùaben ju' yi. Rébéka nzwi i jùm.

²² Mba bon ke nkam ntanta bam i là, a tshob ndù: A be z'a b'a ndùlili là, mb'a ywimt'àm à ke? Ndùlala a nèn mbètte Tshùaben.

²³ Tshùaben tshob yi ndù: Ngô bàa num bam o, nzwit benntùn bàa nsi tum bam o sa mum njù: Mo' nsi ta tshùa mo', ntshùambwe nsi fa' ntù'njam.

²⁴ Lé'njù nebwe lo ku'u, a bwe bonfag.

²⁵ Mbwe i tum ndù a b'a mba kummbaṅ nyiaṅnyiaṅ nà. Bo tsiaṅ i ndù Esau.

²⁶ Yen ni be tôge, mfèl i tum. Bu i lo tshùb tunku Esau, bo tsiaṅ i ndù Yakob. Bo lo be bwe yub ndù Isak ghù ngu'njù ṅam ntôge.

²⁷ Tshen bon bandum nà ku', Esau lèn nema' yoṅ, ntù' ngayôg mà tshwèt, Yakob be fitemèn, nke ntswe bam ntàb.

²⁸ Isak lo ke nkô Esau, nummbe mbàb nyàm tshwèt lo ke ntshùa ntshu i, là Rébéka nke nkô Yakob ntshùa Esau.

²⁹ A be mo' lé'njù Yakob na nkun, Esau be fe tshwèt yoṅ mbole.

³⁰ Esau tshob Yakob ndù: Faṅ me fèt meju nkun meba, nummbe me bot. A ndùlala ze bo yab lén Esau ndù Edom nà.

³¹ Yakob tshob ndù: Swèn nu ntshùambwe me nkàne.

³² Esau tshob ndù: Tshù, me tù' nekwù, nu ntshùambwe ywimt'àm kua' ke?

³³ Yakob bèn ntshob ndù: Kàn mfe me nkàne, a kàn mfe yi be ndùse, nswèn nu ntshùambwe Yakob.

³⁴ Ndùlala Yakob fà bàn bo sôg nze' Esau. A jù mbèn nu, ntum nèn tse. Tshù mba Esau na' ngwag nu ntshùambwe là.