Neto'te 24 - NTSHOB NSI

Mba Isak bo Rébéka nandà là

¹ Abraham lo ywène, ngu'njù tse nèn mbwe, ndùlala Tshùaben yab kàn Abraham, a be ngafu' num njoṅ tshu fa.

² Abraham tshob ngafa' i z'a tswe ndà i yàme, mbèn mbe ngalé' njoṅ tshu tse fa là ndù: Me le't'o, yab bu o njam tammbwe àm;

³ ndù me ghù o kàn mfe num lén Tshùaben. Kàn mfe num lén Nsi nganabte kamànyam bo tsha' ndù o ke nsi diag nzwi nshum àm à netèt ngonngon Kanaan, tse me tshwèt ntswe netèt bo là.

⁴ Tshob me ndù o nsi nèn à ntùm ngô àm mba ntùm yàm nzwit diag nzwi nshum àm Isak bwe.

⁵ Ngafa' bùnte yi ndù: Be mo' ndù mènnzwi ke kô nebwe àm, nse' ntùm yen ngô li. A mbe ndùlala me lo' nshum o nèn yi mum ngô z'o tum bwe là ké?

⁶ Abraham bùnte yi ndù: Bamnà nelo' nshum àm nèn yi bwe.

⁷ Tshùaben, Nsi kamànyam, z'a na' ndo' àm ntùm ndà tàa, mba mum ngô ze bo bwe àm bwe là, lo tshob me nsaṅlaṅ bwe, ntshob ndù: Me nsi fà yen ngô li nzwil o. Tu wul i nsi tum Angél i mbwe o; o nsi nèn à bwe diag nzwi nshum àm bwe.

⁸ A be z'a ke' bwe o là, mba ju ke ghù o num nkànmfe z'o ghù me là. A mbe be ndùke lo kà lo' mén àm nèn yi bwe.

⁹ Ndùlala ngafa' Abraham yab bu njam tammbwe tàfa' i, nkàn mfe num yen nu là.

¹⁰ Ndùlala ngafa' Abraham lo' kamél gham netèt kamél tàfa' i ndo ntam nze; a bèn ndo' bon tshu mebwô ts'a la' tàfa' i là mfét tun bu i. A lo ntam nze nenèn Aram Naharayim, ngô Nakor.

¹¹ A ghù ba kamél nôte nsi njam ngô, mbaṅ mo' tôntse ndù mfetnjù, ngelaṅ bènnzwi be ntum nse' tu' ntse là.

¹² A tshob ndù: Tshùaben, Nsi tàfa' àm Abraham, ghù me fon ju ze me tshwèt ndiag là sènni, ghù bwôntù num tàfa' àm Abraham.

¹³ Tshù me li me tsin mbaṅ ntse là, ngonngon benntùn tshwèt ntumte mum ngô nse' tu' ntse.

¹⁴ Ménngon ze me nsi tshob yi ndù: Ben so tshaṅ ntse me nu, a tshob me ndù me nu, a bèn mfà mba mi ba kamél là b'a yen nà z'o tsho' njab ngafa' o Isak là. A nsi tshùa ndùlala me lèn ndù o ghù bwôntù num tàfa' àm Abraham.

¹⁵ Mb'a be ke yoṅ miagte netshob là, Rébéka ṅwag ndù a te tshaṅ ntse nkembe' i. A na' mb'a ngon Bétuél, nshum Milka nzwi Nakor mfèt Abraham.

¹⁶ Ménngon nà lo bwô neshu, num se i, mbe ketabte, sàm mandum ke yoṅ ndèn i. A swe' ntsho ntse, ntu' ntse k'a dun, a tum.

¹⁷ Ngafa' Abraham kù nde nèn mbumte bo yi, ntshob ndù: Faṅ me nu mén ntse ntùm tshaṅ ntse so.

¹⁸ A bùnte ndù: Nu me tshùaben àm. A nànte neswe' tshaṅ ntse mum mbu mi, mfà ntse yi a nu.

¹⁹ Ndùs'a miagte nefà ntse yi là, a tshob ndù: M'a' tu' ntse mfà mba kamél tsho tà nkum ngelaṅ bo nu yub njoṅ i ku' là.

²⁰ A nànte nsô ntse mi a tshaṅ nà ntùm let ntse ba nyàm, nkù nde nèn ntu' ntse, ntu' ntse num njoṅ kamél tse fa.

²¹ Mandum nà nke ndôt'é ntùm netshàme, ke tshob sàm ju, nke mbéb neyen a be ze Tshùaben ghù a jù bin nkatt'é ke nga lo là.

²² Ndùse ba kamél miagte nenu ntse là, mandum nà lo' kwa tanjoṅ bo mbwô tanjoṅ mbàa mfà yi,

²³ ntshob ndù: O b'a ngon we? Me labt'o, soṅ àm. Be dù' nezi be ntùm ndà tàan bag zi bwe ké?

²⁴ A bùnte ndù: Me b'a ngon Bétuél, nshum Milka bo Nakor.

²⁵ Mbèn ntshob yi ndù: Bèn bo nenà nyàm num la' bag yàme, mba dù' nezi bwe.

²⁶ Ndùlala mandum nà kwim ntunkekwi' mi nsi mbwe Tshùaben.

²⁷ Ntshob ndù: Ghamte be Tshùaben, Nsi tàfa' àm Abraham; a ghù bwôntù i num tàfa' àm, mbèn mbe mèn nenùn yi. A Tshùaben bèn ntshagt'àm num manze tà nèn nkum ndà fèt tàfa' àm.

²⁸ Ménngon nà kù nde nèn ndà màab, nsoṅ i tshen nu là.

²⁹ Tshù, Rébéka lo ghù mfèl i ze mandum lén se Laban. Laban tum nkù nde nèn mbaṅ mandum nà mbaṅ ntse.

³⁰ Ndùs'a yoṅ njen kwa tanjoṅ bo mbwô tanjoṅ bu ngon màab, mbèn njoṅ nju' ntshob mi ngon màab tshob ndù: Mandum nà tshob me ndù; a tum nèn mbaṅ mandum nà z'a ke' mbaṅ ba kamél mfe tu ntse là.

³¹ Ntshob yi ndù: Ngafen mbwe Tshùaben, se'e. Numk'o ntswe ntshundà à? M'a nabte dù' ndà mba dù' ba kamél.

³² Mandum nà se' ndà, Laban kiagte tshu num ba kamél, mfà bèn bo nenà bo. A fà ntse mandum mba ben tse bo à bo be là ndù bo sôg nku mub yi.

³³ Bo fà jujù yi, l'a tshob ndù: Me ke nsi jù jujù ke be ndù me tshob ju z'a bam àm nà. Laban bùnte ndù: Tshobe.

³⁴ A tshob ndù: Me b'a ngafa' Abraham.

³⁵ Tshùaben lo' tàfa' àm ngù ngafu' yi, a tù' ngafu' ze ndùb: A fà mbwe boa ba nyàmna' yi, mfà nkàb bo gol yi, mfà ghafa' tse bandum boa tse bènnzwi yi, mfà ba kamél bo nkekwèn yi.

³⁶ Sara nzwi tàfa' àm lo bwe mén mandum yi ndùs'a ywèn nà, a fà njoṅ tshu fa ts'a ghù là mén nà.

³⁷ Tàfa' àm lo ghù me kàn mfe ndù me ke nsi diag nzwi nshum i a netèt ngonngon Kanaan ts'a be ntswe netèt bo là.

³⁸ A lo ntshob mbe ndon nsi tsho tu àm, a be ze me ke' nèn à ndà tàab, ntùm tunndà i, ndiag nzwi nshum i bwe là.

³⁹ Me lo tshob tàfa' àm ndù: Mo' ndù mènnzwi ke nsi kô tse nebwe àm!

⁴⁰ Abraham tshob me ndù: Tshùaben ze me ke nzin mbwe i là nsi tum Angél i wù bin yi nène, a nsi ghù ndù o jù bin yu nkatte: O nsi diag nzwi nshum àm à ntùm tunndà àm, ntùm ndà tàa.

⁴¹ Ndùlala ndon àm ke nsi tsho tu o, a be z'o nèn ntùm tunndà àm nà. A be ze bo gha wù là, mba ndon àm ke nsi tsho tu o.

⁴² Me fe nzin nkum ntshu ntse sènni, ntshob ndù: Tshùaben, Nsi tàfa' àm Abraham, me le't'o ndù o la'te manze z'a bwô ndù me tshùa bwe yàm nkatte bumte là me.

⁴³ Tshù me li me mbaṅ ntse là, mba zit ménngon neku' lo z'a nsi tum se' tu' ntse, ze me nsi tshob yi ndù: Bam ndù me nu ntse ntùm tshaṅ so,

⁴⁴ a bùnte me ndù: nu me bèn ntu' mba mi kamél tsho là, b'a mènnzwi ze Tshùaben tsho' njab nshum tàfa' àm nà.

⁴⁵ Me lo ke yoṅ miagte netshob yen nu là ntù àm, Rébéka ṅwag ndù a te tshaṅ ntse nkembe' i. A swe' ntsho ntse, ntu' ntse, me tshob yi ndù: Me le't'o fà ntse me, me nu.

⁴⁶ A nànte nte tshaṅ ntse se nsi ntshob ndù: Nu, m'a' fà mba mi kamél tsho. Me lo nu, a bèn mfà mba mi kamél tshàm.

⁴⁷ Me lo mbètt'é ndù: O b'a ngon we? A bùnte ndù: Me b'a ngon Bétuél, nshum Milka bo Nakor. Ndùlala me lo nso kwa tanjoṅ ntselag i, nso mbwô tanjoṅ mbàa bu i.

⁴⁸ Nte ntunkekwi' màm nsi ngwù nsi mbwe Tshùaben, nyàmte Tshùaben, Nsi tàfa' àm Abraham, z'a tshagt'àm num manze ntùn, ndù me diag ngon mfèt tàfa' àm, mfà nshum i là.

⁴⁹ Ndonni a be ze bin kô neghù bwôntù bo nenùn tàfa' àm nà, bin tshob me, ndùlala ndù me lèn mba me nsi ghù là.

⁵⁰ Laban bo Bétuél bùnte ntshob ndù: Yen nu là fe à Tshùaben. Be bag ke tshob nu num bwe.

⁵¹ Tshù Rébéka là mbwe o, lo' i nèn yi, a be nzwi nshum tàfa' o, mba Tshùaben tshob là.

⁵² Ndùse ngafa' Abraham ju' men ntshob li là, a vù nsi mbwe Tshùaben.

⁵³ A sô nkwa, nkàb boa mi gol, boa nzwe, mfà Rébéka; a fà tshu tanjoṅ mfèl i mba màab.

⁵⁴ Bo jù mbèn nu, yi mba benntùn tse bo se' tshag i là, mbèn nzi. Njù làn, bo lo nsi, a tshob ndù: Bin faṅ me nèn ju tàfa' àm.

⁵⁵ Ndùlala mfèt Rébéka bo màab tshob ndù: A bwô ndù bag à ménngon bèn ngubte tsemo' bon lé'njù, nguan lé'njù gham, k'a nène.

⁵⁶ L'a bùnte bo ndù: Mba Tshùaben ghù njoṅ i fa bumte là, kà bin bèn ngù me ghubte nsen ni. Bin faṅ me nène, nèn ju tàfa' àm.

⁵⁷ Bo tshob ndù: Be tsiaṅ ménngon mbètt'é mi nkwate.

⁵⁸ Bo tsiaṅ Rébéka mbètt'é ndù: O kô nenèn bin yen mandum ni ké? A bùnte ndù: Me kô kua' mebwô.

⁵⁹ Ndùlala bo faṅ ngon màa yub Rébéka mba nz'é nèn boa ngafa' Abraham, boa benntùn bo à bo be là.

⁶⁰ Bo yab kàn Rébéka ntshob ndù: Mfèt yag, a bwô ndù ben ntsha'ntsha', ben ntshu'ntshu' tum num o! A bwô ndù nzwil o lo' ngô ghakeban tse.

⁶¹ Rébéka boa ghafa' tse tse bènnzwi lo nsi nko' num ba kamél, ntam njam ngafa' Abraham. Ngafa' Abraham lo' Rébéka nène.

⁶² Isak lo se' kônkwa, tôntse Lasha-Roi, nummb'a ke ntswe à ntùm ngô Négéb.

⁶³ Tshù, Isak tum nke nkatte ndù mfetnjù mà tshwèt, mbù' miag mi njen bwoṅ kamél nke nse'e.

⁶⁴ Rébéka bù' miag mi njen Isak, njwèt num kamél ngwù nsi,

⁶⁵ ntshob ngafa' Abraham ndù: Yen mandum din z'a tshwèt nse' mà tshwèt bag bin bo bumte là b'a we? Ngafa' Abraham bùnte ndù: A b'a tàfa' àm; ndùlal'a lo' kam nzwe nkabte se i yi.

⁶⁶ Ngafa' Abraham soṅ Isak njoṅ tshu fa ts'a ghù là.

⁶⁷ Isak lo' Rébéka ntsho i mum ntàb i. A lo' i k'a tù' nzwi i. A kô i. Ntù Isak fite mb'a na' mbe be ndù màab kwù là.