Neto'te 23 - NTSHOB NSI

Mba Sara kwù là. Abraham jun dù' tufi

¹ Sara lo tswe ntùm njù ngu'njù ntshob sammbàa bon bàa nkù. Tshù njoṅ ngu'njù tse Sara yôg yi là.

² Sara kwù Kirjat-Arba z'a be Hébron ntùm ngô Kanaan nà. Abraham nèn ndàn vù Sara, nkua' i neshu.

³ Abraham lo nsi mbaṅ fe i, nèn ntshobte boa ba ntùm ngô Het ntshob ndù:

⁴ Me b'a ngùn, nke ntswe netèt bin; bin fà dù' tsha' me, me tswe' fi nzwi àm bwe, ntshoṅ fe i bwe ndù a lo num miag màm.

⁵ Ba Hétia bùnte Abraham ntshob ndù:

⁶ Tshùaben, ju' mba bag tshob wù là. O b'a kuni mfen netèt bag, yab fe nzwi o mba ntùm sit fi ntùn no s'o tsho' netèt mag mfi là. Sàm mèn ke netèt bag z'a nsi gha ndù k'o yab fe nzwi o ntùm se fi là.

⁷ Abraham lo nsi, ntsin mbwe njoṅ ngô fa, mbwe ba Hétia.

⁸ Ntshob bo ndù: A be ze bin bam ndù me yab fe nzwi àm ntùm fi, ndé' i num miag màm nà, bin ju' mba me tshob là, mbu' mbu Efron, nshum Sokar,

⁹ ndù a swèn ngabloṅ z'a be yi Makpéla là me; me tshob à ngabloṅ z'a be tôg fèn i là. A bwô ndù a swèn me, me fà njoṅ nkàb i yi mbwe bin, ndù yen dù' là tù' sag tufi netèt bin.

¹⁰ Efron lo tswe nsi netèt ba Hétia. Efron mèn Hétia bùnte Abraham mbwe ba Hétia boa njoṅ benntùn fa tse bo tsho nsém nà ndù:

¹¹ Nga me tshùaben àm, ju' ju ze me tshob wù là! Me fà fèn wù bo ngabloṅ z'a bwe là. Me fà njoṅ i fa wù à num miag bon ngô. A bwô ndù o yab fe nzwi o mum fi.

¹² Abraham tsin mbwe njoṅ ngô fa,

¹³ ntshob Efron mbwe njoṅ benntùn fa ntùm ngô ndù: Ju' ju ze me tshob wù là, me le't'o, a bwô me fà nkàb fèn wù. Bam me ndùlala, ndù me yab fe nzwi àm bwe.

¹⁴ Efron bùnte ntshob Abraham ndù:

¹⁵ Tshùaben àm, ju' ju ze me tshob wù là. Mekam tsha' ze njoṅ i be nguan ndô nkàb nkù kuà là b'a kua' ke netèt be à? Yab fe nzwi o ntùm fi!

¹⁶ Abraham ju' mba Efron tshob là, mfi' nkàb njoṅ ze Efron tshob là mfà yi mbwe ba Hétia, mfà ndô nkàb nkù kuà yi, kua' num ntshu ntàn ngantàne.

¹⁷ Ndùlala fèn Efron z'a be Makpéla, mbwe Mamré là tù' ze Abraham boa njoṅ tshu fa ts'a be ntùm bwe là, ntù, ngabloṅ.

¹⁸ Njoṅ i fa tôg a mbwe ba Hétia boa njoṅ benntùn fa tse bo tsho nsém nà.

¹⁹ Yen nà lo be tôge, Abraham yab fe nzwi i Sara mum fi ntùm ngabloṅ z'a be fèn mà Makpéla, mbwe Mamré z'a be Hébron ntùm ngô Kanaan nà.

²⁰ Ba Hétia swèn fèn mba ngabloṅ z'a be bwe là Abraham, a tù' sob tufi.