Neto'te 21 - NTSHOB NSI

Mba bo na' mbwe Isak là

¹ Tshùaben kwimte ju z'a na' mbù Sara là, ngù yen nka'ni là bumte.

² Sara jùm, mbwe mén mandum Abraham ntùm ywèn i, be kua' mum ntswe'njù mi Nsi na' ntshob là.

³ Abraham tswi lén nshum i ndù Isak, nshum i ze bo bwe i, nshum i ze Sara bwe yi là.

⁴ Abraham si ket nshum i ndùs'a kum lé'njù fome, ndaṅndaṅ mba Nsi na' ntshob yi là.

⁵ Bo lo be bwe Isak ndù Abraham ghù ngu'njù nkù.

⁶ Sara tshob ndù: Nsi fà tunu zwi me, mba we lo z'a nsi ju' là nsi zwi tse num àm.

⁷ Sara bèn ntshob ndù: We z'a na' nku'ni netshob ndù me nsi nyô mén mandum à? Mba ndùlala me bwe mén mandum yi ntùm ywèn i.

⁸ Mén ku', ntsho' bùn. Abraham ghù mo' jùa ndùb lé'njù ze Isak tsho' bùn nà.

⁹ Sara yen nshum Abraham ze Agar ngon Egipto bwe là nke ngù sa bo Isak.

¹⁰ Sara tshob Abraham ndù: Ta' yen nkuan ze mènnzwi li bo nshum i, nummbe nshum i ke nsi jù ndà bo nshum àm Isak.

¹¹ Men ntshob li bag Abraham neshu, nummbe mba Ismaél na' mb'a be mén i.

¹² Là Nsi tshob Abraham ndù: Kà lab wul o num nu nshum o Ismaél bo nkuan o ze mènnzwi Agar. Bam mba ke lo ze Sara nsi bètte wù là. Nummbe ko' yu nzwit nsi tum à num Isak.

¹³ Me nsi lo' mba nshum nkuan o ze mènnzwi ghù ta' ngô yi, nummb'a b'a nzwil o.

¹⁴ Abraham lo nsi mà nkebnjù ndo' bàn bo ntu' ntse mfà Agar, njab nshum i num nkembe' i, nta' i. A nèn mfàn manze nke ntsha num kônkwa Ber-Shéba.

¹⁵ Ngelaṅ ntse mi a be ntu' mi là, Agar yab mén tun mo' metswe' tù,

¹⁶ nèn ntswe se i ndaṅndaṅ, num nguan ma' loṅ; nummb'a lo ke ntshob ntù i ndù: Be me ke ke njen mén àm k'a nke nkwù. A tswe se mén ndaṅndaṅ, mén tshag nz'é tù, nkua'a, nke ndàne.

¹⁷ Nsi ju' nze mén; Angél Nsi tsin mfe kamànyam ntsiaṅ Agar, ntshob yi ndù: A ke Agar? Kà bwôg nummbe Nsi ju' nze mén mum dù' z'a be bwe là.

¹⁸ Lo nsi, bù' mén nsi ntshùb bu i bu o, nummbe me nsi lo' i ghù ngô ndùb yi.

¹⁹ Nsi ké' miag Agar, a yen mo' tôntse. Agar nèn bwe, ntu' ntse ntùm ntu', ndo' nèn mfà mén.

²⁰ Nsi nke mbe bo mén, a nke nku'u, nke ntswe num kônkwa, mbe ngama' két.

²¹ A nke ntswe kônkwa Paran; màab diag nzwi i mum ngô Egipto.

Abraham wat kàn bo Abimélék

²² Num yen ngelaṅ nà Abimélék bo tàndà ntsho i Pikol tshob Abraham ndù: Bin Nsi be mbe num njoṅ tshu fa ts'o be ngù là.

²³ Ndùlala kàn mfe me num lén Nsi ndù o ke nsi zi tatt'àm, ke me, ke bon tshàm, ke nzwil àm no; bam me ndù mebwô ze me be ngù wù là, o nsi ghù a be yi me mba ngô z'o tshwèt ntswe mum bwe là.

²⁴ Abraham bùnte ndù: Ṅ, me kàn mfe!

²⁵ Abraham tswit nkùn num nu tôntse se ghafa' Abimélék lo' yi tùntùn nà.

²⁶ Abimélék tshob ndù: Me lo ke lèn sàm ju num yen nu là. Tu wul o lo ke soṅ àm sàm ju bwe, me ke bèn nju' sàm nu bwe k'a ke nda' sènni.

²⁷ Abraham ghom njùmbwe boa nyàmna' mfà Abimélék. Njoṅ yub ntu bàa fa wat kàn.

²⁸ Abraham lo' bon njùmbwe sammbàa njab njam,

²⁹ Abimélék bètt'é ndù: Tshen bon njùmbwe sammbàa ts'o sô njam njam nà tswit'a ndùke?

³⁰ A bùnte ndù: A bwô ndù o bam tshen njùmbwe sammbàa li ts'a tum bu àm nà, ndù a be kwénta ndù me na' ntswe' sen tôntse li.

³¹ A num ndùlala ze bo be ntsiaṅ yen dù' là ndù Ber-Shéba là; nummb'a b'a dù' ze bo kàn mfe bwe bo bo là.

³² Ndùlala bo wat kàn Ber-Shéba. Yen nà be tshùa Abimélék lo nsi bo Pikol ze tàndà ntsho, mbèn njam mum ngô ba Filistia.

³³ Abraham bwe ntù tamaris Ber-Shéba, ntsiaṅ lén Tshùaben, Nsi matmat bwe.

³⁴ Abraham lo tswe ntùm ngô ba Filistia yàme.