Neto'te 20 - NTSHOB NSI

Abraham bo Abimélék

¹ Abraham lo nèn mà ntèn, nte netèt ngô Kadèsh bo ngô Shur, mbèn ntswe mba Guérar.

² Abraham nke ntshob ndù nzwi i Sara b'a mfèl i ngelaṅ z'a be Guérar là. Abimélék mfen Guérar ghù bo ghom Sara.

³ Ndùlala Nsi se' ntshob Abimélék mum njem ndù: Tshù, o nsi kwù num nu mènnzwi z'o ghom nà, nummbe ndu i num bwe.

⁴ Abimélék z'a na' mbe ke yoṅ ndo' Sara là bùnte ndù: Tshùaben, o nsi zwi mbu'u, ze tum, a be z'a be mèn netsin nà ké?

⁵ Abraham lo ke bèn ntshob me ndù a mfèl i ze mènnzwi ké? Mba kua' yi lo ke tshob ndù Abraham b'a mfèl i ze mandum à! Me lo ghù ndùlala ntù àm ke tam num sàm ju.

⁶ Nsi bùnte yi mum njem ndù: Mba kua' tu wul àm lèn ndù o be ghù ntù o ke ke ntam num sàm ju; a kua' me bèn ntshètt'o ndù k'o ghù kebwô num àm. A ju z'a ghù me ke bam ndù o lo' Sara là.

⁷ Ba' nzwi mandum nà njam ndonni, nummb'a b'a ngatshob ntshob Nsi, a nsi le'te Nsi num tu o, ndù o yôge. Là, a be z'o ke' ba' i njam nà, o lèn ndù mb'o a' kwù, wù mba njoṅ tsho ben fa.

⁸ Abimélék lo nsi kua' mà nkebnjù, ntsiaṅ njoṅ tshe' tse fa, nsoṅ yub njoṅ tshen tshu là fa. Bwôg ndùb tshùb njoṅ tshen benntùn ni fa.

⁹ Abimélék bèn ntsiaṅ mba Abraham mbètt'é ndù: Ke z'o ghù bag ndù à? Me ghù à ke lèn kebwô wù k'o nke ndiag neghù mo' kebwô ndùb tsho num àm mba mum nufen àm à? O ghù tshu ts'a ke' bwô neghù là num àm.

¹⁰ Abimélék bèn ntshob Abraham ndù: Ke z'o na' nke nkwate kà ngù yen nu l'à?

¹¹ Abraham bùnte ndù: Me lo kwate ndù sàm mèn ke' be bwôg Nsi mum yen ngô li, ndùlala, nkwate mbe bo ghù nezwi àm num tu nzwi àm.

¹² Mbe be, a nenùn ndù a b'a ngon tàa, a ke' b'a ngon màa. Me so i.

¹³ Ngelaṅ ze Nsi ghù me be tshakendà, mbe ngùanesà mbaṅ tunndà àm nà, me tshob Sara ndù: Tshù kondèn z'o nsi ke ghù me li: Ke ntsiaṅ àm mfèl o ntùm njoṅ dù' fa tse be nsi tsho bwe là.

¹⁴ Abimélék fà njùmbwe, nyàmna', ghafa' tse bandum boa tse bènnzwi Abraham, mbèn mba' nzwi i Sara yi.

¹⁵ Abimélék bèn ntshob mba ndù: Tshù ngô àm n'a naṅ mbwe o là. Te mba yà lo z'a bwô o là.

¹⁶ Ntshob Sara ndù: Tshù, me fà nkàb mfèl o ntsha' mbùm; yen nà nsi la'te benntùn tse bin à bo be là ndù o b'a mbu'u, benntùn lèn mb'o ke' fàn sàm nu mbwe àm.

¹⁷ Abraham bu' mbu Nsi num tu Abimélék, Nsi yate Abimélék, nzwi i boa ghafa' tse tse bènnzwi; bo bwe bon.

¹⁸ Nummb'a lo be be ndù Nsi ghù njoṅ ze tunndà Abimélék fa tù' kebwe, num tu Sara nzwi Abraham.