Neto'te 18 - NTSHOB NSI

Nsi bù mén mandum Sara

¹ Tshùaben ṅwag Abraham bam ntù mbwe' mi a be Mamré là. Mbe be ndù Abraham tswe ntshu ntàb nke njôg nyam mbwôgtshù.

² A bù' miag mi, njen benntùn tat ndù bo tsinte ngelaṅ mbaṅ i. Ndùs'a yen yub là, a lo ntshu ntàb nkù nde nèn mbumte boa bo, ngwù nsi num tsha'a,

³ ntshob ndù: Tshùaben àm, a be ze me b'a ngafen num miag mu là, kà nànte ntôg ngafa' o me ntshùa nène.

⁴ Bin bam ndù bo fà metsit ntse bin sôg nku min yi, mbèn mfite tun sen tù li;

⁵ mba ndù me nèn ndiag metu' bàn bin jù ndo' ntshùbte ntù zin yi kà nèn mbwe, mba bin tshùa mbaṅ ngafa' zin me là. Ndùlala bo tshob ndù: Ghù mb'o tshob là.

⁶ Abraham nànte nèn mbaṅ Sara mum ntàb ntshob yi ndù: Lo' bon nkesoṅ mbab bàn ntat, na bàn yi.

⁷ Abraham tshob ndùlala nkù nde nèn netèt nyàm tse ndo' mén mfô z'a tshote mbèn mbwô là, nse' mfà ngafa' i. Yen mén ni nànte na ndende.

⁸ A lo' mbùn nyàm mi a kut là, mi ntsentse boa mén mfô ze bo na là, ntamte nte njoṅ i fa mbwe bo, mbèn ntsin tù mbaṅ bo tun tù. Bo jù jujù.

⁹ Bo bètte Abraham ndù: Sara nzwi o yà? A bùnte ndù: A b'a mum ntàb.

¹⁰ Ngùn bèn ntshob ndù: Me nsi bèn se' la' o ngumo'. Ndùlala nzwi o Sara nsi ghù mén mandum. Sara tswe mum ntàb z'a njam i là, nke nju'u.

¹¹ Abraham bo Sara lo ywène, ngu'njù tshob nèn mbwe neshu. A lo be be ndù Sara ke' bèn neyen ṅwù.

¹² Sara zwi ntùm ntù i, ntshob ndù: Ndonni ze m'a ywèn nà, be me bèn ndèn mbwô ju ké? Mba kua' ndu àm a ywène.

¹³ Tshùaben tshob Abraham ndù: Numke Sara nzwi à? A tshob ndù: Be kua' me li bèn mbwe ndonni ze me ywèn nà ké?

¹⁴ Mo' ju ze b'a tshùa Tshùaben nà num bwe ké? Be kua' num sen lé'njù li, num yen ngelaṅ njù li, me nsi bèn se' mbaṅ o, me nsi be se' ndù Sara ghù mén mandum.

¹⁵ Sara gha ntshob ndù a ke' zwi, nummb'a lo bwôge. Tshùaben tshob yi ndù: Nga me tshen, o zwi kua' nenùne.

Abraham le'te Nsi num tu ngô Sodom

¹⁶ Benntùn nà lo nsi nsen nà, nèn nze mà Sodom. Abraham nèn tshag yube.

¹⁷ Tshùaben tshob ntù i ndù: Be me lem Abraham ju me nsi ghù là ké?

¹⁸ Abraham a' tù' tànjam ngô mba ze neta. Bo nsi tshùa à njam i kà yab kàn njoṅ ngôngô fa nsitsha'a.

¹⁹ Nummbe me lo tsho' i, ndù a tshob bon tse tse bandum boa njoṅ tunndà i fa ndù bo tù' nke nzin num manz'àm, nke ngù nunetsin bo ze ndaṅndaṅ. A nsi tshùa ndùlala ju ze me Tshùaben na' mbù Abraham nà bumte.

²⁰ Ndùlala Tshùaben tshob ndù: Tshu'te z'a be num nu Sodom bo Gomora là yàm neshu! Nukebwô yub bèn mbag neshu!

²¹ M'a' swe' nèn njene, a be ze tshu'te z'a be nse' mbwe àm b'a ndaṅndaṅ mba ngùninu mub be là. A be z'a ke' b'a ndùlala là, mba me nsi lène.

²² Benntùn nà lo nsen nà, nèn nze mà Sodom. Abraham ke' be mbwe Tshùaben dù' z'a tsin nà.

²³ Abraham kù'te nèn mbaṅ Tshùaben ntshob yi ndù: Ndùlala o nsi biagte mèn netsin bo mèn kebwô ké?

²⁴ Mo' ndù be ben netsin be num ngô ntu ṅam ntàn. A be Ndùlala mb'o nsi biagte yube, ke ko ndèn ngô num tu ben netsin tse ṅam ntàn tse bo num bwe là ké?

²⁵ Nga, be lèn yen nkwate là ke be ntù o, b'o ke bam ndù mèn netsin bo mèn kebwô vù ntùm nkù ntshù'. Ngatsho'te njoṅ njù nsitsha' fa nsi ghù nunetsine.

²⁶ Tshùaben bùnte ndù: A be ze me tèt ben netsin ṅam ntàn mà Sodom nà, mba m'a lagte njoṅ ngô fa num tu bo.

²⁷ Abraham bèn ntshob ndù: Me ze me be mbabe, mbe bwembwôg là fèn ntù netshob nu Tshùaben àm.

²⁸ Là, mo' ndù a nèn num ben netsin ṅam ntàn tse tàn tsi. A be ndùlala mb'o nsi bagte ngô num ben tàn ké? Tshùaben bùnte ndù: Nga, a be ze me tèt ben netsin bwe ntshob tàn ṅam nkuà là.

²⁹ Abraham nèn ntshob mbwe ntshob ndù: Mo' ndù be ben netsin be bwe ṅam nkuà. Tshùaben tshob ndù: Mba me ke nsi ghù sàm ju, a be ze me tèt ben ṅam nkuà bwe là.

³⁰ Abraham tshob ndù: Kà Tshùaben àm ya ntù. M'a' bèn ntshob nu. Mo' ndù be a b'a ben netsin ṅam ntat. Tshùaben tshob ndù: Mba me ke nsi ghù sàm ju, a be ze me tèt ben ṅam ntat bwe là.

³¹ Abraham bèn ntshob ndù: Me bèn mfèn ntù netshob nu Tshùaben àm. Mo' ndù be ben netsin ṅam mbàa bèn mbe bwe. Tshùaben tshob ndù: Mba me ke nsi bagte ngô num tu tshen ben ṅam mbàa là.

³² Abraham tshob ndù: Kà Tshùaben àm ya ntù, m'a' bèn ntshob nu nda' yoṅ ntshù', a b'a miagt'é. Mo' ndù be ben netsin be bwe gham. Tshùaben tshob ndù: Mba me ke nsi bagte ngô num tu tshen ben gham nà.

³³ Tshùaben be miagte netshob nu Abraham, nèn tse. Abraham bèn njam la' i.