Neto'te 14 - NTSHOB NSI

Abram boa fenfen mba Mélkisédék

¹ A lo be num ngelaṅ Amrafèl, mfen Shinear, Arjok, mfen Elasar, Kedorlaomer, mfen Elam, bo ngelaṅ Tidal, mfen Gojim,

² tshen ben ni ma' Bera, mfen Sodom ntsho, ma' Birsha, mfen Gomora ntsho, ma' Shinab, mfen Adma ntsho, ma' Shemeber, mfen Tseboim ntsho, bo mfen Béla ke Tsoar lo.

³ Tshen ben ni tse'te mà tômbo' Sidim, z'a be mà dibantse ngwa là.

⁴ Bo lo ke mfa' Kedorlaomer num ngu'njù ntshob bàa gham; a lo be kum ngu'njù ntshob tat gham bo ta tu yi.

⁵ A lo be kum ngu'njù ntshob tàn gham Kedorlaomer boa fenfen tse bo à bo be là ma' ba Refaït ntsho Ashterot-Karnaim, ma' ba Zuzit ntsho Ham, ma' ba Emim ntsho Shavé-Kirjataim,

⁶ boa ba Horia num mbat Seir tà nèn nkum tu kônga Paran z'a be mbaṅ kônkwa là.

⁷ Bo be bèn njam nkum En-Mishpat z'a be Kadèsh là, ma' ba Amalék ntsho mum njoṅ yub ngô fa, boa ba Amor tse bo tete Hatsatson-Tamar là.

⁸ Ndùlala fenfen Sodom, Gomora, Adma, Tseboim bo Béla ke Tsoar lo, tumte, nabte ntshu ntsho ntam njam bo tômbo' Sidim.

⁹ Bo tam njam Kedorlaomer, mfen Elam, Tidal, mfen Gojim, Amrafèl, mfen Shinear bo Arjok, mfen Elasar, ma' yub ntsho. Fenfen kuà le' tse tàn ntsho.

¹⁰ Ntô zin lo be njoṅ dù' fa mà tômbo' Sidim; mfen Sodom bo mfen Gomora kù, ngwù ntùm bwe, tshé' tse kù nèn num mbale.

¹¹ Ghatshùa ntsho lo' njoṅ tshunkàb fa Sodom bo Gomora, boa njoṅ yub jujù fa ze bo lé' là nèn yi.

¹² Bo lo' Lot mén mfèt Abram z'a ke ntswe Sodom nà boa njoṅ tshu tse fa nèn yi.

¹³ Mo' mèn z'a kù là nèn nsoṅ Abram ze Héber; a ke ntswe à mbaṅ ntù mbwe' mi a be Mamré là. Amor mfèt Eshkol bo Aner lo wat kàn boa Abram.

¹⁴ Ndùse Abram yoṅ nju' ndù bo ghom mfèl i ngù ntsha' yi là, a lo' tshuntshùag boa ghafa' tse tse bo bwe yub ntùm ze tunndà là, benntùn ntshob fom mén bùm nkù tat, ngwù njam bo, njoṅ yub tà nèn nkum Dan.

¹⁵ A le' yub tèttswe', yi boa ben tse, ntshùa yube. A yoṅ yub tà nèn nkum Hoba z'a be mfe tu Damas là.

¹⁶ A lo' njoṅ tshu fa, ndo' mfèl i Lot mfe yi boa njoṅ tshu tse fa, boa bènnzwi mba bwoṅ benntùn.

¹⁷ Ngelaṅ Abram ke mfe ndù a tshùa mfen Kedorlaomer boa tsemo' fenfen bo à bo be tshwèt ntsho là, mfen Sodom tum nse' mbumte bo yi mum tômbo' Shavé ze bo be mbèn ntsiaṅ tômbo' mfen nà.

¹⁸ Mélkisédék, mfen Salém, mbèn mbe ngale'te Nsi z'a tà mfe tù là, a ghù bo lo' bàn bo ndu' nse' mfà Abram.

¹⁹ A yab kàn Abram ntshob ndù: Nsi z'a be tà mfe tù, z'a nabte kamànyam bo tsha' là yab kàn Abram.

²⁰ Ghamte be Nsi z'a tà mfe tù, z'a fà ghakeban tsho ntùm mbu mu là. Abram ghabte njoṅ ntsha' fa nze gham, mfà nze ntshù' Mélkisédék.

²¹ Mfen Sodom tshob Abram ndù: Fà ben tshàm me, ndo' njoṅ tshàm tshu fa.

²² Abram tshob mfen Sodom ndù: Me nu ngu mbwe Tshùaben, Nsi z'a tà mfe tù là, Nganabte kamànyam bo tsha'a,

²³ ndù me ke nsi lo' sàm ju num tsho tshu, mba nda' ntàn ndeb, mba nda' nkù nketo'o, nedù k'o zi ntshob ndù o bèn ngù kà me ntù' ngafu'.

²⁴ Me ke tshwèt ndo' sàm ju! Mb'a nda' ju ze ghafa' tshàm jù, bo ze ben tse bag à bo be, Aner, Eshkol bo Mamré lo' yub tu là.