Neto'te 12 - NTSHOB NSI

ABRAM Nsi tsiaṅ Abram mb'a tum ntùm ngô i

¹ Tshùaben tshob Abram ndù: Tum ntùm ngô o, ntùm tunndà o mba ntùm ndà tàan, nèn ntùm ngô ze me nsi la'te wù là.

² Me nsi lo' o ghù tàa nzwit ndùb yi. Me nsi yab kàn wù, ghù lén so ju'ni. Kàn nsi ke fe à wù.

³ Me nsi yab kàn ben tse bo nsi yab kàn wù là, so ndon tu ben tse bo nsi so ndon tu o là. Njoṅ nzwit benntùn fa nsitsha' nsi tshùa à njam o kà kwé kàn.

⁴ Ndùlala Abram nèn mba Tshùaben tshob yi là. Lot nèn bo yi.

⁵ Abram lo be tum Karan ndù a ghù ngu'njù ntshob tàn ṅam sammbàa. Abram lo' nzwi i Saraï, Lot mén mfèl i, njoṅ tshu fa ts'a ghù là, boa njoṅ tse ben fa ts'a ghù Karan nà, ntam manze nenèn Kanaan. Bo zin nkum bwe.

⁶ Abram ya' ntùm ngô, tà nèn nkum dù' ze lén se be Sikém nà, mbaṅ tù mbwe' s'a be Moré là. Ba Kanaan lo be ntùm ngô.

⁷ Tshùaben se' ntèt Abram ntshob ndù: Me nsi fà yen ngô li nzwil o. A bom tômbwôg le'te Tshùaben bwe, Tshùaben z'a se' ntèl i là.

⁸ A lo nsen nà nèn num mbat z'a be Bétél, nze bag ntumnyam nà nte ntàb i bwe. Bétél be mbinyam, Aï be bag ntumnyam. A bom tômbwôg le'te Tshùaben bwe, ntsiaṅ lén Tshùaben.

⁹ Abram bèn nèn nze bag Négéb.

¹⁰ Mo' nziku' tsho ntùm ngô, Abram swe' nèn mà Egipto, ntswe bwe; nummbe nziku' lo ta mum ngô neshu.

¹¹ Ngelaṅ z'a ke ngebte netsho mà Egipto là, a tshob nzwi i Saraï ndù: Tshù, me lèn ndù o b'a mènnzwi ndù ntshù mu bwô.

¹² Ndùlala ndùse ba Egipto nsi yen o là, bo nsi tshob ndù o b'a nzwi àm. Bo nsi zwi àm, faṅ o ntùn.

¹³ Tshob à ndù o b'a mfèl àm, ndù numebwô tshùa njam o nse' me, mba ndù tu àm tshùa njam o njôge.

¹⁴ Ngelaṅ ze Abram tsho mà Egipto là, ba Egipto yoṅ mbe yen nzwi Abram ntshob ndù ntshù mi bwô neshu.

¹⁵ Ba tàndà ntsho mfen Faraon yen Saraï nèn nsoṅ bwô i Faraon; ndùlala bo lo' i nèn yi mà ntshwèt Faraon.

¹⁶ Mfen Faraon tshùa njam i ndo' Abram mebwô, mfà njùmbwe, mfô, nkekwène, ghafa' tse bandum boa tse bènnzwi, zwi nkekwène boa kamél Abram.

¹⁷ Là Tshùaben tshùa njam Saraï nzwi Abram, ma' nge' yàm num Faraon bo tunndà i fa.

¹⁸ Ndùlala Faraon tsiaṅ Abram, ntshob yi ndù: Ke z'o ghù me ndù à? Numk'o na' mbe ke tshob me ndù a b'a nzwi o à?

¹⁹ O na' ntshob ndù a b'a mfèl o, me lo' i ngù nzwi àm yi à numke? Ndonni, tshù nzwi o là, lo' i là, ntum bin yi nène.

²⁰ Faraon tshob ben tse ndù bo lo' i nèn ntshag ndùnsi, yi, nzwi i boa njoṅ tshu fa ts'a ghù là.