Nesiaṅe 5 - NTSHOB NSI

Bo ta' ba kelànte wut ntùm mbàn

¹ Tshùaben tshob Mosé ndù:

² Tshob njoṅ bon ba Israél ndù bo sô njoṅ ghankin fa boa njoṅ benntùn fa tse nswe tshwèt nke ntum num bo là, mba tse bo kwag fe mèn nà.

³ Bin nsi sô yube, bandum ke bènnzwi lo, bin sô yub ntùm mbàn. Kà bo sagte mbàn bon Israél, dù' ze me num ntswe là.

⁴ A b'a ju ze ba Israél na' ngù là, bo sô tshen benntùn nà ntùm mbàn. Bon Israél ghù mba Tshùaben na' ntshob ndù bo ghù là.

Neghabte mfànnu

⁵ Tshùaben tshob Mosé ndù:

⁶ Tshob bon Israél ndù: Ngelaṅ ze mandum ke mènnzwi lo, ghù nukebwô num Nsi, ngù ju z'a ke' bwô num miag benntùn nà, mba yen mèn nà fàne.

⁷ Bo bam ndù bo fàne, mba' ju ze bo lo' neta nkwé yi là, ngabte ju z'a ba' yi là nze tàn, njab yen ta' nze i là, tu ju z'a yi là, ntù ng'é yi.

⁸ Là, mèn ze bo na' nkwé ju i num manze kebwô là, nya ke be bwe, mba yen ju là tù' ze Tshùaben, yen nà la'te ndù ngale'te ke kekomnjù ze bo nsi sôgte nukebwô ngafànnu yi là.

⁹ Njoṅ tshu fa tse bon Israél sébte num tshu tshob nse' mfà Nsi là, tù' ze ghale'te.

¹⁰ Ju ze mèn fà Nsi là, tù' ze ghale'te, ju ze mèn fà ngale'te là, tù' ze.

Kàn num mènnzwi ghùa-ghùa

¹¹ Tshùaben tshob Mosé ndù:

¹² Tshob ba Israél ndù: A be ze mènnzwi fà ntù i num ndu i,

¹³ ndèn mo' mènghua là, yen nu là lemte num miag ndu i là, a be z'a ghù yen nu là ntùm tshàm, nga yen yen nu là ke be bwe, sàm mèn ke ne ngom i bwe là,

¹⁴ a be ze ndu i ghom nu bwe, nke nkwate ze be nekwate, ndù nzwi i fàn ku i là, mo' ndù, ndù a ke' fàn nà,

¹⁵ a lo' nzwi i nèn yi mbwe ngale'te, ndo' ju nesôgte ju nèn yi. Yen ju là b'a bu mbab bàn ntshù', ngabte nze gham kà naṅ mfèt bwe, ke ma' labinda bwe, nummbe a b'a ju nefà mb'a te nu tu nzwi i là, mbe mbab bàn nekwimte nukebwô.

¹⁶ Ngale'te nsi ghù mènnzwi ghebte, a te i mbwe Nsi.

¹⁷ Ngale'te nsi lo' ntse nelàne ntùm mekab tsha'a, ndo' mbab num tsha' ndà Nsi, ma' ntùm ntse;

¹⁸ ngale'te ghù mènnzwi tsin tù mbwe Tshùaben, a bù' nzwe se i, naṅ mbab bàn nekwimte nukebwô tô bu i, ju nefà num ghe'te, ngale'te nsi ghù ze ntse nezwe mi a num mfà ndon nà tô bu i.

¹⁹ Ngale'te nsi bù' lén Nsi num tu mènnzwi tshob yi ndù: A be ze bin sàm mandum ke' nô mb'o be la' ndu o là, o ke fàn ku o là mba men ntse nezwe li, mi a num mfà ndon nà, ke nsi ghù nukebwô num o.

²⁰ Là, a ne mbe z'o fàn ku o, mb'o be la' ndu o, mbagte wul o, nô bin mandum ghua là,

²¹ mba ngale'te nsi yob ndon num lén Nsi bètte ndù Nsi so ndon tu o, njoṅ benntùn fa kù o, nku mu jume, bam su ghu'u.

²² Men ntse li mi a num mfà ndon nà, tsho zwe' o, ngù bam so ghu'u, nku mu jume. Mènnzwi tshob ndù: Amén, amén.

²³ Ngale'te kite yen ju nebètte là ntùm ṅwa'ni, ndo' ntse nezwe mbwete yi.

²⁴ A ghù mènnzwi nu men ntse là mi a num mfà ndon nà, men ntse là tsho num i mfà zwentù yi.

²⁵ Ngale'te kwé ju nefà num ghe'te z'a be bu i là, nyi'te bag bag mbwe Tshùaben, nton yen ju là num tômbwôg nele'te.

²⁶ Ngale'te lo' bu mbab bàn yen ju nele'te là, a be ju nekwimte, nton num tômbwôg nele'te. A be miagte ngù mènnzwi nu ntse là.

²⁷ Ngelaṅ z'a ghù mènnzwi nu men ntse là là, a be z'a fàn ku fà num ndu i mbagte wul i là, mba men ntse là mi a num mfà ndon nà, nsi tsho ntù i, fà zwentù yi, bam se ghu', nku mi jume, yen mènnzwi là tù' ju ndon netèt njoṅ benntùn fa.

²⁸ A be mènnzwi ke' fàn sàm nu, a be z'a làn nà, mba bo nsi yen i mba mèn z'a ke' fàn sàm nu là, a nsi bwe bon.

²⁹ Tshù ntshù' mfà num ghe'te là, mfà num mènnzwi z'a be ndà ndu i, mfàn ku i, mbagte wul i là.

³⁰ A be ze mandum ghù ghe'te, nkwate nu num nzwi i là, mb'a bwô ndù a te i mbwe Tshùaben, ngale'te ghù njoṅ nu fa ze ntshù' tshob là, ke séb sàm ju bwe.

³¹ Ndu mènnzwi ke nsi ket tse ntsha, mènnzwi nsi ket nge' num nukebwô tse.