Nesiaṅe 36 - NTSHOB NSI

Nu nandà bènnzwi ghajùndà

¹ Ben ndùbndùb num tunndà Galad, bon Makir, bon Manasé; mo' nzwit bon Yosèf nèn mbwe Mosé boa kamkam num tunndà Israél ntshob ndù:

² Tshùaben lo tshob tshùaben yag ndù: Bo be fà ngô bon ba Israél, ntam à tô bwe. Tshùaben bèn mbèn ntshob tshùaben àm ndù a fà ze ju ntsi' mfèt yag Sélofad bon tse tse bènnzwi.

³ Là, a be ze bo ghù du tshob num tsemo' tunndà ba Israél là, mba yub ju ntsi'i nsi tum num ze ba tà tshob nèn nkwi'te num tunndà benntùn tse bo nandà bwe là, bo séb yag ju ntsi'i.

⁴ Mba ngu'njù netô ndô lammbé nsi be se'e yub ju ntsi' nèn nkwi'te num ze tunndà bandum tse bo nandà bwe là, bo sô yen nà num ju ntsi' ba tà tshage.

⁵ Mosé tshob ba Israél mba Tshùaben tshob yi là ndù: Bon num tunndà Yosèf tshob nenùne.

⁶ Tshù ju ze Tshùaben tshob mfà num tunndà Sélofad li ndù: Ngonngon tse ghù nenandà bo mba zit mandum no, nda' ndù a b'a mèn num tunndà ba tà tshobe;

⁷ ndùlala, mo' ju ntsi' ke ghù ntum num mo' nèn num mo'o, mba zit mèn Israél lo nsi lat num ze ju ntsi' tunndà ba tà tshobe.

⁸ Mba zit ménngon no, z'a jù ndà mo' tunndà netèt bon Israél là, nsi ghù nandà be num tunndà ba tà tshobe;

⁹ ju ntsi' ke nsi tum num mo' tunndà nèn num mo'o, mba zit tunndà lo nsi lat num ze ju ntsi'i.

¹⁰ Bon Sélofad ghù be ndaṅndaṅ mba Tshùaben na' ntshob Mosé là,

¹¹ Mahla, Tirsa, Holga, Milka mba Noa, ngonngon Sélofad nandà boa bon fèt tà tshobe.

¹² Bo so bandum num tunndà Manasé, bon Yosèf, yub ju ntsi' ghô ntùm ntô benntùn tse bo tum num ba tà tshob là.

¹³ Tshù tshu netete mba ntshù' tse Tshùaben na' ntshùa njam Mosé nkàn bon Israél yi ngelaṅ ze bo na' mbe tômbo' Moab, nkaṅntse Yordan neghebte tu ngô Yériko là.