Nesiaṅe 31 - NTSHOB NSI

Neyagte mba' ba Madian

¹ Tshùaben tshob Mosé ndù;

² Yagte mba' ba Madian num nukebwô ze bo na' ngù num bon ba Israél là, o a' ghù ndùlala kà mbèn ntèt tunndà o.

³ Mosé tshob ba ntùm ngô ndù: Benntùn tum netèt bin nabte wut tshob num ntsho. Bo nsi ma' ba Madian ntsho. Tshùaben nsi yagte mba' ba Madian.

⁴ Bin nèn mba num zit tunndà lo, ntsho' benntùn ntsha' mbùm.

⁵ Bo nèn num ba Israél ntsha'ntsha' nke nsô benntùn ntsha' mbùm num tunndà ntsha' ntshob bà gham, nelo' tshu, nèn ntsho yi.

⁶ Mosé tum yub tshwèt ntsho, benntùn ntsha' mbùm num ta' tunndà, ntum yub boa ngale'te Finéas, nshum Eléazar, ze tshundà dù' nelàne na' mb'a mum mbu mi mba ba nta netô ntshob nu yi là.

⁷ Bo lo nèn ma' ba Madian ntsho mba Tshùaben na' ntshob Mosé, a tshob bo là, zwite bandum fafa;

⁸ mbèn ngù kà nzwite ba fenfen Madian: Evi, Rekem, Suhur, mba Réba, fenfen Madian tàn bo wat Balaam, nshum Béor ṅwi.

⁹ Bon ba Israél lo' zwi Madian boa bon tshob ngù ghandàtsha yi, ṅwat nyàm tshob mba tshu tshob fa.

¹⁰ Bo ton ngô Madian fa mba tshob mbàn.

¹¹ Bo lo' njoṅ bin ntsho mba nyàm nèn yi la' bo.

¹² Bo lo' ghandàtsha boa tshu fa nèn yi mbwe Mosé bo ngale'te Eléazar mba bwoṅ benntùn bon ba Israél, bo lo' yub nèn yi ntùm mbàn yub tômbo' Moab, kaṅntse Yordan, Yériko be mo' yoṅ ntse.

¹³ Mosé, ngale'te Eléazar, mba ghakwé mbwe benntùn nèn ntèt yube, bo ke yoṅ ntsho ntùm mbàn.

¹⁴ Mosé ya ntù ghakwé mbwe benntùn tse bo na' ntsho' yub ndù bo lo' bwoṅ ghama' ntsho, ghatô benntùn ntsha'ntsha' boa nkù nkù tse bo ke mfe tshwèt ntsho là.

¹⁵ A tshob bo ndù: A b'a ke, bin faṅ bènnzwi ke zwite à?

¹⁶ Nummbe a na' mb'a bènnzwi, ngelaṅ ntsha Balaam bèn ntènte ba Israél ndù kà bo ju' ntshu Tshùaben, ngelaṅ ntsha' mà Péor, kà ngokèt ndùb tshùb ntse'te ben Tshùaben.

¹⁷ Ndonni, bin zwite njoṅ bandum mba njoṅ bènnzwi fa tse bo lèn bandum nà.

¹⁸ Kà bin zwite bonngon tse bo ke' lèn bandum nà, bin faṅ yub ndùlala, bo tù' kuan tsine.

¹⁹ Zin tu wut, bin tswe à njam mbàn ke tsho ntùm mbàn num lé'njù sammbàa, bin ze, bin zwi mèn, ke nekwag fe mèn nà, bin nsi lànte wut num mbatte lé'njù tat bo mbatte lé'njù sammbàa; bin nsi ghù ndùlala mba ghandàtsha tsine.

²⁰ Bin nsi ghù be ndaṅndaṅ num ba nzwe ke tam, tshu ngub, tshu tse bo lo' à nyiaṅ mbwe kà mba' yi là, tshu tse bo lo' à tù kà nkom yi là, bin lànte mba tshen nà.

²¹ Ngale'te Eléazar tshob ghama' ntsho tse bo fe tshwèt ntsho là ndù: Tshù mba ntshù' ze Tshùaben na' mfà Mosé tshwèt nke ntshob li ndù.

²² A b'a nda' tùn gol, silba, tùn meba, fe,

²³ boa njoṅ tshu fa ts'a ke' be kù là, bin nsi lo' ntse nelànte ju, lànte yub yi. Njoṅ tshu fa' ts'a num nkù là, bin ma' ntse.

²⁴ Bin nsi sôg nzwe tsin num lé'njù sammbàa kà tù' ben nelàne, bin nsi ghù ndùlala kà tsho ntùm mbàn.

Neghabte ntsi' ntsho

²⁵ Tshùaben tshob Mosé ndù:

²⁶ Yu tu wut mba ngale'te Eléazar, mba ghakwé mbwe ntùm tunndà, bin siaṅ njoṅ benntùn mba njoṅ tshu fa tse bo fe yi tshwèt ntsho là, benntùn mba nyàm.

²⁷ O nsi ghabte tshen ntsi' ntsho là ghama' ntsho tse bo fe ntsho là mba ntse'te.

²⁸ O nsi kwé ze ju Tshùaben ghama' ntsho, ta' mèn num tu ben nkù tàn, nyàm nkù tàn, nyàmna', kekwène, mba nyàm nke'nke'e.

²⁹ Bin nsi kwé yen ju là, bo lo' à num ju ze bo kwé là. Bin fà ngale'te Eléazar; a be ze ju Tshùaben z'a num nkwé num ju ze mèn ghù là.

³⁰ Mbe se' num ze ju bon ba Israél, bo nèn num benntùn ṅam ntàn, ndo' ta' mèn, nèn num nyàmna', kekwène, nyàm nke'nke'e, num njoṅ i fa, bin lo' ta' i ntshù' num ṅam ntàn mfà tunndà Lévi, tse bo num mfa' num ndà Tshùaben nà.

³¹ Mosé bo ngale'te Eléazar ghù ju ze Tshùaben na' ntshob Mosé ndù a tshob benntùn nà.

³² Tshu tse bo na' ngom tshwèt ntsho là, tse bo na' ngabte a tù' là, tse nke'nke'e 675 000.

³³ Tse ndùbndùb 72 000,

³⁴ kekwène be 61 000;

³⁵ nse' num benntùn, yen nà la't'a ndù bènnzwi tse bo nandà là, bo be 32 000,

³⁶ bo ghabte tshen tshu nze bàa, bag i z'a na' nèn ghama' ntsho là na' mb'a nyàm nke'nke' 337 000;

³⁷ ze ju Tshùaben ze bo na' nsô num tshen tshu là tum nyàm 675;

³⁸ nyàmna' 36 000; ze ju Tshùaben tum nyàmna' 72,

³⁹ kekwène 30 500; ze ju Tshùaben tum 61;

⁴⁰ num benntùn 16 000; tse Tshùaben z'a ghù bwe là be benntùn 32.

⁴¹ Mosé fà ju z'a na' ndo' num bwe là ngale'te Eléazar; mba Tshùaben na' ndiag là.

⁴² Mo' bag ju ze bo na' ngabte ghama' ntsho a tù' là be benntùn, ntse'te ba ntùm ngô, ze Mosé na' nsô là.

⁴³ Yen bag i là z'a na' ntù' mbe ze ba ntùm ngô là na' mb'a: Nyàm nke'nke'e 337 000;

⁴⁴ nyàmna' 36 000,

⁴⁵ kekwène 30 500;

⁴⁶ ngù benntùn 16 000;

⁴⁷ Mosé lo' ze ju Tshùaben num tshu bon ba Israél ta' mèn num benntùn ṅam ntàn, ta' nyàm num nyàm ṅam ntàn mfà tunndà Lévi ze bo num mfa' num ndà Tshùaben, be mba Tshùaben na' ntshob yi là.

Nefà ju bwôntù Nsi

⁴⁸ Benntùn tse bo na' mbe tshwèt ntsho nke ntshagte ghama' ntsho ntsha' mbùm, nkù nkù là, ghebte mbaṅ Mosé ntshob yi ndù.

⁴⁹ Kuan tsho siaṅ benntùn tse bag na' nke ntô tshwèt ntsho là, mba ta' i ke tsi bwe.

⁵⁰ Ndùlala, tshù tshu tse bag se' yi mbwe Tshùaben ndù bo biagte nukebwô ben tshag yi mbwe Tshùaben ni: Tshù tùn gol, mbwô, kwa ntu bu, mba'ntoṅ boa tshu neghette tù, tse mba we lo fon nà.

⁵¹ Mosé bo ngale'te Eléazar kwé gol là bo, a na' mb'a tshu ndù bo ndo' a mbu kà nabte yi là.

⁵² Tshu tùn gol, tse bo na' nkwé a be tse Tshùaben nà na' mb'a: Ndô nkàb 16 750, tse ghatô ghama' ntsho ntsha'ntsha' mba nkù nkù, na' mfà là.

⁵³ Ba soyé nke ndo' ntsha', a nke ntsho be bam mba zit mèn no netèt bo.

⁵⁴ Mosé bo ngale'te Eléazar kwé sen tùn gol là bu ghatô ghama' ntsho ntsha'ntsha' mba nkù nkù, ndo' nèn yi ntùm ndà mbumte a be ju nekwimte bon ba Israél mbwe Tshùaben.