Nesiaṅe 30 - NTSHOB NSI

¹ Mosé tshob njoṅ i fa bon Israél, njoṅ i fa ze Tshùaben na' ntshob yi ndù a ghù là.

Ntshù' num tshu nebam nkô

² Mosé tshob kamkam Israél ndù: Tshù ju ze Tshùaben bètte ndù bin ghù li:

³ Mo' mèn nke mbam neghù mo' nu Tshùaben, ke nebam neze mo' ju num tu wul i lo, k'a tag ke ghù yen ju là, ze kua' tu wul i bèn ntshob là.

⁴ Ngelaṅ ze ménngon z'a ke' ndà tàab bam nu Tshùaben, ke nebam neghù mo' nu num tu wul i lo là,

⁵ a be ze tàab ju' ndù a bam nu Tshùaben, ke num ze tu wut lo, a be z'a ke' tshob nu yi là, mba njoṅ nu fa z'a bam neghù là ghô ze be ndùlala mb'a bam nà.

⁶ Là, a be ze tàab gha yi be num lé'njù z'a na' mbam nà, mba yen nebam nà nèn banban. Tshùaben ke nsi bètt'é yen nu là, nummbe tàab gha yi.

⁷ A be z'a ghù be nandà, mbe ghù nandà ndù nu nebam yen nu là ke' tu i, ke nebam mo' nu a be tum ntshu i a ke ju' lo,

⁸ a be ze ndu i ju' ke tshob nu yi be num sen lé'njù là, mba yen nebam nà nsi ghô. Mba z'a na' mbam mfà num tu wul i là ghô be ndùlala.

⁹ A be ze ndu i ju', nga yi, be num sen lé'njù là là, mba yen nebam nu là, nèn banban, mba nu z'a na' mbe tum ntshu i mfà num ze tu wut, a ke ju' là, nèn be banban mbwe Tshùaben.

¹⁰ Nebam nu ze mfôg mènnzwi, ke mènnzwi ze bo yoṅ i ntùm nandà là nsi ghô a be ndùlala, k'a bam be nu ke lo.

¹¹ Ngelaṅ ze mènnzwi nandà bam nu, ke nu ne kàn mfe bwe tum ntshu i be là;

¹² ndu i ju' ke tshob nu yi, ke gha, mba yen nebam nà ghô be ndùlala, mba nu z'a bam mfà num tu wul i là ghô be ndùlala.

¹³ Là, a be ze ndu i tshob ndù a gha be num lé'njù z'a ju' là, mba yen nu là, z'a bam nà nsi b'a banban, ndu i gha yen nu là mba Tshùaben ke nsi bètt'é sàm nu bwe.

¹⁴ Mènnzwi bam, be ke lèn nu lo, ke netswe be ke jù ju, mba ndu i ghù negha ke nebam no, ndù yen nu là be.

¹⁵ Ndu i ju' ke tshob nu, kà njù làn, mb'a bam nà, mba yen nu là nsi be, nummbe ndu i ke' tshob nu yi num lé'njù z'a na' nju' là.

¹⁶ A be z'a ju', ke tshob nu, njù làn k'a nke nga là, mba ntsha nsi vù à tu i.

¹⁷ Tshù ntshù' ze Tshùaben na' ntshob Mosé mfà num mandum bo nzwi i, mfà num tà bo ngon i z'a ke' yoṅ nandà là.