Nesiaṅe 28 - NTSHOB NSI

Ju nefà nde'te Nsi yi num tsemo' lé'njù

¹ Tshùaben tshob Mosé ndù:

² Tshob ba Israél, mfà ntshù' bo ndù: Bin zi'te nefà yàm ju ghamte, jule'te, z'a b'a yàm jujù là ngelaṅ i, jujù ze bo num nton mbwôge, ywèt tse lamte là.

³ O a' tshob bo ndù: Tshù jujù ze bin nsi nèn yi mbwe Tshùaben ni: Bon njùmbwe ke mbit bàa, z'a tswe tamngu' là, mba num zit ta' lé'njù lo, nton à kù fa, nke ngù be ndùlala njoṅ ngelaṅ fa.

⁴ Bo nsi ton mbwe mén njùmbwe mà nkebnjù, nton mo' kà nyam ntume.

⁵ Ngù mbab bàn nze ntshù' num nze gham, ndo' ta' nda mfèt ngabte nze kuà, ndo' nze ntshù' ntshwibte yen mbab bàn nà yi, mfèt mi a' tum à num tù mfèt mi bo tsham nà.

⁶ A b'a ju neton a kù, a ghô ndùlala yoṅ ntshù', be mba bo na' nke ngù num mbat Sinaï là, jujù ze ywèt tse num ndamte Tshùaben nà.

⁷ Bo nsi fi' mfèt, ghabte nze kuà, ndo' ta' nz'é, miag num mbwe mén njùmbwe ngù miag ndu' neta mbwe Tshùaben ndà mbumte.

⁸ Mbe se' num mbatte njùmbwe a be mà nkebnjù là nyam ke yoṅ ntume, ngù be ndaṅndaṅ mba num mbwe mén njùmbwe là, ju nefà mba ndu' nemiag nsi. A b'a jujù Tshùaben z'a lamte là.

Num lé'njù Sabbat

⁹ Num lé'njù Sabbat, bo ton bon njùmbwe tamngu', ke mbit, bàa, ndo' mfèt nze bàa num nze gham, ntshwibte mbab bàn yi, mbèn miag ndu' be ndaṅndaṅ.

¹⁰ A b'a ju neton num lé'njù Sabbat kà ngù ju neton a kù z'a nsi ke be be ndùlala njoṅ ngelaṅ fa là, mbèn ngù ndu' nemiage.

Num mbwe lé'njù mum ṅwù

¹¹ Mba num zit mbwe neto'te mum maṅwù lo, bin nsi ton du mfô bàa a kù mbwe Tshùaben, ngù kekomnjù ntshù', ngù bon njùmbwe tamngu' sammbàa nyàm ke mbit.

¹² Mbe ton mba zit ndu mfô lo, ndo' mfi' mbab bàn nze tat num nze gham, ntshwibte boa mfèt, nse' num kekomnjù, ndo' mbab bàn nze bàa num nze gham, tshwibte bo mfèt.

¹³ Mbe se' mba num zit mén njùmbwe lo, mba num zit ngelaṅ no, bin lo' mbab bàn ntshwibte bo mfèt nze ntshù' num nze gham mba num zit ngelaṅ no. A b'a ju neton a kù ze nelamte, mbe jujù Tshùaben.

¹⁴ Ndu' nemiag nsi b'a: Neghabte ntshaṅ ndu' ntshù' nze bàa, kà miag num ta' ndu mfô ntshù', ngabte ta' ntshaṅ nze tat, ndo' ta' nze miag num ta' kekomnjù, ndo' nze ntshù' num nze kuà miag num mén njùmbwe. Yen ni b'a ju neton a kù, mba num zit mbwe maṅwù ntùm ta' ngu'njù,

¹⁵ nkwi'te ta' fot mbwe nefà Tshùaben num nukebwô, nkwi'te num ju neton a kù mba ndu' nemiag z'a b'a ju neghù njoṅ ngelaṅ fa là.

Num lé'njù Pasa

¹⁶ Num mbwe maṅwù ntùm lé'njù ntshob kuà gham, a b'a Pasa num neghamte Tshùaben.

¹⁷ Num lé'njù ntshob tàn gham num ṅwù, a b'a lé'njù njùa. Bo nsi jù be bàn keko' num lé'njù sammbàa.

¹⁸ Num mbwe lé'njù, bo ghù ntse'te neghamte Nsi. Kà bin fa' sàm ju neta num sen lé'njù là.

¹⁹ Bin nsi fà jujù neton a kù Tshùaben, a b'a du mfô bàa, kekomnjù ntshù', ngù bon njùmbwe tamngu' sammbàa. Bin nsi lo' à nyàm ke mbit.

²⁰ Nse' num mbab bàn ze bo tshwibte là, bin lo' mbab bàn nze tat num nze gham num ta' ndu mfô, ndo' nze bàa num nze gham num ta' kekomnjù,

²¹ nse' mba num zit mén njùmbwe lo num njùmbwe sammbàa, bin nsi kwi'te nze ntshù' num nze gham mba num zit ngelaṅ no,

²² nkwi'te ta' fot mbwe num nukebwô neghù mat nebiagte nukebwô num tu zine.

²³ Bin nsi ghù yen nà kwi't'a num ju neton a kù mba ndu' nemiag z'a b'a ju neghù njoṅ ngelaṅ fa là.

²⁴ Mba num sit lé'njù lo, num lé'njù sammbàa, bin nsi fà jujù Tshùaben, jujù nelamte, kà ngù ju neton a kù mba ndu' nemiag z'a b'a ju neghù njoṅ ngelaṅ fa Là.

²⁵ Num nemiagte num lé'njù sammbàa, a b'a ntse'te neghamte Nsi, ke fa' sàm ju neta num sen lé'njù là.

Num lé'njùa ba ngabnjù

²⁶ Mbe se' num lé'njù nefà mbwe ju Tshùaben, num lé'njù njùa num ngabnjù, num nefà mbwe ju nswe, bin nsi bumte neghamte Nsi, kà bin fa' sàm fa' neta num sen lé'njù là.

²⁷ Bin nsi fà ju neton a kù Tshùaben, ju nelamte, a b'a du mfô bàa, ta' kekomnjù ntshù', ngù bon njùmbwe tamngu' sammbàa.

²⁸ Kà ngù ju nefà, mbab bàn netshwibte bo mfèt, mfèt nze tat num nze gham num ta' ndu mfô, mfèt nze bàa num nze gham num ta' kekomnjù;

²⁹ mba num zit mén njùmbwe lo, mba num zit ngelaṅ no, bin lo' nze ntshù' num nze gham mba num zit mén njùmbwe lo.

³⁰ Kà nkwi'te ta' fot mbwe nefà num nebiagte nukebwô num tu zine.

³¹ Bin nsi fà tshen tshu là, nkwi'te num ju neton a kù, mba ndu' nemiag z'a b'a ju neghù njoṅ ngelaṅ fa là, njam tshu nefà fa là. Bin nsi lo' nyàm ke mbit kà nèn yi.