Nesiaṅe 27 - NTSHOB NSI

Nu bon bènnzwi nejù ndà

¹ Ngonngon Sélofad, nshum Héfer nshum Galad, nshum Makir, nshum Manasé, nshum Yosèf, ndèn mube: Mahia, Noa, Holga, Milka ngù Tirsa.

² Bo se' mbwe Mosé, mbwe ngale'te Eléazar, mbwe kamkam ntùm ntse'te, mbwe ndà mbumte ntshob ndù:

³ Tà yag kwù num kônkwa, a lo ke be netèt ghatatu, ke be mba netèt benntùn tse bo na' ntamte ntshu, nga nu mbwe Tshùaben nà, netèt ben Koré, a na' nkwù à be kua' num nukebwô tse. A lo ke bwe tse mén mandum.

⁴ A bwô ndù lén tà yag bi netèt tunndà, mb'a na' mbe ke ghù mén mandum nà ké? Fà yag dù' tsha' mba fèt tà yag là.

⁵ Mosé lo' yub nèn yi mbwe Tshùaben.

⁶ Tshùaben tshob Mosé ndù:

⁷ Ngonngon Sélofad tshob nenùne, o nsi fà yub ju ntsi'i mba fèt tà yub là, mba ju ntsi' tà yub bo.

⁸ Tshob bon Israél ndù: Ngelaṅ ze mèn kwù ke faṅ mén mandum nà, mba bin nsi fà ju ntsi' i ngon i.

⁹ A be z'a ke' ghù mba mén mènnzwi là, bin fà ze ntsi' fèt tse.

¹⁰ A be ze mba fèt tse ke' be là, bin fà fèt tàab.

¹¹ A be ze tàab na' mbe ke ghù fèt là, bin fà mo' mèn z'a ghebte num yen tunndà là. Là a b'a yen mènghua bèn ghù ju là. A b'a ju z'a nsi be netèt Israél, mba ta' ntshù', mbe ndaṅndaṅ mba ntshù' mi Tshùaben na' mfà Mosé là.

Yoshua jù ndà Mosé

¹² Tshùaben tshob Mosé ndù: Ko' mfe num ku mbat Avarim, ndôte ngô ze me fà bon Israél là.

¹³ O a' yen, bo nsi lo' o, ndù o nèn ntèt tsho ben mb'a na' mbe num mfèl o Aron nà.

¹⁴ A b'a nummbe, a lo be Sin, ngelaṅ ze benntùn na' ndiag Tshùaben ntsha là, bin ke ju' nze àm, ngelaṅ ze me na' nke mbètte ndù bin la'te yàm nelàne mbwe bo, ntse tum num gho là. A b'a nu ntse Mériba-Kadèsh num kônkwa Sin.

¹⁵ Mosé tshob Tshùaben ndù:

¹⁶ A bwô ndù Nsi z'a num ngù kà njoṅ tshu fa ts'a na' nabte nzwiag là, tsho' mèn z'a nsi tsin mbwe bwoṅ benntùn,

¹⁷ z'a nsi ghù bo tume, z'a ghù bo bèn njam nà, a be ndùlala mba ntse'te ben Tshùaben ke nsi be à mba njùmbwe ze ngabéb yub ke' be là.

¹⁸ Tshùaben tshob Mosé ndù: Lo' Yoshua, nshum Nun, a b'a mènntùn ze ywèt tshàm be ntù i là. O nsi yab mbu tu i.

¹⁹ O a' lo' i nèn nda'te mbwe ngale'te Eléazar mba mbwe ntse'te, nte i num fa' se mbwe bo.

²⁰ O nsi fà mo' bag ngù' o yi, ndù njoṅ ntse'te bon Israél fa ke nju'ni.

²¹ A nsi nèn la'te wul i mbwe ngale'te Eléazar, ngale'te tsin mbwe Tshùaben mbètte ju ze Urim tshob là. Yen nà nsi be tshùa, yi, mba ntse'te bon Israél nsi tume, bèn mbèn njam, a bagt'a ndù njoṅ ntse'te fa.

²² Mosé ghù be ndaṅndaṅ ju ze Tshùaben bètte yi là. A lo' Yoshua nèn nda't'é ngale'te Eléazar mba ntse'te ba Israél fa.

²³ A yab mbu tu i, nte i num fa' se, be ndaṅndaṅ mba Tshùaben na' ntshùa njam Mosé ntshob ndù a ghù là.