Nesiaṅe 24 - NTSHOB NSI

Balaam soṅ mba ba Israél nsi be ntùm fu' là

¹ Balaam yen ndù a bwô Tshùaben nenaṅ mbotni num Israél, nummbe a ke' nèn ze mba tsemo' benntùn nà, num nediag ngame, a fa se i ndôt'é kônkwa.

² Balaam yen ndù ba Israél tswe tunndà tunndà.

³ Ywèt Nsi se' num i, a tshob ndù: Ntshob Balaam, nshum Béor: Ntshob mènntùn ze miag mi làn nà.

⁴ Ntshob mènntùn z'a num nju' ntshob Nsi là, z'a num njen ju ze ngaghù neta num nda'te yi ngelaṅ z'a vù nsi, miag mi gha' ntenge là.

⁵ Tsho ntàb bwô neshu me Yakob mba tsho dù'ntswe me Israél!

⁶ A sate nèn bag bag mba nta'ntse mi a num nswe' tu mbat là, ntswe mba nà ze bo dù' kaṅntse là, mba ntù tshom boa ngage mi Tshùaben bwe kaṅntse là.

⁷ Ntse dun ntùm lônga kà nke mfètte, nke nzwi' tse tshu neywit fa. Ze nu mfen ta ntshùa Agag. Nufen se ko' nèn tù.

⁸ Nsi ghù a tum Egipto. A ghù neta mba nyatnyàm nà. Mi ngô tse bo à bo ke' be tum mebwô là, mbe'te mvôg mube, ndo' nka'-nkét ntamte yub yi.

⁹ A bag wul i nsi, nô nsi mba ngwayit là, mba tshùagkèt nyàm nà. We z'a nsi ghù a lo nsi à? Fite be mènntùn z'a naṅ fite num o là, ndon tu mènntùn z'a nsi naṅ ndon tu o là.

Balaam soṅ mba ba Israél nsi be ntùm fu' là

¹⁰ Balak ya ntù Balaam mbu' mbu mi ntshob ndù: Me na' ntsiaṅ o à ndù o naṅ ndon tu ghakeban tshàm, tshù, a ndonni à yoṅ tat z'o tshwèt nke naṅ be mbotni num bo là.

¹¹ Mb'a b'a ndùlala là, nèn la' bin. Me na' ntshob ndù me nsi fà tshu kam wù yàme, Tshùaben ghù o bi tshen tshu là.

¹² Balaam bùnte yi ndù: Me na' ke ntshob ghantum ts'o na' ntum me là ndù:

¹³ Balak fà be nkàb boa tùn gol z'a be ndà i là me fa, mba me ke bagte tshàm ntshù' Tshùaben, neghù numebwô ke ze kebwô lo yàm tu ké? Me ke nsi tshob à ju ze Tshùaben nsi tshob me là ké?

¹⁴ Ndonni, me nèn à ju tshàm ben, se' me te bu num o, mfà num ju ze tshen ben ni nsi ghù ndù mànjam num tsho ben nà.

¹⁵ A bèn ntshob nu yi ndù: Ntshob Balaam, nshum Béor. Ntshob mènntùn ze miag mi làn nà.

¹⁶ Ntshob ngaju' ntshob Nsi, z'a ghù zenu Mèn-mfetù, nke njen ju ze ngaghù ngù' num nda'te yi, ngelaṅ ze ya' i tshùa, miag mi bèn nga' là.

¹⁷ Me yen i, là a ke' b'a num ndonni. Me tshwèt ndôt'é, ke yoṅ ngebte, mo' sa maṅwù tum ju Yakob, kôg nesa' ngô yi bèt ntum ze Israél. Nke nyute nge' ba Moab fa mbèn mbiagte nshumnshum Set fa.

¹⁸ Ngô Edom nsi vù ntsho. Ghakeban Seir nsi ma' ntsho ton i. Israél la'te neta i.

¹⁹ Ngatô njù nsi bèt tum ju Yakob. Biagte mbwe' ju z'a tù' ntùm tusô là.

Balaam soṅ mba ghakeban Israél nsi bi là

²⁰ Balaam yen Amalék mbèn ntshob nu yi ndù: Amalék, mbwe ngô netèt ngô yàme. Ju z'a nsi se' ndamnjù là b'a netù' fam.

²¹ A bèn njen ba Kén, ntshob bo ndù: Yu dù'ntswe bwô, nta o te nkàn o à num gholoṅ.

²² Mba ndùlala, Kain nsi tù' ju lambwôge.

²³ Nemiagte a tshob ndù: A b'a nge'. We z'a nsi yôg ngelaṅ ze Nsi nsi ghù nu là à?

²⁴ Tshù sitima là, nke mfe Kitim. Bo nsi ghùtni Asur, ghùtni Eber, mba yi ze tù' nenèn bi.

²⁵ Balaam lo nèn tse ntùm ngô i, Balak bèn nèn ze bag i.