Nesiaṅe 23 - NTSHOB NSI

¹ Balaam tshob Balak ndù: Nabte tômbwôge neghamte Nsi bwe nsen ni sammbàa, mbèn njab du mfô sammbàa, ngù nkekomnjù sammbàa.

² Balak ghù be ndaṅndaṅ ju ze Balaam tshob yi là. Bo tamte ben bàa, nton ta' ndu mfô mba ta' kekomnjù mba num zit tômbwôg lo.

³ Balaam tshob Balak ndù: Tsin mbaṅ yu ju netone, num yen ngelaṅ nà me na' ndo mbaṅ bwe, mo' ndù Tshùaben se' bag yi bumte, k'a nsi tshob à nu ke me lo, mba me nsi ghù o lène. A lo nèn num manze.

⁴ Nsi se' mbwe Balaam, a tshob yi ndù: Me ghù bo nabte tômbwôge sammbàa, nton ta' ndu mfô mba ta' kekomnjù mba num sit tômbwôg lo.

Balaam naṅ mbotni num ntô Israél

⁵ Ndùlala Tshùaben so ntshob mi ntshu Balaam, ntshob yi ndù: Bèn njam mbaṅ Balak. Tshù mb'o nsi tshob yi li ndù:

⁶ Balaam bèn njam mbaṅ Balak, njen i ndù a tsin mbaṅ ze ju netone boa kamkam Moab.

⁷ A lo' ntshobe ntshob ndù: Balak ghù me fe Aram nse'e. Mfen Moab tsiaṅ àm, me fe num ba mbat bag ntumnyam nse'e. Se' naṅ ndon tu Yakob num yàm tu. Se' nkag tuswe tu Israél num yàm tu.

⁸ Me nsi naṅ ndon tu mèn ze Nsi ke' naṅ ndon tu i l'à ndùke?

⁹ Ngelaṅ ze me tsin num ghô nke ndôt'é, ngelaṅ ze me tsin num kônga là, me yen bwoṅ benntùn ndù bo tsin, ke so wut tshob netèt tsemo' ntumntum.

¹⁰ We z'a ku'ni nesiaṅ mbab Yakob à? Mba nelèn nzwit Israél z'a be ntsha'ntsha' là à? A bwô ndù me kwù vù ben netsine. Yàm nemiagte fute ze!

¹¹ Balak tshob Balaam ndù: O ghù à ke me à? Me lo' o nse' yi ndù o naṅ ndon tu ghakeban tshàm, o se' nke naṅ à mbotni num bo à?

¹² Balaam bùnte ntshob yi ndù: Ngelaṅ me tshwèt ntshob nu là, mba me ke tshob à ju Tshùaben fà ntshu àm nà ké?

Balaam naṅ mbotni mbatte bàa

¹³ Balak bèn ntshob ndù: Se' bag wù tsin mo' dù' ghua, o yen tshen benntùn nà, o lo ke njen à nda' mo' bag, num bo, ke yen yub fafa. O nsi tsin num yen dù' là kà naṅ ndon tu bo num yàm tu.

¹⁴ A lo' i nèn yi dù' netsin njen dù' mebwô, tu mbat Pisga, nkut ntômbwôg bwe sammbàa, nton ta' ndu mfô mba ta' kekomnjù mba num sit tômbwôg lo.

¹⁵ Balaam tshob Balak ndù: Tsin mbaṅ yu ju netone, me nèn mfe dindin mbébe.

¹⁶ Tshùaben se' bwe. Balaam nso ntshob ntshu i, tshob yi ndù: Bèn njam mbaṅ Balak, tshù mb'o nsi tshob li ndù:

¹⁷ Balaam bèn njam mbaṅ Balak, njen i, a tsin mbaṅ ze ju netone boa kamkam Moab. Balak bètt'é ndù Tshùaben tshob ndùke?

¹⁸ Balaam tshob ndù: Lo tù me Balak, nju'u, kù' ntoṅ, me nshum Tsipor.

¹⁹ Nsi ke' b'a mènntùn num netatte. Ke mén Adam no, netshob nu, mbèn ntshob ndù me ze ke! A num ntshob ke ghù ké? A num ntshob ta' nu ke ghù mb'a tshob là ké?

²⁰ Bo fà fa' me, ndù me naṅ mbotni, nummbe a naṅ mbotni, me ke' ghù nebate.

²¹ Bo num nke nte lag num Yakob, ke yen mo' nge' z'a ghù là, ke yen mo' nukebwô ze Israél ghù là. Bo Tshùaben Nsi i bèn mbe. Bo tshwèt nke mfà ghamte ndùb tun mfen yub.

²² Nsi lo ghù a tum Egipto. A ghù neta mba nyatnyàm nà.

²³ Nebètte nu mo' ju ghua ke' be Yakob. Nebètte nu ka ke' be Israél.

²⁴ A lo be ngelaṅ z'a na' nkô là, a tshob Yakob, mba Israél ju ze Nsi na' ntshob là. Tshù benntùn nà, tse bo lo nsi mba nzwimàntô, ntsin tù mba ngwayit là. A ke nsi nô nsi ke be ndù a fèt nyàm z'a ghom nà, mbèn nu mba lem tse.

²⁵ Balak tshob Balaam ndù: A be z'o ke' naṅ ndon tu i là, kà naṅ mbotni num i.

²⁶ Balaam tshob yi ndù: Me lo ke tshob wù ndù me nsi ghù a be ju ze Nsi tshob me là ké?

Balaam naṅ mbotni mbatte tat

²⁷ Balak tshob Balaam ndù: Se' me lo' o nèn yi mo' dù' ghua, mo' ndù Nsi bam wù ndù o naṅ ndon tu tshen ben nà me.

²⁸ Balak lo' Balaam nèn yi tu Péor, z'a tsin mbwe kônkwa là.

²⁹ Balaam tshob yi ndù: Nabte ntômbwôg nsen ni sammbàa, ngù du mfô sammbàa, mba nkekomnjù sammbàa. Balak ghù be ndaṅndaṅ mba Balaam tshob yi là. A ton ta' ndu mfô mba ta' kekomnjù mba num sit tômbwôg lo.

³⁰ Balak ghù ndaṅndaṅ mba Balaam na' mbètt'é yi là, mfà ta' mén mfô neton nde'te Nsi yi num mba sit tômbwôg tshule'te lo.