Nesiaṅe 20 - NTSHOB NSI

Ntse Mériba

¹ Njoṅ *gi*ntse'te ba Israél fa zin nkum Sin, ntùm mbwe maṅwù, nte ndà Kadèsh. A b'a bwe ze Miriam na' nkwù là, bo tshoṅ i bwe.

² Ntse bwoṅ benntùn, bo tshobte Mosé bo Aron.

³ Bo diag Mosé ntsha ntshob ndù: Bag na' nkwù yag mba fèt tshag là, mbwe Tshùaben mb'a bwô.

⁴ Bin na' ndo' ntse'te ben Tshùaben nse' yi num kônkwa numke? Ndù bag kwù mba bwoṅ nyàm tshag ké?

⁵ O na' nsô yag Egipto, nse' yi num yen kebwô dù' li numke? A ke' b'a dù' neywit ju, ke neywit tù neyàm ntàme, ke nebwe nkùa, mba nda' ntse nenu ke bwe.

⁶ Mosé bo Aron faṅ ntse'te, nse' ntshundà mbumte, ngwù nsi kabkab, kuni Tshùaben ṅwag bo.

⁷ Tshùaben tshob Mosé ndù:

⁸ Lo' kôg so, mba mfèl o Aron, ntse'te njoṅ ntse'te fa. Bin nsi tsin mbwe bo, tshob gholoṅ a nsi fà ntse, bin nu. O a' ghù ntse tum num gholoṅ bo nu, mba bwoṅ nyàm tshobe.

⁹ Mosé lo' kôg se s'a na' mbe mbwe Tshùaben nà, ngù be ndaṅndaṅ mb'a tshob là.

¹⁰ Mosé bo Aron tse'te bwoṅ benntùn mbwe gholoṅ ntshob bo ndù: Bin ju'u me ghatatu, bag ku'ni neghù ntse tum num sen gholoṅ ni ké?

¹¹ Mosé bù' bu i tù, ndab gholoṅ yoṅ bàa, ntse tum yàme, bwoṅ benntùn nu, mba bwoṅ nyàm tshobe.

¹² Tshùaben tshob Mosé bo Aron ndù: Mba bin lo mbe ke ju' ntshu àm, ngamt'àm mbwe ba Israél là, a nsi tshùa ndùlala, bin ke bèn ntshagte yen ntse'te li ntùm ngô ze me na' mfà yi là.

¹³ A b'a ntse Mériba là. Ntse ntsha dù' ze ba Israél na' nkam Tshùaben bwe, a la'te ze nelàn bwe là.

Mfen Edom ke bam ndù Israél tshùa

¹⁴ Mosé tsin Kadèsh, ntum benntùn mfen Edom ndù: Tshù mba mfèl o Israél tshob li ndù: O lèn njoṅ nge' fa ze bo yen nà.

¹⁵ Ba tà tshage lo swe' nèn mà Egipto ntswe bwe ngu'njù yàme, ba Egipto ghùtni yage, bag mba tà tshage.

¹⁶ Bag lo kua' Tshùaben, a ju' nze yag ntum ta' Angél ndù a se' nsô yage. Tshù bag li Kadèsh, ngô z'a be ndù yu ngô là.

¹⁷ Faṅ yag bag tshùa ntùm yu ngô. Bag ke nsi tshùa ntùm ba nà ke bèn ntshùa ntùm ba nkùa. Bag ke nsi nu tshag ntse tô. Bag nsi zin à be num koṅnze ndùb ndaṅndaṅ, ke nèn bu kwéb, ke nèn bu zwim kà ntôg yu ngô ntshùa.

¹⁸ Là Edom bùnte yi ndù: O ke nsi tshùa à me la'. O ne ntshùa, mba m'a' sô tshu ntsho bag wù le'.

¹⁹ Ba Israél tshob yi ndù: Bag nsi ko' à be num manze, a be ze bag nu ntse mu bag à bwoṅ nyàm tshàm nà, mba m'a' fà njoṅ nkàb i wù. Me tshwèt ndon ta' ju wù nda' ntshù': Nezin nku ntshùa.

²⁰ Là Edom bùnte ndù: O ke nsi tshùa. Ntshob ndùlala, ntum boa bwoṅ benntùn nke ntshètt'é.

²¹ Edom ghù be ndùlala kà nga mbe kà Israél tshùa ntùm ngô i, ndùlala, Israél kù i nèn ngùanesà.

Vù Aron

²² Bo lo Kadèsh, boa mbumte bon Israél, nzin nkum kônga Hor.

²³ Nkum kônga Hor, ndùngô Edom, Tshùaben tshob Mosé bo Aron ndù:

²⁴ Bo nsi sô Aron netèt bin tum i ju ba tà tse, nummb'a ke nsi tsho ntùm ngô ze me nsi fà bon Israél là, mfe nummbe bin na' gha ntshu àm nkaṅ ntse Mériba.

²⁵ Lo' Aron bo mén i Eléazar ngù bo ko' nèn kônga Hor.

²⁶ O nsi kwé nzwe Aron, ma' num mén i Eléazar. Yen nà be mi, Aron tum netèt bin, ntù' bwe nkwù.

²⁷ Mosé ghù be ndaṅndaṅ mba Tshùaben na' bètte yi là, bo lo be mbwe njoṅ mbumte fa nko' nèn kônga Hor.

²⁸ Mosé kwé nzwe tse Aron, ma' num mén i Eléazar. Aron tù' nkwù num tu mbat bwe. Ndo, Mosé bo Eléazar bèn nswe' tu mbale.

²⁹ Njoṅ mbumte fa yen mbe ze nu Aron yà mi, njoṅ tunndà Israél fa làn i num lé'njù ṅam ntat.