Nesiaṅe 17 - NTSHOB NSI

Ndô labinda ben Koré

¹ Tshùaben tshob Mosé ndù:

² Tshob ngale'te Eléazar, nshum Aron, ndù a ṅwat nka mbwôge netèt ngwat-mbwôge, nummbe a b'a ju ndù bo fà Nsi, ndù kà mbwôg kù yube.

³ Bo lo' nka mbwôge benntùn tse bo lo' yôg sub ntô nukebwô tshob yi là, ndo' nabte ju, nke mbumte dù' tômbwôg nton tshu nele'te Nsi yi, nummbe bo lo la'te tshen tshu là mbwe Nsi, a b'a tshu ndù bo fà Nsi, a be lèn bon Israél.

⁴ Ngale'te Eléazar tswitte men nka mbwôge mi bo na' ndo' tùn kà nabte yi là, mi ghala'te nka na' nkù fa là, bo nabte ju nekabte tômbwôg nele'te yi.

⁵ A b'a nekwimte bon ba Israél ndù mèn z'a ke' b'a ngafa' num ntô Aron nà, kà mi nkù'te nse' mbwe Tshùaben num nema' ju nelamte ntùm ka nte mbwôge, ndùlala ndù nu z'a na' ntum num Koré boa ben tse là, tum num i, nu ze Tshùaben na' ntshùa njam nganze Mosé ntshob yi là.

Bon ngô ta tu mbwe Mosé bo Aron

⁶ Njù làn, njoṅ ntse'te bon ba Israél fa tshob Mosé bo Aron ndù: Bin ghù ben Tshùaben kwù.

⁷ Ngelaṅ ze ntse'te ke ntshobte yub là, Mosé bo Aron kaṅ wut yub nke ndôte ndà mbumte, kuni Tshùaben ṅwag.

⁸ Mosé bo Aron lo nèn mbwe ndà mbumte.

⁹ Tshùaben tshob ndù:

¹⁰ Bin tum netèt ntse'te benntùn, me nsi biagte yub be ndonni. Bo vù nsi kabkab.

¹¹ Mosé tshob Aron ndù: Lo' yu ka mbwôg; ma' mbwôg tômbwôg tshu nele'te, ma' ju nelamte num bwe, nèn ndende mbwe ntse'te benntùn, ngù mat nebiagte nukebwô, nummbe Tshùaben ya ntù neshu, ngokèt nezwite benntùn yà to'o.

¹² Aron lo' ka mbwôg, be ndaṅndaṅ mba Mosé tshob là, nkù nde nèn netèt ntse'te benntùn, ndù a be be, ndù ngokèt nezwite benntùn yà to'o. A lo' ju nelamte, ngù mat nebiagte nukebwô num tu benntùn.

¹³ A tsin netèt benntùn mba fe ben. Ngokèt nezwite benntùn keb.

¹⁴ Benntùn tse ngokèt nezwite benntùn na' ndo' yub là na' mb'a 174 700, ke siaṅ tse bo na' nkwù num ntsha Koré là.

¹⁵ Aron bèn njam mbaṅ Mosé ntshundà mbumte, ngokèt nezwite benntùn tsin.

Kôg Aron

¹⁶ Tshùaben tshob Mosé ndù:

¹⁷ Tshob bon ba Israél ndù mba zit tunndà lo fà ta' kôg wù, a tamte mbe nkôg ntshob bàa gham ze ghakwé mbwe ntùm tunndà nsi fà là. O nsi kite lén mba zit tunndà lo num se kôg.

¹⁸ O nsi kite lén Lévi num se kôg Aron, nummbe kôg nsi b'a nda' ntshù' mba num zit tunndà lo.

¹⁹ O nsi yab men nkôg là ntùm ndà mbumte mbwe Koṅ Kàn; dù' ze bag bin num mbumte bwe là.

²⁰ Mènntùn ze se kôg nsi tob bèt nkaṅ nà, a b'a yi là ze me tsho' i là, a nsi be ndùlala, ntshobte ze bon ba Israél num nke ntshobte zin yi là mi.

²¹ Mosé tshob yen nu là ba Israél, ghatô yub se', mba we lo fà se kôg, ta' kôg num tunndà, a tamte mbe nkôg ntshob bàa gham, kôg Aron be netèt nkôg.

²² Mosé yab men nkôg là mbwe Tshùaben ntùm ntàb Koṅ Kàn.

²³ Njù làn, Mosé tsho ntùm ndà Koṅ Kàn, njen ndù kôg Aron, tunndà Lévi, tob kà ngù bontsit mfu, nsàm bèt, ngù ntàm mi ndù a tswe.

²⁴ Mosé sô njoṅ nkôg fa mbwe Tshùaben, nèn nda'te bon ba Israél. Bo yen, mba we lo lo' se kôg.

²⁵ Tshùaben tshob Mosé ndù: Bèn njam njab kôg Aron mbwe Koṅ Kàn, a be lèn ba ke fà wut nsi. A be ndùlala, mba ntshobte mfà num lén sàm nsi mi, mba vù ke bèn nke nzwite yube.

²⁶ Mosé ghù ndùlala. A ghù ju ze Tshùaben na' ntshob ndù a ghù là.

²⁷ Bon ba Israél tshob Mosé ndù: Yene, bag kwù, bag bi, bag bi fa.

²⁸ Mba we lo z'a ghebte mbaṅ dù'ntswe Tshùaben nà nsi kwù. Bag nsi kwù fa tà nkum num njam mèn ké?