Nesiaṅe 16 - NTSHOB NSI

Tatu Koré, Datân mba Abirâm

¹ Koré, nshum Yiseha, nshum Kehat, nshum Lévi, tènte Datân bo Abirâm, nshum Eliaf bo Ona, nshum Perét, tunndà Rubèn.

² Bo lo boa bon ba Israél benntùn bon tàn nkù bàa, bo nèn ntshobte Mosé. Bo na' mb'a ghalôte ntse'te, benntùn tse ntse'te na' ntsho' yub ndù bo ke ndo' yub nèn yi mbwe là, mbe ghalèn.

³ Bo tshobte Mosé bo Aron ndù: Yen njoṅ nu là ku'u. Njoṅ ba ntse'te fa b'a benntùn nelàne, Tshùaben bèn mbe netèt bo. A tshùa à ndù ke, bin nke nko'te wut tsine, nke ndiag netshùa ntse'te Tshùaben à?

⁴ Mosé ju' men ntshob là, ngwù nsi kabkab.

⁵ Ntshob Koré boa bwoṅ benntùn tse bo be njam i là ndù: Nkebnjù ndamnjù, Tshùaben la'te mèn z'a be nkum mèn nà, mèn z'a tsho' i là, mèn z'a ku'ni neghebte mbaṅ i là, mba mèn z'a tsho' i, a ke ngebte mbaṅ i là.

⁶ Tshù ju ze bin nsi ghù li, Koré boa tse ben nsi lo' ka mbwôge,

⁷ ndamnjù, bin yab mbwôg bwe, naṅ ju ze ywèt tse num ndamte là bwe mbwe Tshùaben. Mèn z'a nsi tsho' i là, mb'a b'a mèn ze bo tsho' i là, njoṅ nu fa ku' ndùlala me nshum Lévi.

⁸ Mosé bèn ntshob Koré ndù: Bin ju'u, me bon Lévi.

⁹ A kag bin mba Nsi ba Israél na' ntsho' zin neke ngebte mbaṅ i, num neke mfa' num dù' nelàne, Tshùaben mbèn nke ntsin num tu ntse'te ngelaṅ ze bin fa' fa' num tu yub fa là ké?

¹⁰ A lo tsho' zin ndù bin ke ngebte mbaṅ i, wù bin à fèt tsho ntô Lévi. Bin tshwèt nke mbètte mo' fa', netù' ghale'te Tshùaben.

¹¹ Ndùlala, bèn ngù, kà yu tu wut bin à bwoṅ benntùn tsho, nke nkutte se' kam Tshùaben. Aron b'a we kà bin nke ntshobt'é à?

¹² Mosé tsiaṅ Datân bo Abirâm bon Eliaf, là bo tshob ndù: Bag ke nsi ko' tshag nèn ntùm ngô.

¹³ A ke' ku' wù mb'o na' sô yag ntùm ngô ze mbùn na' mba ṅwa'a tshwèt nke nswe' bwe mba ntse là, ndo' yag nse' yi bag kwù num kônkwa là ké? O ke' fite netô yag ké?

¹⁴ Kua' nenùne, nga, o ke' lo' yag nse' yi ntùm ngô ze mbùn na' mba ṅwa' num nke nswe' bwe mba ntse là. O lo ke fà yag ju ntsi', mba nà, mba nkùa. O tshwèt nke ndo' tshen ben ni mba mfùmiag là ké? Bag ke nsi ko'o.

¹⁵ Mosé ya ntù neshu ntshob Tshùaben ndù: Kà lôte yub ju nefà ngamt'o yi miag mebwô. Me ke' kwé mba nda' kekwèn bo, ke ghù nu z'a bag là mba num ta' mèn ntshù' netèt bo.

Ndon tu Koré, Datân mba Abirâm

¹⁶ Mosé tshob Koré ndù: Ndamnjù yu tu wut, mba bwoṅ ben tsho, ngù Aron, bin a' be mbwe Tshùaben.

¹⁷ Mba we lo lo' ze ka mbwôge, bin nsi ma' ju nelamte ntùm bwe, mba we lo tsin mbwe Tshùaben bo ze ka mbwôge. Bo nsi tamte fà ba ka mbwôge bon tàn nkù bàa. Mba wù, ngù Aron, ta' mèn nsi ghù ze ka mbwôge.

¹⁸ Mba we lo, lo' ze ka mbwôge, njab mbwôg bwe, naṅ ju nelamte ntùm bwe, nèn ntsin ntshundà ndà mbumte boa Mosé mba Aron.

¹⁹ Koré tse'te tse bwoṅ benntùn mbaṅ i, ntshundà mbumte. Kuni Tshùaben ṅwag njoṅ ntse'te fa.

²⁰ Tshùaben tshob Mosé bo Aron ndù:

²¹ Bin sô wut tsin mbaṅ tshen ben ni, me nsi ghù bo mi be ndonni.

²² Bo kabte se yub nsi ntshob ndù: O Nsi, ze zwiag njoṅ tshu nenabte fa b'a tô bu o là, ta' mèn ntshù' ghù nukebwô, o ya ntù num njoṅ ntse'te fa ké?

²³ Tshùaben tshob Mosé ndù:

²⁴ Tshob ndù ntse'te lo mbaṅ mbàn Koré, Datân, mba Abirâm.

²⁵ Mosé lo nenèn Datân bo Abirâm ba kamkam Israél tam njam i.

²⁶ A tshob ntse'te ndù: Bin lo mbaṅ ntàb tshen ghaghù ntù kebwô li, kà bin kwag sàm ju z'a b'a yub là, mbwôg nekwù bin à bo num nukebwô tshobe.

²⁷ Benntùn kù mbaṅ dù'ntswe Koré, Datân mba Abirâm. Datân bo Abirâm lo tum ntsin nzendà bo, zwi tshobe, mba bon tshobe, ngù bon bon tshobe.

²⁸ Mosé tshob ndù: A nsi tshùa num yen nu li, bin lèn ndù Tshùaben bèn ntum àm, ndù me ghù yen nu li, me ke' ghù à yàm tu.

²⁹ A be ze tshen ben ni kwù à vù njoṅ benntùn fa, a be ze nu tsho yube, ntsho num tu njoṅ benntùn fa là, mb'a ke' b'a Tshùaben bèn ntum àm.

³⁰ A be ze Tshùaben to' mo' nukebwô, yen a be ze tsha' mi yub boa njoṅ tshob tshu fa là, a be ze bo swe' ntùm nka' nèn ntùm ngô fe ben nà, mba bin nsi lèn ndù tshen ben ni wag Tshùaben.

³¹ Ngelaṅ z'a ke miagte netshob men ntshob li là, tsha' fagte tun nku mube.

³² Nga' ntshu i mi yub boa yub tunndà, boa ben Koré mba tse tshu fa.

³³ Bo swe' nèn ntùm ngô fe ben ntùn boa tshob tshu fa, tsha' kabte yube. Bo mi yub ndùlala netèt ntse'te.

³⁴ Njoṅ ba Israél fa ju' mba bo kua' là, nèn nke ntshob ndù: Bag bin kù ndù kà tsha' se' mi be.

³⁵ Mbwôg Tshùaben bèt, nkù benntùn bon tàn nkù bàa, ngelaṅ ze bo ke mfà ju nelamte mbwe Nsi là.