Nesiaṅe 15 - NTSHOB NSI

Nele'te Nsi mbab bàn bo mfèt mba ndu'

¹ Tshùaben tshob Mosé ndù:

² Tshob bon ba Israél ndù: Ngelaṅ ze bin nsi tsho ntùm ngô kà tswe bwe là, ntùm ngô ze me nsi fà bin nà,

³ ngelaṅ ze bin nsi fà ju neghamte Tshùaben, ju neton a kù, fà mba ju nele'te, k'a b'a mbwe, k'a b'a nyàm no, ke ju nefà ndo' nka' nu yi, ke nu neko' ntù mèn kà mfà, ke nefà num lé'njù ndùb lo, ngelaṅ nefà ju nelamte Tshùaben.

⁴ Mènntùn z'a tshwèt mfà yen ju Tshùaben nà, nsi fà ta' bag, num mbab bàn ndù bo ghabte nze gham, ndù bo lo' metsit ntshaṅ mfèt tshwibte yi.

⁵ Mbe se' mba ndu' nemiag là, bo lo' metsit ntshaṅ mfèt, bo ju neton a kù ke ju nele'te lo, a be z'a b'a mén njùmbwe là.

⁶ A be z'a b'a kekomnjù là, a lo' mbab bàn nze bàa ngelaṅ ze bo ghabte mbab bàn nze gham nà, ndo' ta' metsit ntshaṅ mfèt ntshwibte yi;

⁷ ndo' mo' ntshaṅ ndu' miag ndo' a jujù nelamte kà mfà Tshùaben.

⁸ A be z'o fà ta' ndu mfô Tshùaben nà, bo ton a kù fa kà bo ngamt'é yi, ke mo' ju nele'te lo, num neka' nu Nsi, ke ju nele'te nke mbètte fite lo,

⁹ mba bo nsi fà ndu mfô ngù mbab bàn nze tat num nze gham, ndo' ta' metsit ntshaṅ mfèt ntshwibte yi.

¹⁰ Mbe se' num ndu' nemiage, bo nsi lo' metsit ntshaṅ mfà bo jujù nelamte Tshùaben.

¹¹ Bo a' ghù num ndu mfô, num kekomnjù, num mén njùmbwe mba mbwe à be ndùlala.

¹² Ke nyàm tse bo nsi zwi là yàm be ndù ke lo, mba bo nsi ghù à be ndùlala, ke bo yàm be ndù ke lo.

¹³ A b'a ndaṅndaṅ mba mba zit mén Israél lo nsi fà ze ju nele'te ngelaṅ z'a nsi fà jujù z'a lamte là Tshùaben nà.

¹⁴ Ngelaṅ ze ngùn nsi tswe netèt bin, ke nebe netèt bin no, num zwiaṅ zwiaṅ yàm nà, a ghù be ndaṅndaṅ ngelaṅ z'a nsi fà jujù nelamte Tshùaben nà.

¹⁵ Ntshù' nsi b'a nda' ntshù' num ntse'te, num bin mba num ngùn, z'a be netèt bin nà, a b'a ntshù' ke bate mba Tshùaben, num bin mba num bag ghùn num njoṅ zwiaṅ bon tsin fa.

¹⁶ Ta' ntshù' nsi b'a ntshù', ta' mat neghù be ntshù' num bin mba num ngùn z'a be netèt bin nà.

Nelo' mbwe bàn nde'te Nsi

¹⁷ Tshùaben tshob Mosé ndù:

¹⁸ Tshob bon ba Israél ndù: Ngelaṅ ze bin nsi tsho ntùm ngô ze me lo' zin nèn yi bwe là,

¹⁹ ngelaṅ ze bin nsi jù bàn ntùm ngô là, bin séb bag i mfà Tshùaben;

²⁰ mba mbwe ju netshwibte bin sébte mfà, nsébte ju là be mba bin num ngù num nelo' tshu num nà là.

²¹ Bin nsi fà mbwe ju num tshu netshwibte Tshùaben, nke ngù be ndùlala kà nkum zwiaṅ bon tsin fa.

Jule'te num nukebwô ke lèn

²² Ngelaṅ ze bin nsi fànte, ke ze men ntshù' li ze Tshùaben tshob Mosé là,

²³ njoṅ nu fa ze Nsi tshob Mosé, a tshob bin nà, neto'te num lé'njù ze Tshùaben na' mfà là num benntùn zwiaṅ zwiaṅ.

²⁴ A be ze mènntùn na' mfàn yen ntshù' là, mfàn ke lèn mba ntse'te nsi ton ndu mfô a kù mbwe Tshùaben, ju ze ywèt tse lamte là, miag ndu' mb'a b'a mat neghù là, ngù ta' fot mbwe num nele'te num nukebwô.

²⁵ Ngale'te nsi ghù mat nebiagte nukebwô, a be ndùlala, mba bo nsi lagte nukebwô tshobe. Nummbe a nukebwô ze mèn ghù ke lèn nà, ndùlala bo lo' ju nefà nse' yi, ndo' jujù ze bo ton mbwôg a kù là nse' mfà Tshùaben, ngù ju nele'te num nukebwô nefàn ke lèn.

²⁶ Bo nsi lagte nukebwô njoṅ bon Israél fa, mba num tu ngùn z'a be boa bo là, num yen nukebwô ze mèn ghù ke lèn a kwag njoṅ ntse'te fa là.

²⁷ A be ze nda' ta' mèn ntshù' bèn mfàn yen nu là, mfàn ke lèn nà, mb'a nsi lo' ta' mbwe tamngu' nèn yi num nele'te num nukebwô.

²⁸ Ngale'te nsi ghù mat nebiagte nukebwô, bo lagte nukebwô tse.

²⁹ K'a b'a mén Israél, ke ngùn no, ke ntshùanze lo, ze bo à bo be là, mba ntshù' b'a be ntshù' num mèn z'a fàn ke lèn nà.

³⁰ Là, mènntùn, ménla' ke ngùn no, z'a be fàn nu nke ndèn nà, mb'a tshabte Tshùaben ndùlala. Bo nsi sô yen mèn nà netèt tse benntùn,

³¹ mb'a wag ntshob Tshùaben, mbagte ntshù' mi là, a bwô ndù bo sô i netèt benntùn, nukebwô tse tsho num i.

Mo' mèn bagte lé'njù Sabbat

³² Ngelaṅ ze ba Israél na' mbe num kônkwa là, bo yen mo' mènntùn a nke ntswitte ntshwèn num lé' Sabbat.

³³ Benntùn tse bo na' njen i a nke ntswitte ntshwèn nà lo' i nèn yi mbwe Mosé bo Aron, mba mbwe ntse'te.

³⁴ Bo yab i nke mbéb i mebwô, nummbe bo ke' yoṅ ndo' ntshù', mba mbe bo ghù num yen mèn nà z'a ghù ndùlala là.

³⁵ Ndùlala tshob Mosé ndù: Bo nsi zwi yen mèn nà, njoṅ ntse'te fa nsi tamt'é ndoṅ, njam mbàn.

³⁶ Njoṅ ntse'te fa lo' i nèn njam mbàn, ntamt'é ndoṅ, a kwù. A b'a ju ze Tshùaben na' ntshob Mosé ndù a ghù là.

Netshoṅ ju num ntôg nzwe

³⁷ Tshùaben tshob Mosé ndù:

³⁸ Tshob bon Israél ndù bo ghù ju ntshoṅ num ntôg nzwe tshobe, yen ni b'a num zwiaṅ benntùn tse mànjam; mbèn ndo' ndeb meba ntam tun nzwe yi ndiaṅ mbume.

³⁹ A nsi ywimte zin netshoṅ ju num ntôg nzwe, bin a' ghù mbe yen ni, nke nkwimte ntshù' Tshùaben, bin a' ghù nze, ke bam ndù ntù tsin soṅte zin nèn yi dù' ghua; mba ndù kà zin nemiagte ghù bin bagte men ntshù' là.

⁴⁰ Ndùlala bin nsi kwate neze njoṅ ntshù' màm fa, mbe ben nelàne num Nsi zin.

⁴¹ A b'a me Tshùaben Nsi zin me nsô zin Egipto, ndù me b'a Nsi zin nà. Me b'a Tshùaben Nsi zin.