Nesiaṅe 14 - NTSHOB NSI

Ba Israél gha netsho ntùm ngô Kanaan

¹ Njoṅ ntse'te fa tshag nze tshob tù, nzi kua' kua' kà njù làn.

² Njoṅ bon ba Israél fa tshob Mosé bo Aron ndù: Bag na' nkwù à ntùm ngô Egipto mb'a lo bwô yage, ke nekwù mba num kônkwa lo.

³ Numke Tshùaben nke ndo' yag nèn yi ntùm ngô ze bo nsi watte yag bwe à? Bo nsi lo' zwi tshage mba bon tshage mba kuan nà. A ke' bwô be à nebèn njam Egipto ké?

⁴ Bo tshob be bo bo ndù: Bag bin tsho' ta' mèn ngatshagte, a ghù bag bin bèn njam Egipto.

⁵ Mosé bo Aron vù nsi kabkab, mbwe njoṅ ntse'te bon ba Israél fa ze bo tse'te bwe là.

⁶ Yoshua, nshum Nun, bo Kaléb, nshum Yéfuné, ze bo na' mbe netèt ghantum ngô Kanaan nà, fagte nzwe tshob num bo, ntshob njoṅ ntse'te bon ba Israél fa ndù:

⁷ Yen ngô là ze bag zinte ntùm bwe là, b'a kua' ngô mebwô neshu.

⁸ Ntù Tshùaben bwô num be mb'a nsi lo' be nèn yi ntùm yen ngô là ze mbùn na' mba ṅwa'a yàm ntùm bwe neshu là.

⁹ Kà bag bin ta tu Tshùaben. Kà bag bin bwôg tshen benntùn nà tse bo be mum ngô là là, a b'a benntùn nemi mbe' ntshù', bo nsi tshob ngabéb yub a faṅ yub nkùù, mbe se'e mba be là, bag bin mba Tshùaben bèn mbe. Kà bag bin bwôg yube.

Mosé bètte lagte num tu bon ngô

¹⁰ Njoṅ benntùn fa nke ntshob ndù bo tamte yub ndoṅ. Ngelaṅ ze bo ke ntshob là, kuni Tshùaben ṅwag njoṅ bon ba Israél fa num tu ba' mbumte.

¹¹ Tshùaben tshob Mosé ndù: Tshen ben ni nsi wag àm tà nkum à ndùke? Bo nsi tsin negha àm à ndùke? Mba mba me la'te ndèn netèt bo yàm nà à?

¹² M'a' ghù ngokèt kuangab tshùb yube, bo bi yub ju ntsi'i, me tshùa num o ngù benntùn tse yàm bèn nta ntshùa i.

¹³ Mosé tshob Tshùaben ndù: Ba Egipto lèn ndù yu neta bèn ngù kà tshen benntùn ni ntum ju bo.

¹⁴ Bo yà tshob ben tse bo be ntùm yen ngô li là. Tshen ben ni yà lèn ndù, wù Tshùaben be netèt tshen ben ni là, ndù a b'a wù Tshùaben bèn nke nda'te wul o bo, bo nke njen o miag mube, ndol o bèn nke dam yub mbume, yu tu wut nke mbèn mbe mbwe bo, mbwôgtshù ntùm ndot, tèttswe' ntùm bwoṅ mbwôge.

¹⁵ O a' ghù tshen ben ni kwù mba ta' mèn ké? Mba benntùn tse bo ju' tshô o là nsi tshob ndù:

¹⁶ Tshùaben ke' ku'ni neghù ndù tshen ben ni tsho ntùm ngô z'a na' mbù bo là, ndùlala kà zwite yub kônkwa.

¹⁷ Neto'te ndonni, a bwô ndù neta Tshùaben àm gha'te wul i, nummb'o lo tshob ndù:

¹⁸ Me b'a Tshùaben, ke be ya ntù ndende, ndun nunenùne, nke mfènte nu ze mèn fàn nà, mba neta tu, là ke la' mèn z'a fàn nu là ndo' ngù mèn z'a ke' fàn nà, nke ngù ba tà ntsha ngelaṅ ze bo fàn nu là, tà nèn nkum num bon tshobe zwiaṅ tat mba zwiaṅ kuà.

¹⁹ Lagte nukebwô tshen ben ni ntshùa num kondèn o ze ndùb mb'o na' njà to' nelagte mà Egipto kà nse' nkum nsen ni là.

²⁰ Tshùaben bùnte ndù: Me lagte mb'o bètte là.

²¹ Mba ndùlala, mba me be ntùn nà b'a mba kuni Tshùaben dun num nsitsha' fa là.

²² Sàm ta' mèn netèt tshen ben ni tse kuni àm mba ndèn ze me ghù ntùm ngô Egipto mba num kônkwa, ze bo yà laṅt'àm yoṅ gham ke ju' ntshu àm nà,

²³ sàm mèn netèt bo, me tshob nsaṅlaṅ bwe ke nsi yen ngô ze me na' mbù ba tà tshob là, sàm mèn z'a wag àm nà ke nsi yen yen ngô là.

²⁴ A b'a nda' ngafa' àm Kaléb, nummbe mo' ywèt ghua tshwèt nke ntènt'é a tam njam àm ke lèt wut, me nsi lo' i nèn yi ntùm ngô z'a na' nèn bwe là, ze nzwit a' lo' yen ngô là nke ntô o.

²⁵ Là, ba Amalék mba ba Kanaan nsi ghô yub à ntùm tômbo'o. Neto'te nkebnjù, bin bèn njam nèn num kônkwa nze kaṅ dibantse meba.

²⁶ Tshùaben tshob Mosé bo Aron ndù:

²⁷ Me nsi fènte nu yen ntse'te kebwô li ze bo num nke ntshob be nukebwô num àm njoṅ ngelaṅ fa là tà nkum à ndùke? Me ju' njoṅ ntshob kebwô fafa mi bon ba Israél num nke ntshob num àm nà.

²⁸ Tshob bo ndù me tshob nsaṅlaṅ bwe mba me be ntùn nà, me nsi ghù num bin mba bin ntshob là.

²⁹ Fe tsin nsi vùte nsi à num kônkwa li, njoṅ zin fa ze bo na' mbe siaṅ zin ndù bin ghù ngu'njù ṅam mbàa là, mba njoṅ zin fa tse bin gha nu ntshu àm nà.

³⁰ Me tshob nsaṅlaṅ bwe, bin ke nsi tsho ntùm ngô ze me na' mbù nete zin bwe là, kà ke nda' Kaléb, nshum Yéfuné bo Yoshua, nshum Nun.

³¹ Mbe se' num bon tsine tse bin ke ntshob mbe bo nsi tù' kuan, me lo' yub nèn yi bwe là, bo nsi lèn ngô ze bin na' mbe ke kô là.

³² Mbe se' num tu wut tsine, fe tsin nsi vùte num kônkwa li.

³³ Bon tsin tse bandum nsi tù' ghabéb nyàm num kônkwa num ngu'njù ṅam nkuà, bo nsi ket nge' tatu zine, num kônkwa là.

³⁴ Mba nenèn tom ngô na' ntswe lé'njù ṅam nkuà là, ta' ngu'njù nsi be num tu ta' lé'njù. Ndùlala bin nsi ket nge' mfànnu mine num ngu'njù ṅam nkuà, ndùlala, bin lèn ndù nefà se àm num bin b'a nge'.

³⁵ Me Tshùaben, me tshob ndùlala, a b'a mba me nsi ghù num yen ntse'te li ze bo kut ntshu ntshu' neghù nu num àm nà. Bo nsi kwù fa num kônkwa, bo nsi kwùte bwe fa.

³⁶ Mbe se' num benntùn tse Mosé na' ntum yub, bo nèn ntom ngô,

³⁷ nse' nke ntshobte Mosé, nke ntshob kebwô num ngô là, bo nsi kwù mbag vù mbwe Tshùaben.

³⁸ A b'a nda' Yoshua, nshum Nun bo Kaléb, nshum Yéfuné na' mbèn njôg netèt benntùn tse bo na' nèn tom ngô là.

³⁹ Mosé lo' men ntshob là nèn ntshob njoṅ bon ba Israél fa, bo te vù ndùb nke ndàne.

⁴⁰ Njù làn, bo tum mà nkebnjù nko' tu ba mbale, ntshob ndù: Tshù bag li, bag nsi ko' à dù' ze Tshùaben na' nda'te là, a b'a nenùne, bag ghù nukebwô.

⁴¹ Mosé bètte yub ndù: Bin ghù à ke nsen nà? Bin tshwèt ndiag netsho' ntshù' ze Tshùaben yab là ké? A ke nsi bumte.

⁴² Kà bin ko' nummbe Tshùaben ke netèt bin, kà bin nèn ghakeban tsin ton zine.

⁴³ Ba Amalék mba ba Kanaan be mbwe bin nà, bo nsi watte zin fa, nummbe bin gha nebwe njam Tshùaben, Tshùaben ke nsi be bin.

⁴⁴ Là bo ta tu nko' tu mbale, Koṅ newat kàn, ke Mosé lo ke tum tshob ntùm mbàn.

⁴⁵ Ba Amalék boa ba Kanaan tse bo ke ntswe tu mbat là, swe' ma' yub ntsho, nzwite yub tà nèn nkum Horma.