Nesiaṅe 13 - NTSHOB NSI

Mosé tum ba ntom Kanaan

¹ Tshùaben tshob Mosé ndù:

² Tum benntùn ndù bo nèn ntùm ngô Kanaan ze me fà bon Israél là. Bin nsi tum ta' mèn mum tunndà ba tà tshobe. Bin nsi tsho' yub à netèt ghatô bon Israél.

³ Mosé tum yube, bo lo Paran nèn mba Tshùaben na' ntshob là. Njoṅ yub fa na' mb'a ghatô benntùn netèt bon ba Israél.

⁴ Tshù ndèn mub li: Num tunndà Rubèn: Shamua, nshum Zakkur.

⁵ Num tunndà Siméon a be Shafat nshum Hori.

⁶ Num tunndà Yuda a be Kaléb, nshum Yéfuné.

⁷ Num tunndà Isakar a be Yigal, nshum Yosèf;

⁸ num tunndà Efraim a be Hoshéa, nshum Nun,

⁹ num tunndà Benjamin a be Palti nshum Rafu,

¹⁰ num tunndà Zabulon a be Gadiel nshum Sodi.

¹¹ Num tunndà Yosèf, tunndà Manasé a be Gadi nshum Susi.

¹² Num tunndà Dan, a be Amiél, nshum Gémali.

¹³ Num tunndà Aser, a be Setur, nshum Mikaél;

¹⁴ num tunndà Néftali, a be Nabi, nshum Wofsi;

¹⁵ num tunndà Gadi, a be Géuél, nshum Maki.

¹⁶ Tshù ndèn benntùn tse Mosé na' ntum bo nèn nton ngô là. Mosé bate lén Hoshéa mén Nun ntsiaṅ ndù Yoshua.

¹⁷ Mosé tum yub bo nèn nton ngô Kanaan, ntshob bo ndù: Bin ko' a Negéf, nko' mbale.

¹⁸ Njen mba ngô be là, ke benntùn tse ghù neta lo, ke bo bot lo, ke ba ntùm ngô kag ke bo yàm no.

¹⁹ Bin nsi yen mba ngô be là, k'a bwô; k'a bag lo, ke bo kut ngô nebéb ntshu i, ke ngô b'a mbàn no.

²⁰ Bin yene, ke tsha' ngô num mbwô ju ke nga lo, ke ntù bwe, ke nga lo, bin kagtùn ndo' ntamtù ntùm yen ngô là nse' yi. A na' mb'a ngelaṅ nekab mbwe ntamtù ndu'.

²¹ Bo ko' nèn netom ngô neto' Sin tà nèn nkum Rehof, mbaṅ Lebot-Hamat.

²² Bo ko' Negéf, tà nèn nkum Hébron, dù' ze Ahima, Shedai, mba Telai, nzwit Anak na' nke ntswe bwe là. Bo lo kut Hébron, a tswe ngu'njù sammbàa kà bo nkut Tanisi mà Egipto.

²³ Bo zin tà nkum tômbo'o Eskol dù' ze bo se' bwe nkeb kaṅtù ndu' mba ntsha mi bwe nso mbwoṅ bwe, benntùn bàa diaṅ, bo kab mba ntam bwe, mba tshom.

²⁴ Bo tsiaṅ yen dù' là ndù tômbo'o Eskol, a b'a ndù: Tômbo'o tsha' ntamtù num tsha ntamtù mi bon Israél na' nkab bwe là.

Ghatom soṅ yub tshô fa'

²⁵ A lo be tshùa lé'njù ṅam nkuà bo tom ngô kà bèn njam.

²⁶ Bo se' njen Mosé, Aron, mba ntse'te bon Israél, mà Paran, Kadèsh. Bo soṅ yub tshô manze, nda'te lèn ntamtù mi a be ntùm yen ngô là bo.

²⁷ Bo soṅ Mosé tshô manze ntshob ndù: Bag nèn ntùm ngô z'o tum yag bwe là. Bin bwe kua' nenùne. A b'a ngô ndù mbùn na' mba ṅwa'a yàm bwe neshu. Tshù lèn ntamtù mi a tum bwe là li.

²⁸ Nda' ndù ba tswe bwe b'a ben neta, ndù bo kut ngô yub mebwô, nke mbwôg ntsho. Bag yen mba nzwit Anak bwe.

²⁹ Amalék ke ntswe à Negéf, ba Hit. Ba Yébusia mba Amor nke ntswe à num mbale, ba Kanaan nke ntswe yub mà kaṅntse diba, mba kaṅntse Yordan.

³⁰ Kaléb tshwèt ntshob tshu benntùn tse bo ke nga ntshob ntshu Mosé là, ntshob ndù: Bin ghù bag bin nène, ndo' yen ngô là bag bin nsi tô yube.

³¹ Là benntùn tse boa bo na' nko' là tshob yi ndù: Bag ke' ku'ni tshag nenèn nkam tshen benntùn nà, bo ta ntshùa yage.

³² Bo to' nebagte lén ngô là mbwe ba Israél ntshob ndù: Yen ngô ze bag nèn ntom njen nà b'a ngô ndù a num mfèt ben tse. Njoṅ benntùn fa tse bag na' njen nà, b'a sagket benntùn.

³³ Mbèn njen mba nzwit Anak ndù bo sag yub neshu. Bag nke ntù' yen wut tshag à mba ngamntàn nà, mba bo yub nke njen yag be ndùlala.