Nesiaṅe 12 - NTSHOB NSI

Nkin tshùb Miriam

¹ Aron bo Miriam tshobte Mosé num ngon Etiopia z'a na' nso là, nummbe a na' nso à ngon Etiopia, ngon Kus.

² Ntshob ndù: Nsi na' ntshob nu à be nda' Mosé tù' yi ké? A lo ke tshob nu mba bag ké? Tshùaben ju' yen nu là.

³ Mosé na' mb'a ngafà wut nsi ntshùa njoṅ benntùn fa num nsitsha'a.

⁴ Nsi ke ghubte ntshob Mosé, Aron mba Miriam ndù: Bin nèn njoṅ zin ntu tat fa, mbwe ndà mbumte. Njoṅ yub fa ntu tat nèn mbwe ndà mbumte.

⁵ Tshùaben swe' ntùm bwoṅ ndot ntsin mbwe ntshundà mbumte. A tsiaṅ Aron bo Miriam bo nèn mbwe.

⁶ A tshob bo ndù: Bin ju' ntshob màm. A be ze ngatshob ntshob Nsi be netèt bin nà, mba me Tshùaben, bèn nse' ntùm njem ntshob nu yi.

⁷ A ke' b'a ndaṅndaṅ num ngafa' àm Mosé ze me yab ntù àm num i num njoṅ ndà àm fa là.

⁸ Me ke ndo' à ntshobte kà nke ntshob nu yi, a nke njen àm, ke lo' à lamte ntshobe, ngù a nke njen netshaṅ mfi' wut Tshùaben. Numke bin nke ntshobte ngafa' àm Mosé à?

⁹ Tshùaben ya ntù tshen nà ndo nène.

¹⁰ Ndot lo num tu ndà mbumte nèn tù, be ngelaṅ mbile, nkin ghom Miriam, a kaṅ mfôge mba mbem nà. Aron shua wul i ndôt'é njen ndù nkin ghom i.

¹¹ A tshob Mosé ndù: ô tshùaben àm, me le't'o, kà ghù ndù nukebwô tsho num bag, mba bag fàn nu là, bag b'a ba kagni, mbe ngaghù nukebwô.

¹² Ô, a ke' bwô ndù Miriam tù' mba sôbam mén ze mbàb wul i num tum bam màab ndù a sàmte fa là.

¹³ Mosé kua' Tshùaben ntshob ndù: ô, Nsi, ko ndèn, njat'é.

¹⁴ Tshùaben tshob Mosé ndù: Tàab lo mfim ntsi num se i, mba tuswe ke ko i num lé'njù sammbàa ké? Bo sô i mum mbàn a tswe lé'njù sammbàa ntshundà, tshen lé'njù là mi kà mbèn njam num ze dù'.

¹⁵ Bo sô Miriam netèt benntùn a tswe lé' sammbàa. Benntùn ke bèn nèn dù' k'a bèn njam num ze dù'.

¹⁶ Yen nu là be tôge, benntùn lo Hatserot nèn ngù mbàn yub num kônkwa Paran.