Nesiaṅe 11 - NTSHOB NSI

Bon Israél mà Tavéra

¹ A lo be mo' lé'njù ba Israél te vù nke ndàne, Tshùaben ju' a ya i. A ju' ntù i ya, mbwôg Tshùaben kù mo' bag mbàn fa.

² Bo kua' nse' ntèt Mosé, a le'te Nsi num tu yube, mbwôg tsin.

³ Bo tswi lén yen dù' là ndù: Tavéra nummbe mbwôg Tshùaben lo kù bon Israél.

Bwoṅ benntùn bètte mbàb

⁴ Ben banban ghù ghe'te ntù bo, mba tu wut bon Israél to' yub nekua'a ntshob ndù: We z'a fà yag mbàb, bag fèl'à?

⁵ Bag ke' nkwimte ngontse ze bag na' mfèt banban Egipto, ngù bo', njab, ntamtù mba agnos là.

⁶ Là ndonni yôg sag yobte, sàm ju ke' be. Bag ke njen nà be nda' mana.

⁷ Mana nke mfut'a nkun mekale mbe mba miag nkun nà.

⁸ Bwoṅ benntùn lo nke nsate nenèn ṅwale, ngo' num loṅ bàn, ke netswe' ntùm kebu' lo, na, nabte ju yi mba tag là. Bo nke mfèt a nke ntswe ntshu mèn mba tag ze bo kate ntùm mfèt là.

⁹ Meme' lo ke nswe' tèt bwe num nenà, mana swe' ze ṅab bwe.

¹⁰ Mosé ju' mba benntùn te vù tunndà tunndà ntshundà ntàb tshob là. Tshùaben ya ntù neshu.

¹¹ Mosé ju' kebwô neshu, ntshob Tshùaben ndù: Numke o nke diag neghù nukebwô num nkuan o à? Se àm ke' làn mbwe o, o tshwèt ndiag neket nge' benntùn njab mbe' àm numke?

¹² Me bèn mbe jùm tshen ben ni ké? Me bèn mbwe yub ntùm njù ké? Numke o nke ntshob ndù, me ze yub mba bo num nze mén nà à? Nze yub Ndùlala tà nkum ntùm ngô z'o na' mbù ba tà tshob l'à?

¹³ Me nsi lo' mbàb à yà kà fà tshen ben ni tse bo tshwèt nke mbwe njam àm nke ntshob ndù: Fà mbàb bag fèl à?

¹⁴ Me ke' ku'ni tù' me, neket tshen ben ni, bo lèt mbe' àm neshu.

¹⁵ A bwô nezwi àm yoṅ ntshù' ntshùa neghù num àm ndùlala. A be ze me b'a ngafen mbwe o là, o ghù me ndùlala, ntshùa neghù me nke njen nge'.

¹⁶ Tshùaben tshob Mosé ndù: Tse'te kamkam ṅam sammbàa netèt ba Israél, kua' ko' benntùn, mba ghatsho'te ntsha. O a' lo' yub nèn yi mbwe ndà mbumte, bin à bo bumte bwe.

¹⁷ M'a' swe' bwe ntshob nu wù. Me nsi nèn num Ywèt z'a be num o là, nsô metsili bwe, nso num bo, bin à bo nsi tamte ket lèt netshagte benntùn, a ke bèn mba ju neket tù' wù.

¹⁸ O nsi tshob benntùn ndù: Bin lànte wut tsine, mfèt mbàb, nummbe bin lo kua' Tshùaben ndù: Bag yôg lo' yag mbàb à yà mfèl à? Bag lo tswe mebwô mà Egipto. Tshùaben nsi fà mbàb bin fèle.

¹⁹ Bin ke nsi fèl à nda' ta' lé'njù ke lé'njù bàa, ke lé'njù tàn, gham ke ṅam mbàa lo.

²⁰ Là num ta' maṅwù mfèt k'a nke ntum ntselag bin, mfèt k'a nke mbag zine; mbènte ntù tsine nummbe bin ghua' Tshùaben z'a be netèt bin nà, mba num ndù: Bin kua' ntshob ndù: Bag na' ntum Egipto à numke?

²¹ Mosé bèn ntshob ndù: Ghazin nku netèt tshen ben ni ze me be netèt bo là, b'a ntsha' nkù ntôge, o nke ntshob ndù o nsi fà mbàb bo, bo fèle tà nkum ta' maṅwù à?

²² Bo zwi mbwe mba mfô mb'a nsi ku' num bo ké? Bo lo ku'ni neghom be ngontse fa mà dibantse mb'a nsi b'a ke num bo à?

²³ Tshùaben tshob Mosé ndù: Bu Tshùaben vôg neshu ké? O nsi yen ndonni mba ntshob màm nsi bumte num o là, ke nga lo.

Nsi fà Ywèt tse benntùn njwèt 70

²⁴ Mosé lo mbwe ndà mbumte, nèn ntshob njoṅ ntshob Tshùaben fa benntùn. A tse'te kamkam ṅam sammbàa ntshundà ndà mbumte.

²⁵ Tshùaben swe' ntùm ndot ntshob nu yi. A séb ywèt z'a na' mbe num Mosé là, nso num ba kamkam ṅam sammbàa. Ngelaṅ ze ywèt na' ntsho num bo là, bo tshob ntshob Nsi, ntshob ntsine, ke bèn nèn mbwe.

²⁶ Ben bàa lo tù' ntùm mbàn, lén mo' na' mb'a Eldat, mo' be Medak, ywèt tsho num bo, ndèn mube lo be netèt kam ṅam sammbàa, nda' ndù bo lo ke nèn ntshundà mbumte, mba bo yub tshob ntshob Nsi ntùm mbàn.

²⁷ Mo' mônke' kù nde, nèn ntshob Mosé ndù: Eldat bo Medak tshwèt ntshob ntshob Nsi ntùm mbàn.

²⁸ Yoshua, nshum Nun z'a na' nke mfa' Mosé ngelaṅ z'a na' nke' ménnshum nà, se' ze ntshob Mosé ndù: Tàa Mosé, tshob bo ndù kà bo bèn netshobe.

²⁹ Mosé tshob yi ndù: O tù' bèn nja ntù num yàm tu ké? Njoṅ benntùn fa lo ntù' ghatshob ntshob Nsi, mba Tshùaben so ywèt tse num bo.

³⁰ Mosé bèn njam mbàn boa kamkam Israél.

Nsaṅtene

³¹ Mo' fetmbaṅ Tshùaben tum mà dibantse, ṅwat ngatu nse' nsa mbaṅ mbàn, njoṅ nezin ta' lé'njù, num njoṅ bag mbàn fa, nkabte tsha' num ndaṅ mbu mbàa.

³² Njoṅ benntùn fa tù' b'a tù num yen mbwôgtshù là, tèttswe' mba ndamnjù num neghom ngatu. Mèn z'a na' ngom, a kag là, lo ghù ntsi gham. Njoṅ dù' fa ntùm mbàn b'a dù' neyag mbàb.

³³ Ngelaṅ ze mbàb na' nke' ntshu bo, bo nke nkam nà, Tshùaben ya ntù bo neshu, ngù bo kwùte.

³⁴ Bo tswi lén yen dù' là ndù Kibrot-Tava nummbe a b'a dù' ze bo na' ntshoṅ benntùn bwe yàm tse bo ghù ghe'te là.

³⁵ Bwoṅ benntùn lo Kibrot nèn ntsin Hatserot.