Néhémi 9 - NTSHOB NSI

Ngô tswe nziku', mbam nukebwô tse

¹ A be kum lé'njù ntshob kuà ṅam mbàa be ntùm yen ṅwù là, bon Israél kùmte, ndù bo ma' nke'mbàm, nse' mbabe, num netswe nziku'u.

² Ben tse bo tum ntùm nzwit Israél là, sô wut num ghùn, nèn num nebam nukebwô tshob boa mfànnu tà tshobe.

³ Ndùse bo tete yub tù là, bo siaṅ ntùm ṅwa'ni Tshùaben Nsi yub, num nguan nyam tat; bo bèn ndo' nguan mo' nyam tat mbam nukebwô tshob yi, ngwù nsi mbwe Tshùaben Nsi yub.

⁴ Yoshua, Bani, Kadmiél, Shébania, Bunni, Shérébia, Bani bo Kenani ko' num dù' ben Lévi ze bo kut là, nkua' ntshag nze yub tù, ntsiaṅ Tshùaben Nsi yub.

⁵ Ben Lévi: Yoshua, Kadmiél, Bani, Hashabnia, Shérébia, Hodiya, Shébania bo Petalja, tshob ndù: Bin lo nsi nyàmte Tshùaben Nsi zin num ngu'ngu'! A bwô neke nyàmte lén so se nekuni s'a tshùa njoṅ nenyàmte fa bo njoṅ ghamte fa là.

⁶ A b'a wù Tshùaben, wù tù' o bèn nabte kamànyam, kamànyam fa bo yub ntshu ntsho, nabte tsha' boa mba ke lo z'a be num bwe là, dibantse boa tshu ts'a ntùm bwe là. O be mfà yôg njoṅ tshen tshu là fa. Ntshu ntsho mfe kamànyam num ngwù nsi mbwe o.

⁷ A b'a wù Tshùaben Nsi na' ntsho' Abram, nsô i Ur mà Kaldéa. O na' mfà lén Abraham yi.

⁸ O lo yen mb'a yab ntù i num o kua' mebwô, ngwat kàn bin yi, nka' yi ndù o nsi fà ngô Kanaan, ngô Hit, ngô Amor, ngô Férésia, ngô Yébusia bo ngô Guirgas ze tunndà. O lo tshùb ju z'o na' nka' là, nummb'o b'a mèn netsine.

⁹ O lo yen ngùtni tà tshag mà Egipto, nju' nkua' mub mbaṅ dibantse meba.

¹⁰ O lo sô mesin boa nu netshàm num Faraon, num ghafa' tse, num ben tse mba ngô i, nummb'o lo lèn mba bo na' ma'ni tà tshag yi là. O lo ghù nkuni mu tum mb'a tshwèt nke' ntum mba sènni là.

¹¹ O lo keb dibantse mbwe bo, bo dut tèt dibantse; là o lo ma' ben bo ke nta' yub là gheme ndaṅndaṅ mba bo num ma' loṅ ntùm ntse là.

¹² O lo ke ndo' bwoṅ ndot ntshagte yub yi mbwôgtshù, a be tèttswe' o lo' bwoṅ mbwôg nke nké' manze ze bo zin bwe là yi.

¹³ O lo swe' nse' num mbat Sinaï, o lo tsin mfe tù ntshob nu bo mfe kamànyam; o lo fà ntag netsin bo, mfà ntshù' nenùn bo, mfà ntag boa nkàn mi a bwô là bo.

¹⁴ O lo ghù bo lèn yu Sabbat ze nelàne, o tshùa njam ngafa' o Mosé nkite nkàn, ntage, bo ntshù' bo.

¹⁵ O tsin mfe tù, mfe kamànyam mfà bàn bo ndùse nziku' ya yub là, ngù ntse tum num gholoṅ ndùse ntù yub kù là. O tshob ndù bo tsho ntùm ngô ze tu wul o tshob saṅlaṅ bwe nefà bo là.

¹⁶ Nda' ndù tà tshag lo ko'tewut, ntù tshob sag. Bo lo ke ju' nkàn mu;

¹⁷ bo gha neju' ntshu, ndagte numebwô tse netshàm ts'o ghù num bo là. Ntù tshob sag, bo ghom ta' mfen ntùm tatu yube, ndùlala ndù bo bèn ntsho ntùm kuan. Là tu wul o, o b'a Nsi z'a be mfùag wut nelagte mfànnu là, mbe ngatshàmndèn, ngakondèn, nke ndèt wut num yantù, ndù o ghù bwôntù ze ndùb; o lo ke ghua' yube;

¹⁸ mba ndùse bo na' ndo' tùn nabte ta' mfô yi ntshob ndù: Tshù Nsi o z'a na' nsô o Egipto li, kà nso wut tshob num bwe, nke ntut'o kua' yàm yàm nà.

¹⁹ Ntùm bwôntù o z'a zi neshu là, o lo ke ghua' yub kônkwa, bwoṅ ndot ke tsin neke ntshagte yub mbwôgtshù num manze yub, bwoṅ mbwôg ke tsin neke nké' manze yub ze bo zin bwe là tèttswe'.

²⁰ O lo fà mbwô Ywèt tsho bo, ndù a ghù bo be ghazenu. O lo ke gha mana o bo; o lo fà ntse bo ndùse ntù tshob kù là.

²¹ O lo ke nabte yub num kônkwa num ngu'njù ṅam nkuà, bo ke bwoṅ sàm ju, nzwe tshob ke fagte, nku mub ke mot.

²² O lo fà nufen yàm boa ngôngô bo, ngabte tshen dù' là bo, ngô Sion, mfen Hesbon bo ngô Og, mfen Basan.

²³ O lo ghù bon tshob tse bandum yàm mba nsa mi a mfe kamànyam nà, o ghù bo tsho ntùm ngô z'o na' ntshob tà tshob ndù bo nsi lo' a be yub là.

²⁴ Nshumnshum tshob tsho bwe, ndo' ngô a tù' yube; o lo ghù ba la' ba Kanaan fi mbwe bo, o swèn yub ntùm mbu mube, nswèn fenfen tshob boa ngô bo, ndù bo ghù num bo mba bo kô là.

²⁵ Bo lo tù' bèn ngù ntusô mi bo kut kàbngô ndam yi mbum nà, bo tsha' tse ntùn. Bo ghù mba' mi mbwô mbwô tshu dun bwe là, ngù ntôntse mi bo tswe' là, ngù ba nkùa, ba ntene, boa ntù mi a num njàm ntàm nà yàme; bo jù, njwèle, ndunte, nke njôg ntùm mfu' mi bwôntù o ze ndùb fà bo là.

²⁶ Mba tà ndùlala, bo lo kam tatu num o, ma' ntshù' o njam tu bo, nzwite ghatshob ntshob Nsi tsho tse bo ke ndabte yub ndù bo bèn njam ntèl o là. Bo tut'o kua' yàm yàm neshu.

²⁷ Ndùlala o ghua' yub ntùm mbu ghakeban tshobe, bo ghùtni yube. Là, bo bèn nkua' wù ntùm ngelaṅ nge' yub, o tsin mfe tù mfe kamànyam, ntshu' yub yoṅ tse yàme, ngù ndùlal'a num kondèn o ze ndùb.

²⁸ Là, a be ghubte mb'o yôg yub là, bo bèn nto' neghù nukebwô mbwe o. Yen ngelaṅ nà, o bèn mfaṅ yub mum mbu ghakeban tshobe. A bèn mbe ghubte, bo bèn nke nkua' ntsiaṅ o mo' yoṅ i, yu tu wut, tsin mfe tù, ntùm bwôntù o ze ndùb ntshu' yub yoṅ yàme.

²⁹ O lo labte yub ndù bo bèn num ntshù' mu, là bo nke nkagtùn ngô be ntùm ko'tewut, ke kô neju' nkàn mu; bo fànte ntshù' mu mi a be mfà yôg mènntùn z'a be nze là. Bo ghù nkembe' ghatatu, ntù yub sag, bo ke ju' mba ntshù'.

³⁰ O lo fènte yub ngu'njù yàme, ntshùa njam ywèt tsho nte bu num bo, mba njam ghatshob ntshob Nsi tsho, là bo ke kù' ntoṅ num sàm ju. Ndùlala o swèn yub bu ba mfàm.

³¹ Là, o tshùa njam kondèn o ze ndùb ke biagte yube, ke ghua' yube, nummb'o b'a Nsi ngatshàmndèn mba ngakondèn.

³² Ndonni me Nsi yag, Nsi ndùb, z'a ghù ngù' mbe Nsi nekuni là, wù z'o be ndé' kàn so, nke ngù kondèn nà, kà yen nge' yag li mba metsit nu là. Me tshob à nge' tse bag yene, bag, fenfen tshage, kamkam tshage, ghale'te Nsi tshage, ghatshob ntshob Nsi tshage, tà tshag mba njoṅ ngô fa là. Tshen nge' là na' nto't'a fe num ze ngelaṅ fenfen Asiria tà nse' nkum sen lé'njù li.

³³ O na' mb'a mèn netsin mba num zit nu lo z'a ghù yag là, nummb'o la'te ndù o b'a mèn nenùne, mbe ndù bag na' ghù nukebwô.

³⁴ Fenfen tshage, kamkam tshage, ghale'te tshage boa tà tshag lo ke ze ntshù' mu, ke kù' ntoṅ num nkàn mu, ke num mb'o ke nte bu num bo lo.

³⁵ Ndùse bo na' mbe tàfa' netèt tshu mebwô ts'o na' mfà bo, ntùm zi ngô bo tsha' ntùn ts'o na' mfà bo là, bo lo ke to' fa' wù; ke bèn ndo' mvèn yub ntam mfa' mub mi kebwô yi.

³⁶ Sènni, tshù bag li tse bag tù' kuan nà. Tshù bag li tse bag tù' kuan num tsha' ts'o na' mfà tà tshage, ndù bo ke njù ntàm mi a tum bwe boa tshu mebwô ts'a tum bwe là.

³⁷ Tshen tsha' là be mfà tshu a tù' à tse fenfen ts'o na' ma' yub nsi mbwe bag là, nummbe nukebwô yag yab nge' num bag; bo ke ntô mbàb wut yag boa tshag nyàm à mb'a ko' ntù bo là.

Nebèn ngwat kàn. Nebèn nke mfa' Nsi

³⁸ A tshùa ndùlala, bag wat ta' kàn, nkit'é; fenfen tshage, ben Lévi boa tshag ghale'te ṅu' tun yen ṅwa'ni kàn nà.