Néhémi 8 - NTSHOB NSI

Nesiaṅ ṅwa'ni ntshù'. Jùa ntàb

¹ Ndùlala ngô tse'te mba ta' mènntùn ntshù' là mbwe nzendà ntse. Bo tshob Esdra ngalèn ntshù' ndù a lo' ṅwa'ni ntshù' Mosé, mi Tshùaben na' nkite Israél là nse' yi.

² Esdra ngale'te lo' ntshù' nse' yi mbwe ntse'te, ndù bandum boa bènnzwi tse bo ku'ni neju' ntshù' là là be bwe. A na' mb'a num mbwe lé'njù ntùm ṅwù sammbàa.

³ Esdra siaṅ ṅwa'ni ntshù' là neto' nkebnjù nkum njagnyam, mbwe nzendà ntse; bandum boa bènnzwi tse bo ku'ni neju' ntshù' là là lo be nsi. Ngô fa kù' ntoṅ nju' ṅwa'ni ntshù' là kua' mebwô neshu.

⁴ Esdra ngalèn ntshù' na' nko' ntsin à num dù' ze bo lo' ntù nabte yi num yen nu là là. Matitia, Shema, Anaya, Uri, Hilkija bo Maaséya lo tsinte num bag bu i ze zwim, Pedaya, Mikaél, Malkiya, Hashum, Hashbaddana, Sakaria bo Meshullam tsinte num bag bu i ze kwéb.

⁵ Esdra gha' ṅwa'ni mbwe njoṅ ngô fa, nummb'a lo nèn tù ntshùa ngô. Ndùs'a yoṅ nga' ṅwa'ni là, ngô fa tsin tù.

⁶ Esdra nyàmte Tshùaben, Nsi ndùb, ngô bùnte, mbe bùnte ntshag mbu tù, ntshob ndù: Amén! Amén! Bo fà wut nsi, nte nkekwi' nsi mbwe Tshùaben, nkab se yub num tsha'a.

⁷ Yoshua, Bani, Shérébia, Yamin, Akkub, Shabbetai, Hodiya, Maaséya, Kelita, Azaria, Yozabad, Hanan, Pedaya, ben Lévi, tote ntshù' ngô, mbe be ndù mba we lo tsin num ze dù'.

⁸ Bo siaṅ ṅwa'ni ntshù' Nsi kua' mebwô, nke ntote mb'a tshwèt ntshob là, num neghù ndù ngô ju' ju ze bo siaṅ nà.

⁹ Néhémi z'a be ngomna là, Esdra ngale'te mbèn mbe ngalèn ntshù' Nsi boa ben Lévi, tse bo ke ntswite ngô là, tshob njoṅ ngô fa ndù: bo fà sen lé'njù li Tshùaben, Nsi zin; kà bin tswe ntùm nenywine, ke bèn nke nkua'a. Nummb'a lo be be ndù njoṅ ngô fa ke nkua' ndùse bo na' nju' ntshob ntshù' là.

¹⁰ Néhémi tshob bo ndù: Bin nèn mfèt mbàb nzile, nu neta ndu' mi à botte là. Bin tum mo' bag i ben tse bo ke' na sàm ju là, nummbe bo fà sen lé'njù li Tshùaben be. Kà bin neghùtni wut tsine, nummbe tsiaṅte Tshùaben nsi bèn mbe zin neta.

¹¹ Ben Lévi nke mfite ntù ngô, nke ntshob ndù: Bin mi ntswe, nummbe sen lé'njù li b'a se nelàne, kà bin neghùtni wut tsine.

¹² Ngô fa nèn njù mbèn nu, ntum tsemo' bag tse, mfà wut tshob num tsiaṅte ndùbndùb. Nummbe bo lo ju' ntshob mi bo na' ntote bo là.

¹³ A be num mbatte lé'njù bàa, kamkam tunndà njoṅ ngô fa, ghale'te boa ben Lévi tse'te mbaṅ Esdra ngalèn ntshù' Nsi num neju' ntote tun ntshob ntshù' Nsi.

¹⁴ Bo yen ntùm ntshù' mi Tshùaben na' ntshùa njam Mosé nkite là ndù Tshùaben lo tshob mbe bon Israél nsi ghù tswe ntùm ntàb num ngelaṅ jùa s'a be num mbatte ṅwù sammbàa là.

¹⁵ Bo nsi sa, bèn tshob ndùlala ntùm njoṅ ntusô mub fa, mba Yérusalém ndù: bin tum nèn num mbale, nkeb ntshùa mbatsi ntùn bo mbatsi kebwô, mi tshalone, mi tshaten boa mi ntù mi a te' là, ndo' nkut ntàb yi, ndaṅndaṅ mba bo kite là.

¹⁶ Ndùlala ngô tum, nkeb ntshùa ntù, ndo' nkut ntàb yi tuba' mba' mube, ntshundà tshobe, bam ntshundà Ndà Nsi, mbwe nzendà ntse, mba mbwe nzendà Efraim.

¹⁷ Njoṅ mbumte ben tshen nà tse bo fe ndà kuan nà, kut ba ntàb nke ntswe bwe, fe num ngelaṅ Yoshua nshum Nun tà nse' nkum num sen lé'njù li, bon Israél lo ke to' ghù sàm ju a fute yen ni.

¹⁸ Bo lo ke nsiaṅ ṅwa'ni ntshù' Nsi mba sit lé'njù lo, neto' mbwe lé'njù kà nkum miagt'é. Bo jù jùa mum lé'njù sammbàa, mbatte lé'njù fom be lé' mànjù num njoṅ mbumte fa, ndaṅndaṅ mb'a be matnu là.