Néhémi 4 - NTSHOB NSI

Bo nèn fa' mbwe, mba mba nefa'te fe ghakeban nà

¹ Ndùse Sanballat ju' mbe bag tshwèt mbèn nkut kàbngô là, a ya ntù, nu tse bag i neshu.

² A tshabte ba Yuda, ntshob mbwe fèt tse boa soyé, Samaria ndù: tshen fenyu' ba Yuda li ke mfa' à ke? Bo a' faṅ bo nke mfa' ké? Bo kwate mb'a' tshùa njam tshule'te kà bo nzin nkum ké? Bo nsi sô ndoṅ ntùn mi mbwôg kù i là bam men mfèt mbab li ké?

³ Tobiya ze Ammon, z'a be mbaṅ i là bèn ntshob ze ndù: Bo kut nda' nekule. A be ze ta' tswenyàm taṅ mbaṅ bwe là, mb'a nsi kôg yub kàbngô ndoṅ nà.

⁴ Néhémi le'te Nsi ntshob ndù: Nsi yag, ju' mba bo tshwèt ngwag yag nju'u! Ghù ndù tute yub vù kua' tu bo, o bèn nswèn yube, bo lagte ntsha' yub num ta' dù' tsha'a, dù' bo nsi tù' kuan bwe là.

⁵ Kà lagte mfànnu mube, kà bwete nukebwô yub num miag mu; nummbe bo tshwèt ma'ni ghakut ba'.

⁶ Bag bèn nkut kàbngô, nkut t'a ntù' à nemiagte, nesag nèn tù b'a nda' kam i num mb'a lo mbwô ndù a nèn yi tù là. Ngô fa' sen fa' l'a kua' ntùm ntù ntshù'.

⁷ Là, Sanballat, Tobiya, ba Arab, ba Ammon boa ba Asdod ya ntù neshu ndùse bo ju' mbe fa' nenabte nkum kàbngô tshwèt nèn mbwe, bo bèn nke mfùn mfa mi a tote bwe là.

⁸ Njoṅ yub fa tamte ntù' ntshù', nse' nkam Yérusalém ntsho, ghù a bi ntàne.

⁹ Bag bu' mbu Nsi yag, nabte nke mbéb dù' mbwôgtshù bo tèttswe', num nelo' ntshèt yag njam yi a be ze bo kam yag là.

¹⁰ Mba tà ndùlala, Yuda nke ntshob ndù: Neta ke' be ben tse bo ket lèt là, fam z'a nsi là ke' kua' yàm yàme; be be ke ku'ni nekut kàbngô.

¹¹ Ghakeban be lo ke ntshob ndù: Be nsi kab mbu num bo ke be ndù bo lène, bo nsi be yen ndù be ya tsho netèt bo. Be nsi zwite yube, ghù fa' tsine.

¹² Là ba Yuda tse bo ghebte mbaṅ bo là se' nguan yoṅ gham nsoṅ yag dù' tse ghakeban tshag nsi tshùa bwe kab mbu num bag là.

¹³ Ndùlala, me kù' nte benntùn ntùm dù' ts'a be tun kàbngô là, ntùm ntô mi a be bwe là. Me te ngô à tunndà tunndà, bo tshùb ṅwi, nkô boa nkét.

¹⁴ Me nke ndôte; ndùse me lo nsi là me tshob ben ndùbndùb, ghakeb ntsha boa tshé' ngô ndù: Kà bin bwôg yube. Bin kwimte Tshùaben, Mèn ndùb mba Kuni Mèn, ma' ntsho num tu fèt tsine, bon tsin tse bandum boa tse bènnzwi, zwi tsine, boa mba' mine.

¹⁵ Ndùse ghakeban tshag ju' ndù bag lèn ntàmtenu mub là, Nsi biagte men ntàmtenu là, ndùlala bag bèn njam nekut kàbngô, mba we lo bèn num ze dù' fa'.

¹⁶ Fe num sen lé'njù là, mo' kam ghafa' tshàm nke mfa'a, mo' kam i nke ntshùb yub nkô, ntshètntsho, nkét boa nkum ntùne. Kamkam na' mb'a njam njoṅ tunndà Yuda fa.

¹⁷ Ben tse bo ke mfa' là, lo ke mbe fa' mo' bu, nke ntshùb ju ntshùag mo' bu;

¹⁸ mba we lo netèt bo lo ke mbe fa' ndù a taṅ ze ṅwi num kob se. Mèn z'a ke ntô nta là ke ntsin à mbaṅ àm.

¹⁹ Me tshob ben ndùbndùb, ghakeb ntsha bo tshé' ngô ndù: fa' li tsho nyàm mbèn nzi, be be num kàbngô à nesate; mèn ke mb'a ngùanesà mbaṅ fèt tse.

²⁰ A be ze bin ju' nze nta là, bin kùmte mbaṅ bag, nze dù' bin ju' nze nta tum bwe là; Nsi be nsi ma' ntsho num tu be.

²¹ Tshù mba bag na' ndo' fa' nèn yi mbwe là, mo' kam benntùn netèt bag tshùb kô bu bo, neto' mfôgnjù nkum ndùse nsa tum tù là.

²² Be num yen ngelaṅ nà me bèn ntshob ngô ndù: mba we lo zi à Yérusalém bo ze ngafa'; be ke mbéb ngô tèttswe', nke mfa' fa' mbwôgtshù.

²³ Mba bag là, me, fèt tshàm, ghafa' tshàm, ben bo ke mbéb dù', nke mb'a njam àm nà, bag ke' be sô nzwe num bag; mba we lo netèt bag be ntshùb ze ju ntshùag à bu i, ngù tse tshuntshùag bo mi ntse.