Néhémi 3 - NTSHOB NSI

Nebù'te kàbngô Yérusalém

¹ Eliashib ngale'te ze ndùb lo nsi boa fèt tse ghale'te, nkut bag nzendà mbwe; bo lànte dù' i, nte nzendà tse; bo lànt'é, neto' dù' nebéb dù' Méa nèn nkum num ze Hananéel.

² Ba Yériko nke nkut yub dù' mbaṅ Eliashib; tse nshum Imri nke nkut yub dù' Zakkur.

³ Tse nshum Senaa kut bag nzendà ngontse. Bo kut tu i, nte nzendà, nte fùn boa tshu netshèt nzendà yi.

⁴ Merémot nshum Uri, nshum Hakkots lo ke mfa' mbaṅ bo, nke nabte dù' ts'a ke' yoṅ nzin nà. Meshullam nshum Bérékia, nshum Meshézabéel fa' mbaṅ bo; Tsadok nshum Baana fa' mbaṅ bo;

⁵ ben Tékoa tse tse yàm bo gha nefa' tshùaben yub là lo fa' mbaṅ i.

⁶ Yoyada nshum Paséa bo Meshullam nshum Besodia, nabte njwèn nzendà. Bo kabte tu i, nte nzendà, nte fùn boa tshu netshèt nzendà yi.

⁷ Melatia ze Gabaon, Yadon ze Meronot boa ba Gabaon bo Mitspa, tse bo tum num ze bag ngomna yen yoṅ ta'ntse li là lo fa' mbaṅ bo.

⁸ Uziél nshum Harhaya, mèn netèt ghafa' ntùn tanjoṅ nke mfa' mbaṅ bo; Hanania mèn netèt ghanabte mfèt nelamte nke mfa' mbaṅ i. Bo kut Yérusalém tà nèn nkum kàbngô ndùb.

⁹ Refaya nshum Hur, mfen mo' kam bag taṅ ngô Yérusalém nke mfa' mbaṅ bo, num nenabte dù' ts'a ke' yoṅ nzin nà.

¹⁰ Yedaéya nshum Harumaf nke mfa' mbaṅ bo, mbwe ko' ze ba'; Hattush nshum Hashabnia nke mfa' mbaṅ i.

¹¹ Malkiya nshum Harim bo Hashub nshum Pakat-Moab nabte mo' bag kàbngô bo tu dù' neton tage.

¹² Shallum nshum Halloésh boa ngonngon tse fa' mbaṅ bo; a na' mb'a mfen mo' kam bag taṅ ngô Yérusalém.

¹³ Hanun boa ben tse bo ke ntswe Zanoak là nabte nzendà z'a tômbo' là. Bo kul i, nte nzendà tse, nte fùn boa tshu netshèt nzendà yi. Bo bèn nkut kum i nguan mbu nkù tàn, nèn tà nkum nzendà dù' neghua' nenà.

¹⁴ Malkiya nshum Rékab, mfen taṅ ngô Bét-Hakkérem kut nzendà dù' neghua' nenà. A kul i, nte nzendà, nte fùn boa tshu netshèt nzendà yi.

¹⁵ Shallum, nshum Kol-Hozé, mfen taṅ ngô Mitspa nabte nze ntshu ntse. A kul i, nkut tu i, nte nzendà, nte fùn boa tshu netshèt nzendà yi. A bèn nkut mba kum diaṅnkat ntse Siloé, z'a mbaṅ nka' mfen nà; a ke nto' à num mbu'tuko' ts'a be nswe' tà nèn nkum ntshwèt David là.

¹⁶ A be tôg ze, Néhémi, nshum Azbuk, mfen mo' kam taṅ ngô Bét-Tsur fa' num nenabte dù' tà nèn nkum mbwe ntufi David, nèn nkum diaṅnkat ntse ze bo tswe' là, nèn nkum num ba' ba sa'nde'e.

¹⁷ A be tôg ze, ben Lévi fa'; Rehum nshum Bani; Hashabia mfen mo' kam taṅ ngô Keila fa' mbaṅ i num ze taṅ ngô.

¹⁸ A be tôg ze, Bavai, nshum Hénadad boa fèt tse fa'. A na' mb'a mfen mo' kam taṅ ngô Keila.

¹⁹ Ezer, nshum Yoshua, mfen Mitspa fa' mbaṅ i. A nabte mo' kam kàbngô z'a be mbwe nta tshu ntsho nze tôg bwe là.

²⁰ A be tôg ze, Baruk nshum Zabbai nabte mo' kam kàbngô be kua' nenànte, neto' fe tôg bwe nèn nkum nzendà ba' Eliashib, ngale'te ze ndùb.

²¹ A be tôg ze, Merémot nshum Uri, nshum Hakkots, nabte mo' kam kàbngô nzendà ba' Eliashib nèn nkum tôg ba' Eliashib.

²² A be tôg ze, ghale'te tse bo ghebte Yérusalém nà bèn mfa' yub.

²³ Bo be tôg yub, Benjamin bo Hashub fa' yub mbwe ba' yube. Bo be tôg yub Azaria nshum Maaséya, nshum Anania fa' mbaṅ ze ba'.

²⁴ A be tôg ze Binnui nshum Hénadad nabte mo' kam kàbngô, neto' fe num ba' Azaria nèn nkum lag bwe, tà nkum tôg bwe.

²⁵ Palal nshum Uzai fa' mbwe tôg kàbngô bo dù' netsin bwe mbéb dù' z'a be tà tù là. Yen dù' là tumte, mb'a mbwe ba' mfen, mbaṅ dù' netsin bwe mbéb ndàtsha. A be tôg ze Pedaya nshum Pareosh fa'.

²⁶ Ba Nétinia tse bo ke ntswe kônga là fa' tà nèn nkum mbwe nzendà ntse z'a mbinyam bo dù' netsin bwe mbéb dù' z'a tumte là.

²⁷ Bo be tôg yub ben Tékoa nabte mo' kam kàbngô z'a mbwe dù' netsin bwe mbéb dù' z'a tumte là tà nkum num kum i z'a kônga là.

²⁸ Ghale'te fa', mba we lo mbwe ze ba', num taṅ i z'a be tu nzendà ba nyàmdiaṅ nà.

²⁹ Bo be tôg yub Tsadok nshum Immer fa' mbwe ze ba'. A be tôg ze Shemaéya nshum Shekania, ngabéb nzendà z'a mbinyam nà fa'.

³⁰ A be tôg ze Hanania nshum Shélémia bo Hanun, mbatte nshum Tsalaf z'a kum ntôg là nabte mo' kam kàbngô. Bo be tôg yub Meshullam nshum Bérékia fa' mbwe ze to'ndà.

³¹ A be tôg ze Malkiya mèn netèt ghanabte ntùn tanjoṅ fa' tà nèn nkum num ba' ba Nétinia boa ghatantàne, mbwe nzendà Mifkad bo to'ndà z'a mfe tù, tôg bwe là.

³² Ghanabte ntùn tanjoṅ boa ghatantàn fa' yub netèt to'ndà z'a mfe tù, tôg bwe, bo nzendà ba mbwe là.