Néhémi 2 - NTSHOB NSI

Néhémi Yérusalém

¹ Ntùm ṅwù Nisan, num ngu'njù ṅam mbàa mba mfen Artasastia be mfen nà, me lo' ndu' ma' yi, nummb'a na' mb'a sàm fa'. Me nyamte se sen lé'njù là, ndù a ke' to' be ndùlala sàm lé'njù mba ntshù'.

² Mfen tshob me ndù: Numk'o ntshù kebwô à? O ke tshwèt ne ngone. A tù' nya ke b'a ndù nu ke ngùtni o à ntù o! Mo' mà bwôg ghom àm,

³ me bùnte mfen ndù: mfen tswe matmat! M'a' be ke nyamte se àm à ndùke ndùse tusô se ntufi tà tshàm be bwe sate, nzendà tse bèn nkù mbwôg fa l'à?

⁴ Mfen tshob me ndù: ke z'o tshwèt mbètt'à?

⁵ Ndùlala me tsiaṅ lén Nsi z'a ghù kamànyam nà, mbùnte mfen ndù: a be ze yen nà bwô mfen, ngafa' o me tum mènfen mbwe o là, o tum àm Yuda, ntùm tusô se ntufi tà tshàm be là, ndù me bèn nkut sen tusô là.

⁶ Ndùlala, mfen ze màbwengub tswe mbaṅ i là tshob me ndù: Manze nsi tswe njoṅ ndùke, o bèn mbèn njam njùke? Me yab ngelaṅ yi, mfen bam, mfaṅ me nèn.

⁷ Me bèn ntshob mfen ndù: A be ze yen nà bwô mfen nà, bo fà ṅwa'ni me, me tsho mfà ngomna tse bo be mo' yoṅ ta'ntse là, ndùlala ndù bo faṅ me tôg nèn nkum Yuda,

⁸ mbèn mfà ta' ṅwa'ni me tsho mfà Asaf ngabéb fèn mfen, ndùlala ndù a fà ntù tuba' nzendà kàbngô z'a mbaṅ Ndà Nsi là me, mfà mi kàbngô tusô mba mi ba' ze me nsi tswe bwe là. Mfen fà tshen ṅwa'ni là me, nummbe bu Nsi ze ntùn lo be num àm.

⁹ Me nèn mbaṅ ngomna tse bo be mo' yoṅ ta'ntse là, mfà ṅwa'ni tse mfen tum nà bo. Mfen lo tum tàndà ntsho boa ghako' nyàm bo nèn ntshag àm.

¹⁰ Sanballat ze Horon bo Tobiya, ngafa' ze Ammon be ju' mbe ta' mènntùn se' num nediag numebwô num bon Israél, nu tse ya yub kua' neshu.

¹¹ Me kum Yérusalém, nzi bwe lé'njù tat.

¹² Lé'njù tat tôg me lo nsi tèttswe' bag à bon ndô benntùn, ke tshob sàm ju bo num ju ze Nsi àm na' ntshob ndù me ghù num Yérusalém nà. Mo' nyàm nefa' yi lo ke be me, k'a ke nda' yàm nyàm me ke nko' num i là.

¹³ Me tum tèttswe', ntshùa num nzendà z'a bag tômbo' là, nèn nze nzendà ntshu dragon bo nze nzendà dù' neghua' nenà, nke ndôte kàbngô Yérusalém ts'a vùte nsi là, nke nsiaṅte nu num nzendà tse tse mbwôg kù i là.

¹⁴ Me tshùa mbaṅ nzendà ntshu ntse bo diaṅnkat ntse mfen, dù' fét mb'a be nyàm me ko' bwe tôg là.

¹⁵ Me ko' tèttswe', ntùm fube, nke nke' ndôte kàbngô. Me bèn ntshùa num nzendà z'a bag tômbo' là mbèn njam.

¹⁶ Ghakeb ntsha ke lèn dù' me nèn nà, ke lèn ju ze me tshwèt ngù là. A lo be be ndù me ke' yoṅ ntshob sàm nu ba Yuda, ke ghale'te, ke ben ndùbndùb, ke ghakeb ntsha lo; ke yoṅ ntshob nu sàm mèn netèt tse bo ke ndôte mfa' là.

¹⁷ Ndùlala me tshob bo ndù: Bin yen dù' ze bag bin be à! Bo sate Yérusalém, nton nzendà tse. Bin se' bag bin bèn nkut kàbngô Yérusalém ndù kà tuswe bèn neko be.

¹⁸ Me soṅ yub mba bu Nsi àm ze ntùn na' mbe num àm nà, boa ntshob mi mfen na' ntshob me là. Bo tshob ndù: Bag bin lo nsi nkut dù'! Men ntshob li fà tànntù ntù bo.

¹⁹ Sanballat ze Horon, Tobiya, ngafa' ze Ammon bo Guéshem ze Arab, be ju' yen tshô là, nzwi tshobe, ntshabte mbèn ngwag yage, ntshob ndù: Bin ghù à ke l'à? Bin diag neghù à tatu mfen ké?

²⁰ Tu wul àm fà mbùn ntshob bo, ntshob ndù: Nsi z'a ghù kamànyam nà nsi ghù bag yob ngu'u. Bag ghafa' tse, bag nsi lo nsi kut yen dù' li. Mba bin nà, bin ke' ghù zin bag i nsen ni, ke ghù ngù' nsen ni, ke ke nywinte sàm ju Yérusalém ni.