Néhémi 13 - NTSHOB NSI

Néhémi tsiaṅte num ngô Israél

¹ A na' be num sen lé'njù là, bo nke nsiaṅ nu ntùm ṅwa'ni Mosé, benntùn nke nju', njen mo' dù' ndù bo kite bwe ndù ze Ammon bo ze Moab na' ke be tsho ntùm ntse'te ben Nsi yoṅ ntshù'.

² Nummbe bo na' ke lo' bàn bo ntse nse' yi nebumte boa bon Israél, nummbe bo na' tsiaṅ Balaam num bo mfà nkàb yi njun i yi ndù a naṅ ndon tu bo; là Nsi kaṅ ndon nà a tù' mbotni.

³ Ngelaṅ ze bo ju' yen ntshù' là, bo fagte Israél num njoṅ ba ghùn fa, num njoṅ benntùn fa tse bo na' mb'a lem nebwete là.

⁴ A na' be num ngelaṅ yen nu li na' mbe ke yoṅ ngù là ndù bo na' yab ngale'te Nsi Eliashib ndù a ke ndôte bon nto'ndà ntùm Ndà Nsi yag là tsho shun bo Tobiya,

⁵ mbe ndù a na' nabte ta' to'ndà yi dù' ze bo na' mbe mbwe nke njab ju bwôntù bwe, labinda, tshu nefa' yi ntùm ndà, ngefet nze gham mfà ta' nz'é Nsi là, ndu' nswe mba mfèt be ju ze bo na' ntshob ndù bo ke mfà ba Lévi, boa ghayobkwi, ghabéb nzendà, mba tshu tse bo ke nsèbte nke mfà ghale'te Nsi là bwe.

⁶ Là, ngelaṅ ze njoṅ nu fa na' ngù là, me ke be tshàm mà Yérusalém, nummbe a na' mb'a ngelaṅ ze ngu'njù Artasastia mfen Babilon na' nkum ngu'njù ntshob bàa ṅam ntat mb'a jù fen nà, me na' bèn mbèn njam mbaṅ mfen.

⁷ Ngu' be miagte bag mfen lé'te, me bèn mbèn njam mà Yérusalém, me yen nukebwô ze Eliashib na' ngù ntshùa num nu Tobiya, mb'a na' nabte mo' to'ndà mfà yi ntùm Ndà Nsi là,

⁸ a bag àm neshu, me sô njoṅ tshundà Tobiya fa ma' njù njam ndà yen to'ndà là.

⁹ Me tshob bo lànte njoṅ nto'ndà fa, ngù bo bèn njab tshu Ndà Nsi fa bwe, tshu bwôntù boa labinda (tshu nelamte).

¹⁰ Me bèn ndèn mba ndù bo na' ke be fà ze ju ba Lévi, boa ghayobkwi tse bo ke mfa' fa' Nsi là, bo na' kù, mèn nke nèn ntùm ze nà, mèn nke nèn ntùm ze nà.

¹¹ Ndùlala me kag ba tà ngô, ntshob ndù: Numke bo ghua' Ndà Nsi à? Me bèn ntse'te ba Lévi boa ghayobkwi mbèn njab yub num dù' fa' sube.

¹² Njoṅ ba Yuda fa nke ndo' ngefet, ndu' nswe mba mfèt nke ngabte nze gham ndo' ta' nz'é ntshù' nse' yi num neyab ntùm nta.

¹³ Là, tu wul àm me yab ngale'te Nsi Shélémia, mba Sadok ngakite ṅwa'ni, mba Pedaya mo' mèn netèt ba Lévi, ghalôte nkàb Nsi, mo' mèn z'a se' ze nke njwimte yub là b'a Hanan mén Sakur mén Mataya, nummbe benntùn na' lèn ndù bo b'a benntùn nenùne. Fa' sub tù' b'a neke ngabte tshu fèt tshobe.

¹⁴ O Nsi àm, kwimt'àm num yen nu li, kà lagte numebwô tse me ghù num Ndà Nsi àm nà mba ba tshu ts'a bwô ndù bo ke nze là.

¹⁵ A be num tshen lé'njù là, me yen benntùn bo nke ndo' nku nyiaṅte ndu' yi mum lé'njù Sabbat, nke ndo' nkag ngefet mfe yi, mbèn nkut ba ntu' num ba nkekwène, boa ntàmtù ndu', ntàm mangolo, boa njoṅ tshaṅ tshu fa ndo' nse' yi mà Yérusalém mum lé'njù Sabbat, me tagte yub mum lé'njù ze bo ke nswèn jujù là.

¹⁶ Ba Tiro tse bo ke ntswe ntùm yen ngô là na' nke ngù bo nke ndo' ngontse boa njoṅ tshaṅ tshu ntàn fa nse' yi bo nke nswèn bon Yuda mà Yérusalém mum lé'njù Sabbat.

¹⁷ Me kag ba kamkam Yuda ntshob bo ndù: Yen ni b'a ke lèn nukebwô li ze bin tshwèt ngù ndo' nke ntabnjoṅ lé'njù Sabbat yi à?

¹⁸ Ba tà tsin na' ke ghù yub be ndaṅndaṅ ndùlala, kà Nsi be naṅ yen njoṅ nge' li num bo, mba num yen ngô li ké? Là, ngelaṅ ze bin num ntabnjoṅ lé'njù Sabbat là, bin num nke nkamt'a yantù Nsi num ba Israél.

¹⁹ Me tshob ndù bo ke mfùn nzendà ngô là ngelaṅ ze njù to' nesèn mfe nzendà ngô kà lé'njù Sabbat nse' là, me tshob ndù bo kabte ba ghabndà, me bèn ntshob mba ndù kà bo gha' i tà nkum num mbatte lé'njù Sabbat, me bèn njab mba tsemo' ghafa' tshàm ndù kà sàm ju kebwô tsho ntùm ngô mum lé'njù Sabbat.

²⁰ Ndùlala ghaswèn tshu ntàn boa ghajun tshu ntàn nke nzi njam njù Yérusalém num ta' lé'njù ntshù' ke lé'njù bàa lo.

²¹ Ndùlala me tshob neta ntshob ndù: Bin ke nzi mbwe yen kàb ndoṅ nà numke? Bin bèn ngù ngùlala mba me nsi ghù zin ntsha (mba me nsi yab mbu num bin). Fe num yen ngelaṅ bo ke bèn nese' mum lé'njù Sabbat.

²² Me bèn ntshob ba Lévi ndù bo lànte wut tshobe mbèn nse' mbéb ba nzendà num nelànte lé'njù Sabbat. Nsi àm kwimt'àm num yen nu là, tsham àm num kondèn o ze ndùb.

²³ A b'a be num yen ngelaṅ nà ze me yen ba Yuda tse bo na' na ndà boa ngonngon Asdod, boa ngonngon Ammon,

²⁴ mba ngonngon Moab, mo' kam bon tshob nke ntshob à ntshob Asdod, ke lèn netshob ntshob ba Yuda, nke ntshob à ntshob yen nzwit benntùn ni ke ntshob yen nzwit benntùn nà lo.

²⁵ Me kag yub nso ndon tu bo; ndab mba tsemo' benntùn netèt bo ntsho' nyiaṅtu tshobe; me bèn ngù bo kàn mfe tshob nu nsaṅlaṅ bwe num lén Nsi ndù: bin ke nsi fà bon tsin tse bènnzwi bon tshob tse bandum, ke bèn nke ndo' bon tshob tse bènnzwi mfà bon tsin tse bandum, ke bèn ne na ndà bin à bo.

²⁶ Salomon mfen Israél na' ke fàn yen nu là mfe num men ngùninu là ké? Netèt ngôngô tse bo yàm nà mo' mfen mba yi là na' ke be, Nsi i nke nkô i, Nsi be ndù a lo' i ngom mfen njoṅ ba Israél fa yi, là, ngonngon tum ghù mba kua' ze tu wut fàn nu.

²⁷ Mba bin zin a bwô ndù bo ju' ndù bin tshwèt ngù yen njoṅ nukebwô ze ndùb là fa, nke mbagte ntshù' Nsi be, nke nso ngonngon tum ké?

²⁸ Mo' mèn netèt bon Yoyada mén Eliashib yen ngale'te Nsi ze ndùb là, na' mb'a ntse Sanballat mén Horon. Ndùlala me ta' i mbaṅ àm a nèn a sag.

²⁹ Nsi àm kwimte yube, nummbe bo bagte nu nele'te Nsi, mbagte kàn nele'te Nsi, mba kàn ba Lévi.

³⁰ Là, me lo sô njoṅ mbèn nu ba tum fa num bo; mbèn nte kàn ghale'te Nsi boa ba Lévi, a ku'ni num yen mèn ni, num yen tu fa' li, nku'ni yen mèn ni num yen tu fa' li,

³¹ me bèn mfà mba ntshù' num neke mfà ntshwèn ngelaṅ mba bo na' nka' là, mba nu nelo' mbwe njwit tshu nse' yi. Kwimte yen nu li me, me Nsi àm a tù' numebwô me.