Néhémi 1 - NTSHOB NSI

Le'te Néhémi num bon Israél

¹ Ntshob Néhémi, nshum Hakalia. A lo be ntùm ṅwù Kisle, num mbatte ngu'njù ṅam mbàa mba Artasastia be num fen nà, me Néhémi be Suse, tètla' diba.

² Hanania, mo' mfèl àm fe Yuda boa tsemo' benntùn. Me bètte yub nu num ba Yuda tse bo na' mfe ndà kuan nà, mbètte yub nu num Yérusalém.

³ Bo bùnte me ndù: Ben tse bo fe ndà kuan nà b'a ntùm ta' taṅ ngô, ntùm nge' ndùb mba ntùm tuswe; kàbngô ts'a Yérusalém nà vùte nsi fa, bo bèn nton nzendà tse fa.

⁴ Ndùse me ju' tshen tshu li là, me tam tun àm nsi, ndàne, ntswe lé'njù yàm ntùm nenywine. Me tswe nziku'u, ntsin mbwe Nsi z'a ghù kamànyam nà nde't'é,

⁵ ntshob ndù: Wù Tshùaben, Nsi z'a ghù kamànyam nà, Nsi ndùb mba ze nekuni. O be mbéb kàn so, nke nko ndèn ben bo be nkô o mbèn nke nze ntshù' mu là.

⁶ A bwô ndù o kù' ntoṅ mbèn nga' miag mu. A bwô ndù o ju' le'te ze ngafa' o tshwèt nde't'o yi ndonni, tèttswe' bo mbwôgtshù là. A ke nde't'o à num tu ghafa' tsho bon Israél, nke mbam nukebwô bon Israél, nukebwô tshag tse bag ghù wù là. Nummbe tu wul àm mba tunndà tàa, bag lo ghù nukebwô.

⁷ Bag lo kag yantù ntù o, ke ze nkàn, ntshù' boa ntag mi o na' nkite ngafa' o Mosé là.

⁸ Kwimte ntshob li mi o na' ntshob ngafa' o Mosé ndù a tshob là ndù: A be ze bin ghù nukebwô là, mba m'a' sate zin netèt ngôngô;

⁹ là, a be bin bèn mbèn me, a be ze bin tshùb nkàn màm, nke nze là, mba me nsi kùmte zine, lo' zin bèn yi ntùm yen dù' li ze me na' ntsho' num nete lén sàm bwe là. Ke bo lo' zin nèn yi à be num zit tôg kamànyam no mba me nsi lo' zin bwe bèn yi njam.

¹⁰ Bo b'a ghafa' tsho, mbe yu nzwit mèn, ndù o lo' à ngù' o ze ndùb bo neta bu o ntshu' yub yi.

¹¹ Tshùaben, a bwô ndù o kù' ntoṅ nju' le'te ngafa' o, nju' le'te ghafa' tsho tse bo tshwèt nkô neke mbwôg lén su là. Fà fen ngafa' o num sènni, ngù ndù a tum mènfen mbwe yen mandum ni. Me na' mb'a ma' ndu' mfen ngelaṅ mbile.