Nebwôgte 9 - NTSHOB NSI

Nekwimte tatu Israél

¹ Israél, ju'u! Sènni o a' dut Yordan, netù' ngatô ngô ndùbndùb, ngô tse bo ta ntshùa o là, ntusô ndùb mi bo kut ntsham ntsiage, a sag nèn tà tù là;

² a b'a nzwit nesà benntùn, bon Anak, ts'o lène, ts'o ju' bo nke ntshob nu mfà num bo ndù: Wù z'a ghù nebù' tu nsi num bon Anak là à?

³ Lèn sènni ndù Tshùaben Nsi o a' zin mbwe o kua' ze tu wut mba ta' mbwôg z'a tshwèt nkù là; a yi a' bèn mbiagte yube, ndab yub mfà nsi mbwe o; o nsi ta' yube, biagte yub ndende mba Tshùaben na' ntshob là.

⁴ Ndùse Tshùaben Nsi o nsi ta' yub mbwe o là, kà tshob ntù o ndù: A yàm nunetsin bèn ngù kà Tshùaben ngù me ntsho ntùm yen ngô li k'a tù' yàm. Nummb'a tshùagntù tshen ngô là bèn ngù kà Tshùaben nta' yub mbwe o.

⁵ Nga, a ke' b'a yu nunetsin bo yu nu ndaṅndaṅ ntù o z'o tsho ntùm ngô yube, a ntù' yu; là, a b'a tshùagntù tshen ngô là bèn ngù kà Tshùaben Nsi o nta' yub mbwe o. Yen nà b'a nelo' nzwiagte ntshob mi Tshùaben saṅlaṅ bwe tà tshag Abraham, Isak mba Yakob là.

⁶ Lèn nda' ndù a ke yu nunetsin bèn ngù kà Tshùaben Nsi o mfà yen ngô ntùn ni wù a ntù' yu; nummb'o b'a ta' nzwit mèn z'a be ntùn tu là me Israél.

⁷ Kwimte, kà lag mat z'o na' nkamte yantù Tshùaben Nsi o yi num kônkwa là. Fe lé'njù se bin tum ngô Egipto tà nse' nkum nsen ni là, bin lo be ghatatu mbwe Tshùaben.

⁸ Bin lo kamte yantù Tshùaben Horéb, Tshùaben lo ya ntù num bin, njù' ndù a' biagte zine.

⁹ Ndùse me ko' num mbat nekwé ntafèt ndoṅ, ntafèt nkàn mi Tshùaben wat bin à bo là, me tswe num mbat lé'njù ṅam nkuà ke jù bàn, ke nu ntse.

¹⁰ Tshùaben fà ntafèt ndoṅ me mbàa mi kua' bu i kite là. Ntshob mi Tshùaben na' ntshob bin num mbale, netèt mbwôge, num lé'njù mbumte là lo be num men ntafèt là.

¹¹ Lé'njù ṅam nkuà, tèttswe' mba mbwôgtshù lo be ku' Tshùaben fà ntafèt ndoṅ mbàa me, mb'a ntafèt kàn.

¹² Tshùaben tshob me ndù: Lo nsi nsen ni ndende nswe'e; nummbe yu nzwit mèn z'o ghù bo tum Egipto là sagte wul i. Bo sô wut yub ndende num manze ze me na' ntshob bo là; bo lo' tùn nabte neto yi.

¹³ Tshùaben tshob me ndù: Me yen mbe yen nzwit mèn ni b'a nzwit ze tu i ta là.

¹⁴ Faṅ nà me biagte yub kà mbwete lén sob bam kamànyam; tu wul o, me nsi lo' o ghù ngô neta yi, ngô ze benntùn yàm bwe ntshùa yen nzwit mèn nà.

¹⁵ Me swe' num mbat mbèn njam, ndù mbwôg lo' mbat fa, bag ntafèt kàn mbàa mum mbu màm mbàa.

¹⁶ Me lôte njen ndù bin ghù nukebwô num Tshùaben Nsi zin, nabte ta' mfô tùne, nsô wut zin ndende num manze ze Tshùaben na' ntshob bin nà.

¹⁷ Me lo tshùb ntafèt mbàa mi me ghù mum mbu màm nà ntsit be kua' num miag mine.

¹⁸ Me te nkekwi' màm mbwe Tshùaben mba mbwembwe là, num lé'njù ṅam nkuà, mbwôgtshù mba tèttswe', ke jù bàn ke nu ntse. A be ndùlal'a num nukebwô tse bin ghù, mfa' ju z'a ke' bwô num miag Tshùaben nà. Bin lo tshùa bwe nkamte yantù Tshùaben.

¹⁹ Nummbe wul àm lo fét num yantù bo tshùagntù ze me yen Tshùaben ghù num bin, kà nke ntù' diag a nda' nebiagte zin fa là. Nda' ndù Tshùaben bèn nju' le't'àm mba yen yoṅ i li.

²⁰ Tshùaben lo ya ntù mba num Aron kà nke ndiag nezwi i. Me le'te mba num ze tu ze mo' yoṅ yen ngelaṅ nà.

²¹ Me lo' mfô ze bin nabte, a be bin nukebwô zin nà, nton mbwôge, ntsham k'a tù' b'a bwe tse, me ma' bwe tse ntùm fub s'a ke nswe' mfe num mbat là.

²² Bin lo kamte yantù Tshùaben Tabéera, Masa mba Kivrot-Hatlaava.

²³ Ndùse Tshùaben tum zin Kadèsh-Barnéa ndù bin nèn ndo' ngô z'a fà bin a tù' zin nà, bin tsho nta tu yi. Bin ke be ben nenùne, ke ju' ntshu Tshùaben Nsi zin.

²⁴ Fe mba me lèn zin nà bin ke mb'a be ghatatu mbwe Tshùaben.

²⁵ Me lo te nkekwi' màm mbwe Tshùaben, nte nkekwi' màm mbwe i lé'njù ṅam nkuà, mbwôgtshù mba tèttswe', nummbe Tshùaben lo ke nkô nebiagte zine.

²⁶ Me le'te Tshùaben ntshob ndù: Tshùaben, kà biagte yu nzwit mèn, ntsi' mu, z'o tshùa njam yu nezi ntshu' i, ntshùa njam bu o ze neta nsô i Egipto là.

²⁷ Kwimte ghafa' tsho, Abraham, Isak mba Yakob. Kà te lag num tùntu yen nzwit mèn ni, ke te lag num tshùagntù i bo nukebwô i;

²⁸ mbwôg ndù kà ngô z'o sô yag bwe là tshob ndù: A b'a nummbe Tshùaben ke' ghù mba' nelo' yub kà nèn nkum yi ntùm ngô z'a bù bo là. Mb'a be mbàn yub là, a lo sô yube, neghù ndù bo kwùte num kônkwa.

²⁹ Mba tà ndùlala, bo b'a yu nzwit mèn, mbe mu ntsi'i, ndù o bèn nsô yub Egipto njam ngù' o ze ndùb mba njam bu o z'o nyit là.