Nebwôgte 5 - NTSHOB NSI

¹ Mosé tsiaṅ ba Israél fa, ntshob bo ndù: Israél, bin ju' ntshù' boa nkàn mi me soṅ zin yi sènni là. Bin zi'te njoṅ i fa kua' mebwô, nke nze njoṅ i fa kua' mebwô.

² Tshùaben Nsi be lo wat kàn bag bin bo Horéb.

³ Tshùaben lo ke wat kàn a boa tà be; a na' ngwat kàn a bag bin bo, ben tse bo be nsen ni sènni là, be tse be ke' ntùn nà.

⁴ Tshùaben lo tshob nu bin num mbat se se netèt mbwôge.

⁵ Me lo tsin netèt bin bin a Tshùaben, num nesoṅ zin ntshob Tshùaben, nummbe bin lo ke mbwôg mbwôge, ke ko' tsin num mbale. Tshùaben tshob ndù:

⁶ Me b'a Tshùaben Nsi o, z'a sô o ntùm ngô Egipto, ndà kuan nà (me Israél).

⁷ Kà ghù tsemo' nsi mbwe àm.

⁸ Kà nabte neto, ke sàm ju z'a be mfe tù, mfe kamànyam no, ke z'a num nsitsha' mà nsi lo, ke z'a ntùm ntse bam tsha' lo.

⁹ Kà vù nsi mbwe tshen nsi là, ke fa' bo, nummbe me bèn mbe Tshùaben Nsi o, Nsi ndànghe'e. Me be naṅ ntsha tu ba tà boa bon num zwiaṅ tat ke zwiaṅ kuà lo, a be ze bo bàn àm nà.

¹⁰ Là nke ntam ntse ben ntsha' ntsha', a be ze bo kô àm, nke nze ntshù' màm nà.

¹¹ Kà tsi lén Tshùaben Nsi o ntùm tatte, nummbe Tshùaben ke' be kag mèn z'a tsi lén se ntùm tatte là, kà ke naṅ ntsha tu ng'é.

¹² Ke nkwimte lé'njù Sabbat, nke nze.

¹³ Fa' fa' num lé'njù ntôge, mfa' njoṅ so fa' fa.

¹⁴ L'a mbe mbatte lé'njù sammbàa, a be Sabbat Tshùaben Nsi o, lé'njù fite. Kà fa' sàm ju sen lé'njù là, ke wù, ke nshum o, ke ngon o lo. Kà mba ngafa' o ze mandum ke ze mènnzwi, ke nyàm tsho, ke nkùla' z'a be la' o lo là, kà fa' sàm ju sen lé'njù là.

¹⁵ O nsi ke nkwimte mb'o na' be nkuan ntùm ngô Egipto, Tshùaben Nsi o nyit bu i ze neta nsô o yi mà bwe. A ndùlala ze Tshùaben Nsi o tshob mb'o ke nze lé'njù fite là.

¹⁶ Ghù nku'ni tàan bo màan mba Tshùaben Nsi o tshob wù là, ndù a tshùa ndùlala ntswe'njù mu tènte, o be mebwô ntùm ngô ze Tshùaben Nsi o fà wù là.

¹⁷ Kà zwi mènntùn.

¹⁸ Kà ghù màndà.

¹⁹ Kà yi tshô.

²⁰ Kà ghù kwénta tatte num mfèl o.

²¹ Kà ghe'te nzwi mfèl o; ke ghù miag lànghe' num ndà i, ke nà i, ke ngafa' i ze mandum ke ze mènnzwi, ke nyàmna' i, ke kekwène lo; ke ghù miag lànghe' mba num ke lo z'a b'a ze mfèl o là.

²² Tshù ntshob mi Tshùaben tshob a kua' nze neta num mbale, netèt mbwôge, ndot bo njam nà. A na' ntshob a mbumte zin, ke bèn nkwi'te sàm ju bwe. A lo kite men ntshob là num ntafèt ndoṅ mfà me.

Mosé nganze netèt Nsi bo benntùn

²³ Ndùse bin ju' nze ntùm njame mbe be mbat nke nkù là, fenfen tsin nzwit boa ghakwé mbwe tsin se' mbaṅ àm njoṅ yub fa, bin tshob ndù:

²⁴ Yene, Tshùaben Nsi yag la'te nkuni mi bo ze neghu'u, bag ju' nz'é netèt mbwôge. Sènni bag yen mbe Nsi tshob nu benntùn kà bo bèn nke' ntùn.

²⁵ Ndonni bag ke nkwù a numke? Me tshob a nummbe yen mbwôg ndùb li nsi kù yage; a be ze bag ke' nke nju' nze Tshùaben Nsi yag là, mba bag nsi kwù.

²⁶ A kua' zit mèn netèt be z'a to' ju' nze Nsi mba be a nke ntshob netèt mbwôg kà bèn nke' ntùn à?

²⁷ A bwô ndù o ghebte, nju' mba ke lo ze Tshùaben Nsi be nsi tshob wù là. Tu wul o nsi soṅ mba ke lo ze Tshùaben Nsi be nsi tshob wù là. Bag nsi ju' yen nu là bèn ghù mb'a tshob bag là.

²⁸ Tu wut Tshùaben lo ju' ntshob mi bin tshob me là. Ndùlala Tshùaben tshob me ndù: Me ju' ntshob mi yen nzwit mèn nà tshob wù là; mba ke lo ze bo tshob là bwô.

²⁹ Wé, bo lo nke ngù a be lèn yen ntù là neke mbwôg àm yi mbèn nke nze njoṅ nkàn màm fa, mb'a be bo tswe mebwô matmat, bo mba bon tshobe!

³⁰ Nèn ntshob bo ndù bo bèn ntùm ntàb tshobe.

³¹ Là, bag tu wul o nsi tù' nsen ni, me soṅ o njoṅ nkàn màm fa, ntshù' màm boa ntag mi o nsi tswite yub yi là. A bwô ndù bo ze njoṅ i fa ntùm ngô ze me nsi fà bo, a tù' yub là.

³² Bin nsi lo' nku'ni ghù mba ke lo ze Tshùaben Nsi zin tshob bin nà yi. Bin ke nsi kaṅte nèn bu zwim ke bu kwéb lo.

³³ Bin zin a kua' num manze ze Tshùaben Nsi zin kite bin nà. A nsi tshùa ndùlala bin yôge, mbe mebwô, ntswe'njù min bèn ntènte ntùm ngô ze me nsi fà bin, a tù' zin nà.